Roomu Sokka
10 Roduuwa, Israeelete wodaniꞌyanni halcheemmohunna insa daafira Magano huucceemmohu gattanno gedeeti. 2 Insa Maganoho laalaattannota ani umiꞌya farciꞌreemmo; ikkollana laalaattannohu addu egennonni diꞌꞌikkino. 3 Maganu keeraanchimma affinokki daafira uminsa doogonni keeraanchimma hasidhanni, Maganu keeraanchimmara maahoyye yite gala gibbino. 4 Ammana loosunni leellishannohu baalu keeraaꞌmanno gede Kiristoosi Seeraho gumulote.
5 Muse Seerunni afiꞌnanni keeraanchimma daafira, “Seera agadhanno manchi lubbotenni heeꞌranno” yee borreessino. 6 Ammanatenni afiꞌnanni keeraanchimma daafira kayinni togo yinoonni: “Wodanikkinni, ‘Gordo fulannohu ayeti?’ yitooti; hatto yaa Kiristoosi dirrisateeti; 7 woy ‘Qile dirrannohu ayeti?’ yitooti; hatto yaa Kiristoosi reyotenni kayisateeti.” 8 Qullaawa borro mayitannolla? “Qaalu atera mule no; isinni afiikkiranna wodanikki giddo no”; kuni ninke sabbankanni heeꞌnoommoho ammanate “qaaleeti.” 9 Yesuusi Mooticha ikkinota afiikkinni faajjete farciꞌrittoronna Maganu reyotenni kayisinosita wodanikkinni ammanittoro gatatto. 10 Mittu manchi wodanisinni ammane keeraaꞌmanno; qoleno afiisinni ammanasi faajjete farciꞌre gatanno.
11 Qullaawu qaali, “Iso addaxxannohu baalu diꞌꞌirraawanno” yaanno. 12 Ayihudootunna Giriikootu mereero badooshshu dino. Baalunku Mootichi mittoho; isi woshshidhannosirira baalaho lowo atoote aannonsa. 13 Korkaatuno, “Yihowa suꞌma woshshannohu baalu gatanno.” 14 Ikkollana iso ammantukki hiitto assite woshshitasira dandiitanno? Isi daafira macciishshitukki hiitto ikkite ammantasira dandiitanno? Sabbakannohu nookkiha hiitto ikkite macciishshitanno? 15 Sonkinsakkinni hiitto ikkite sabbakkanno? “Dancha duduwo dudubbannori lekka hiitto biiffinote!” yine borreessinoonni gedeeti.
16 Ikkollana, danchu duduwira hajajantinori baalanka diꞌꞌikkitino. Korkaatuno Isayyaasi, “Yihowa, ninkewiinni macciishshinore* ayi ammanino?” yiino. 17 Konnira ammana macciishshatenni dagganno. Macciishshinannihuno Kiristoosi daafira kulanno qaaleeti. 18 Ani mitto coye xaꞌmeemmona, insa macciishshitukkinni gattinokka? Deeꞌni macciishshitino; korkaatuno, “Qoonqonsa baatto baalate macciishshantu; sokkansano baattote qacce geeshsha iillitu” yinoonni. 19 Israeele affukki gattinokka? Hatto yinannikki gede Muse umo asse, “Mannaꞌya ikkitinokki daganni hinaasiiseemmoꞌne; wodanchitannokki dagannino lowo geeshsha hanqiseemmoꞌne” yiino. 20 Isayyaasino mitte giddonni, “Hasidhinoekkiri afidhue; xaꞌmidhinoekkirirano leellummonsa” yiino. 21 Ikkollana isi Israeelete daafira coyiꞌranni, “Hajajantannokkiriranna mokkookku mannira barra woꞌma angaꞌya diriirsoommo” yiino.