Sayikki Yohaannisi Sokka

1 Ani geerchu,* godowinta baxeemmohura ayirradu Gayiyoosira.

2 Baxamootto rodoo, xa heeshsho qiniitinohente gede,* baalunku coyi qinaannohe gedenna fayyimma afiꞌratto gede huuccatto asseemmohe. 3 Roduuwu dagge halaale seekkite cuꞌmiꞌroottota farcidhanna macciishshe baasa hagiidhoommo; qoleno halaalu giddo millisakki lowo geeshsha hagiirsiissinoe. 4 Oosoꞌya halaalu giddo millissanni noota macciishsha saino hagiirri dinoe.*

5 Baxamootto rodoo, egennoottokkire ikkiturono roduuwaho assatto coyinni ammanamoottoha ikkoottota leellishshanni nootto. 6 Insano songote albaanni baxillikki daafira farcidhino. Maganu hagiidhanno garinni geegiissinsa ballo. 7 Korkaatuno, dagatewiinni mittoreno adhitukkinni fultinohu suꞌmisira yiteeti. 8 Hakko daafira, halaalu giddo mitteenni loonseemmore ikkineemmo gede, togoo manna wosinsiꞌrate giddeeti noonke.

9 Songote borreessoommori no; ikkollana mereeronsa albiidiha ikka hasiꞌrannohu Diyoxiraaxiisi, ninkewiinni mitto coyeno ayirrinyunni diadhanno. 10 Hakko daafira, ani dayummoro ninke daafira busha duduwo tuqisanni* loosanno looso xawo fushsheemmo. Hatteeno agurranna, isi roduuwa ayirrinyunni dihaaꞌranno; insa haaꞌra hasidhannoreno hoolatenna songotenni fushshe shorrate woꞌnaalanno.

11 Jaalaꞌya, busha coye haꞌrunsitooti; hatteentenni dancha coye haꞌrunsi. Dancha coye assannohu Maganu widooti. Busha coye assannohu Magano dilaino.* 12 Baalunku roduuwi Dimeexiroosi daafira seekkite farcidhino; halaalu umisino farciꞌrinosi. Isinni, ninkeno isi daafira farciꞌnanni heeꞌnoommo; ninke farciꞌneemmo coyi halaale ikkinota afootto.

13 Borreesseemmohehu lowo coyi no; ikkollana kawiinni sae biiretenninna qalametenni borreessammohera dihasiꞌroommo. 14 Muli yannara albakki laeemmo yee hexxeemmo; hakka woyite xaande hasaambeemmo.

Keeru ledokki ikko.

Roduuwu keere sokkinohe. Roduuwaho mittu mittunkura keere iillishie.