Maarqoosi Wongeella
2 Ikkollana, Yesuusi shiimu barri gedensaanni galagale Qifirinaahoomi dayi; isi mine no yinanni duduwino mannaho iilli. 2 Konnira lowo manni gamba yee mine woꞌmeenna, nafaru nafa ruukki; isino qaale kulinsa. 3 Hatte yannara mannu, shoolu manchi duheenna mitto laanshaawino mancho isiwa haaꞌre dayi. 4 Ikkollana mannu batiꞌrino daafira, laanshaawino mancho Yesuusiwa shiqqi assitanno faro hooggu; konnira, Yesuusi noo taaloote laꞌe mineho iimiido diigge laanshaawino mancho rerentenni dirrissu. 5 Yesuusino ammanansa lae laanshaawino mancho, “Beettoꞌya, cubbokki maarroonnihe” yiisi. 6 Hakkiicho ofolte noori seeru rosiisaano giddo mitu wodaninsanni togo yite heddu: 7 “Kuni manchi konni garinni coyiꞌrannohu mayiraati? Isi Magano xonanni no. Mitto Magano agurranna cubbo maara dandaannohu ayeti?” 8 Ikkollana, Yesuusi hakkawoyintenni heddanni noore ayyaanisinni afe togo yiinsa: “Wodaniꞌnenni konne coye mayira heddinanni? 9 Laanshaawino mancho, ‘Cubbokki maarroonnihe’ yaatenna ‘Kaꞌe rerekki duqqite haꞌri’ yaate giddo shottannoti hiitteeti? 10 Ikkollana manchi Beettira uullate aana cubbo gatona yaate silxaane noosita affinara hasiꞌreemmo.” Hakkiinni laanshaawino mancho togo yiisi: 11 “Kai, rerekki duqqite minikkira haꞌri.” 12 Manchuno kae, hakkawoyintenni reresi duqqe mannu baalu albaanni fule haꞌri. Konnira mannu baalu lowo geeshsha dhagge assiꞌre, “Togoo coye horo laꞌne diegenninoommo” yaanni Magano guwisi.
13 Yesuusi galagale baaru qacce haꞌri; mannu baaluno timbiliqqi yee isiwa mari; isino rosiisinsa. 14 Sae haꞌranni heeꞌre, Ilfiyoosi beetti Leewi qaraxo qaranxanni darga ofolle nooha afe, “Hoodeꞌya amo” yiisi. Isino kae hoodesi haꞌri. 15 Hakkunni gedensaanni, Yesuusi Leewi mine sagale itanni heeꞌreenna lowo qaraxaasinenna cubbaataammi Yesuusinna rosaanosi ledo sagale ittu; insa giddo batinyu harunsaanosiiti. 16 Ikkollana, Farisootu wido ikkitinori seeru rosiisaano Yesuusi cubbaataammunna qaraxaasinete ledo itanni nooha laꞌe rosaanosi, “Isi qaraxaasinetenna cubbaataammu ledo itannohu mayiraati?” yitu. 17 Yesuusino tenne macciishshe togo yiinsa: “Xagisaanchu hasiisannohu dhiwantinoriraati ikkinnina fayyu mannira diꞌꞌikkino. Ani dayommohu keeraano ikkikkinni cubbaataamma woshshammoraati.”
18 Yohaannisi rosaanoranna Farisootaho xoomate rosichi noonsa. Konnira insa Yesuusiwa dagge togo yitusi: “Yohaannisi rosaanonna Farisootu rosaano duucha woyite xoontanna ate rosaano kayinni xoontannokkihu mayiraati?” 19 Yesuusino togo yiinsa: “Mushurrichu ledonsa heeꞌreenna mushurrichu jaalla xoontanno gede assannonsari mayi no? Mushurrichu ledonsa heeꞌri geeshsha insa xooma dihasiissannonsa. 20 Ikkollana mushurricha insawiinni haaꞌne hoollanni yanna dagganno; insa hakkawoyite xoontanno. 21 Akkala uddanora haaro hocco qaaffisiꞌranno manchi dino. Hatto assiro, haaru hocci duuranno daafira uddanote dadhamme lexxitanno. 22 Qoleno, haaro woyine akkalu woyinete ogorira wodhanno manchi dino. Hatto assiro, woyine ogoro dhoossanno, woyineno duꞌnantanno, ogoruno baꞌꞌanno. Hakko daafira, haaro woyine haaru woyinete ogorira worranni.”
23 Yesuusi Sambatunni gidu irshi giddoonni hige saꞌꞌanni heeꞌreenna, ledosi hadhanni noori rosaanosi shoye tattayisse ittu. 24 Konnira Farisootu togo yitusi: “Kune lai! Rosaanokki Sambatunni seeru hoolinore assitanni noohu mayiraati?” 25 Isi kayinni togo yiinsa: “Daawiti sagale hoogeenna isinna ledosi noo manni hudiꞌri woyite maa assinoro horo dinabbabbinoonni? 26 Kakkalaanote roorrichi Abiyaataari daafira kultanno xaggera, Daawiti Maganu minira eꞌꞌe kakkalaano agurranna mittu manchino itara fajjinoonnikkiha qullaawa tima* itinotanna ledosi noo mannirano uyinota dinabbabbinoonni?” 27 Hakkiinni togo yiinsa: “Sambatu kalaqaminohu mannahooti ikkinnina, mannu Sambataho dikalaqamino. 28 Konnira, manchi Beetti Sambataho nafa Mootichaho.”