Yihuda Sokka
1 Yesuusi Kiristoosi borojjichinna Yaaqoobi rodii ani Yihuda, woshshantinoriranna Maganu Anninke baxannonsarira, hattono Yesuusi Kiristoosi ledo mitto ikkitara agarooshshe afidhinorira:
2 Maaro, keerunna baxillu batiꞌroꞌne.
3 Baxantinoonni roduuwa, wonara baalunku afiꞌneemmo gato daafira kiꞌnera borreessate lowo geeshsha hasiꞌroommo; xa kayinni, marro hingannikki garinni qullaawootaho uyinoonni ammanara jawaattine gaarantinanni gede kiꞌne amaalate borreessa hasiissannoeta huwatoommo. 4 Korkaatuno, lowo diri albaanni Qullaawa Borro giddo yoo yinanninsata kulloonnihu mitu manni mereeriꞌnera sure eino; insa Magano waajjitannokkireeti; hattono Maganinke elto kulte mancaꞌꞌa coye* assitannoreetinna woxxinonkehanna isi callu Mootichanke ikkinoha Yesuusi Kiristoosi kaaddannoreeti.
5 Kiꞌne tenne baala seekkitine affinoonniha ikkirono, Yihowa* mannasi Gibitsete gobbanni gatise fushshinotanna gedensoonni qole ammana noonsakkire huninota qaagiissammoꞌnera hasiꞌreemmo. 6 Qoleno isi iima noonsa loosonna heedhannoha malino bayicho agurtino sokkaasine, jawu yoote barri geeshsha hegere usurinni xiꞌmo tunsichi giddo worino. 7 Hatteente gede, Soddoomunna Gomooru hattono qooxeessinsara noo katamma foortanni* akkimale ikkitanno; qoleno maalu yortonsa wonshiꞌrate mannu ikkannokkita ikkitanno; insa hegere giiranni qoricha adhite ninkera qorophishsha ikkitino.
8 Ikkirono, mereeriꞌnera sure einohu kuni manni jawaawurrannoho, manninate* batteessannoho, silxaane mishannoho, ayirrinye afidhinoreno xonannoho. 9 Ikkollana sokkaasinete roorrichi Mikaeeli nafa, Muse reeshshi daafira Daawuloosi ledo yekkeerami yannara “Yihowa seejjohe” yiino ikkinnina, xonote qaale coyiꞌre yoo yaasira dikaino. 10 Kuni manni kayinni afinokki coye baala mishe coyiꞌranno; qoleno heda dandiitannokki saada gede, kalaqamunni* huwattino coye baala assitanno woyite insaneeto batteessitanno.
11 Qaaeeli doogo hadhinona, gara garimmo laꞌukkinni Beleaami faale hadhe soꞌrote giddo ubbinona, hattono Qore gede finqilte coyidhe baꞌinona insara aanneꞌe! 12 Kuni manni roduuwiꞌnera baxille leellishate jiltinoonni jila daye ledoꞌne itanno woyite wayi giddo goꞌlino kinchi gedeeti; goga baꞌe godowa calla duuwa hasidhanno allaalaasineeti; bubbe kawanna kaꞌa qoltannoho xeenu nookki gomichooti; yannasera guma laaltannokkinna lame higge reyitinote* rumushshunkunni buqqinsoonni haqqeeti; 13 haambaa karfa yaannohu wolqaataamu baaru dambali gede, saalsiissanno ikkitonsa xawo fushshidhanno; kawanna kaꞌa raataabbanno beeddaheeti, Maganu hegere geeshsha xiꞌmo tunsichi giddo tuginonsa.
14 Addaaminni kayise lamalki ilama ikkinohu Heenooki, insa daafira togo yee masaalino: “Kuneeti Yihowa lowo kume ikkitannote qullaawa sokkaasinesi ledo dayino; 15 dayinohuno baalunkura yoo yaaraati; hattono Magano waajjitannokki mannooti iso ayirrisa gibbe assitinoha busha coyenna Magano waajjitannokki cubbaataammi isi aana coyidhinoha busha qaale xawo fushsharaati.”
16 Kuri mannooti gunguntannoreeti, heeshshonsa daafira caaccaabbannoreeti, busha yortonsa hoode hadhannoreeti, afiinsara booꞌnate qaali woꞌminoreeti, hattono insaneetira injeessidhanni woloota bokkeessitannoreeti.*
17 Kiꞌne kayinni baxantinoonni roduuwa, Mootichinke Yesuusi Kiristoosi soqqamaasine konni albaanni coyidhinore* qaagge; 18 insa “Goofimarchu yannara busha yortonsa hoode hadhanno haariimaasine kaꞌanno” yitinoꞌne. 19 Kuni manni babbadooshshe kalaqannoho, saadate gede ikkannohonna* qullaawu ayyaani nookkiho. 20 Kiꞌne kayinni baxantinoonni roduuwa, lowo geeshsha qullaawa ikkitino ammanaꞌnenni kiꞌneneeto kaajjishshe;* hattono qullaawu ayyaaninni huuccidhe; 21 togo assitinannihu, hegere heeshsho afidhinanni gede assitannota Mootichinke Yesuusi Kiristoosi maaro agadhitine Maganu baxilli giddonni fultinikki heedhinanni gedeeti. 22 Qoleno, huluullamino manna mararrensa; 23 giirate giddonni hawulukkine fushshitine gatissensa. Woloota maara agurtinoonte; ikkollana, hatto assitinanni woyite qorophanna maalu loosinni ossollitino uddanonsa nafa giwa hasiissannoꞌne.
24 Maganu gufidhinannikki gede agaraꞌneranna minshe nooꞌnekkire asse, lowo hagiirrinni ayirrinyisi albaanni uurrisaꞌnera dandaanno; 25 isi callu Magano ikkinohu Gatisaanchinkera, biꞌre hundano, xaano, hegere hegererano Mootichinke Yesuusi Kiristoosi widoonni ayirrinyu, gaacheenu, wolqanna roorre ikkitosi. Hamiiꞌni.