Maatewoosi Wongeella
11 Yesuusi 12 rosaanosira biddishsha uyinsahu gedensaanni, rosiisaranna sabbakara wole katamma haˈri.
2 Yohaannisi usuru mine heeˈre Kiristoosi loosanni noore macciishshe rosaanosi soye, 3 “Daanno yinihu ateetinso wole agadhino?” yee xaˈmi. 4 Yesuusino togo yee qolinsa: “Hadhine macciishshitinanninna laˈinanni heedhinoonnire Yohaannisira kulle: 5 Ballootu laˈanni no; kottootu uurrite hadhanni no; dhiigu dhibbi amadinonsari hurtanni no; macciweelootu macciishshitanni no; reyitinori kaˈanni no; buxaneteno dancha duduwo kullanni heeˈnoonni. 6 Anenni kainohunni gufiˈrannokkihu hagiirraamoho.”
7 Yohaannisi rosaano hadhuhu gedensaanni, Yesuusi mannaho Yohaannisi daafira kula hanafi: “Halallira hadhinoonnihu maa laˈinaraati? Bubbe milli assitanno shomboqqo? 8 Ikkina hadhinoonnihu maa laˈˈateeti? Seesallitte uddano uddiˈrino mancho? Seesallitte uddano uddiˈrino manni noohu mootoollate mineeti. 9 Mayira hadhiniyya? Masaalaancho laˈinara? Ee kuleemmoˈnena, isi masaalaancho nafa lowo geeshsha rooreho. 10 ‘Kuneeti albakkiinni haˈranni doogokki qixxeessanno gede sokkaanchoˈya balaxe* soyeemmo’ yine borreessinoonnihu isi daafiraati. 11 Halaale yeemmoˈnena, xaa geeshsha heeˈrino manni giddo Cuuaancho Yohaannisi roorannohu dino; ikkollana gordu Gashshootira shiimiidihu nafa roorannosi. 12 Cuuaanchu Yohaannisi soqqansho hanafi yannanni kayise xaa geeshsha mannu gordu Gashshootira gaaramanni no; cince gaaramannohuno afiˈranno. 13 Korkaatuno Masaalaano coyidhinorinna Muse Seeri baalu Yohaannisi yanna geeshsha kullanna keeshshino; 14 kiˈne ammanneno hooggenona, ‘Daanno yini Eeliyaasi’ isooti. 15 Macca noohu macciishsho.
16 “Tenne ilama ayenni masalso? Dikkote ofolte mimmito woshshitanni togo yitanno qaaqquulli gedeeti: 17 ‘Suusulle ufuunfummoˈne, kiˈne kayinni disirbitinoonni; ninke wiˈlishshinummoˈne, kiˈne kayinni dadillunni gagaso digaˈnitinoonni.’ 18 Hatteente gede, Yohaannisi itikkinna agikki dayita, mannu ‘Agaaninte amaddinoho’ yiisi. 19 Manchi Beetti itanninna aganni dayi; mannu kayinni, ‘Laˈe konne kokkaamonna woyinete xajjera wojji yaannoha, qaraxaasinetenna cubbaataammu jaala’ yiisi. Hayyo kayinni keeraancho* ikkase loosisenni* buunxoonni.”
20 Hakkiinni Yesuusi lowo maalale loosino katamma maaro eˈinokki daafira togo yaanni mishinsa: 21 “Koraaziini, atera aanneˈe! Beetesaayida, atera aanneˈe! Kiˈnewa loonsoonni maalale Xiroosinna Sidooni katammara* loonsoonniha ikkoommero, xiddu uddano uddidhenna buluuloho ofolte biˈre biˈre maaro eˈe kaˈino. 22 Ani kayinni yeemmoˈnena, Yoote Barra Xiroosinna Sidooni katammanni roore kiˈnera kaajjado yoo yinanniˈne. 23 Atino Qifirinaahoomi, gotti yite gordu geeshsha iillattaha lawihe? Deeˈni! Waamma* dirratta; korkaatuno atewa loonsoonni maalale Soddoomaho loonsoonniha ikkoommero, techo geeshsha heeˈrannohu baino. 24 Ani kayinni yeemmoˈnena, Yoote Barra Soddoomunni roore kiˈnera kaajjado yoo yinanniˈne.”
25 Hatte yannara Yesuusi togo yii: “Gordunna baattote Mooticha Anna, konne coye hayyootahonna egennaammaho daheessite, qaaqquulleho xawisootto daafira mannu baalu albaanni guwisiˈreemmohe. 26 Ee Anna, tini ate fajjooti. 27 Anniˈya baalanka coye anera uyinoe; Anna agurranna Beetto seekke afinohu dino; Beetto agurranna Annano seekke afinohu dino; Beettu baxe Annu daafira rosiisinosiha agurranna Anna seekke afa dandaannohu dino. 28 Daafurtinoonnirinna duhu ayirrinoˈneri baalu anewa amme; ani fooliishshiisheemmoˈnena. 29 Qambaraˈya duqqe; anewiinnino rosse; ani shaqqadohonna wodana joogaho; umiˈnerano* fooliishsho afidhinanni. 30 Korkaatuno qambariˈya shotaho;* duhiˈyano diayirrannoho.”