Yaaqoobi Sokka

5 Kiꞌne dureeyye xa macciishshe; qarru amadaꞌneraatina wiꞌle hattono raarre. 2 Jiroꞌne sholtino; uddanoꞌneno bile* ittino. 3 Culkiꞌnenna birriꞌne cile baino; cile baꞌꞌasino kiꞌne aana naqaashshe ikkitanno; maalaꞌneno ittanno. Duuꞌnitinoonnirino goofimarchu barruwara giirate gede ikkanno.* 4 Kuneeti gateꞌne gide gamba assitino loosaasinera baata gibbinoonni damoozi raaranni no; gideꞌne gamba assitannori kaaꞌlo afiꞌrate raartino raareno Olantote Mootichi Yihowa maccawa iillitino. 5 Uullate aana qawaaxxidhinenna maalu hagiirrira wojji yitinanni heedhinoonni. Gorrinanni barra wodanaꞌne coonsitinoonni. 6 Keeraancho busha assitinoonni; qoleno shitinoonnisi. Isi tenne giwanni noota diaffinoonni?

7 Konnira roduuwa, Mootichu galagale hige ledonke heeꞌra geeshsha cince. Kuneeti baatto loosiꞌranno manchi umihunna gedeni xeeni daa geeshsha cince baattonniha dancha guma agadhanno. 8 Kiꞌneno hattonni cince; Mootichu galagale hige ledonke heeꞌranno yanna gambissino daafira wodanaꞌne kaajjishidhe.

9 Roduuwa, yoo yinanniꞌnekki gede mimmitoho gunguntinoonte.* Kuneeti Daanyu waalchoho uurre no. 10 Roduuwa, qarra adhatenninna cincatenni Yihowa suꞌminni coyidhino masaalaano faale hadhe. 11 Kuneeti cincite kaajjitinore hagiirraammaho* yineemmonsa; Iyyoobi cince kaajjino gara macciishshitinoonni; konninni kainohunni Yihowa uyinosi atoote laꞌinoonni; tennennino Yihowa lowo geeshsha baxillaanchonna maarannoha* ikkinota huwattinoonni.

12 Roduuwaꞌya, baalunkunni aleenni gordunni woy baattotenni xaara woy wole aye xaarono xaara agurre. Hatteentenni “Ee” yitiniro ee, “Deeꞌni” yitiniro deeꞌni ikko; hatto ikka hoogiro kayinni kiꞌne aana yoo yinanni.

13 Kiꞌne giddo qarru amade noosihu no? Huuccatto assiꞌra aguroonke. Hagiidhinohu no? Galatu faarso faarsiꞌro. 14 Kiꞌne giddo dhiwaminohu no? Songote cimeeyye isiwa woshshiꞌro; insano Yihowa suꞌminni zayite buurte huuccatto assitosi. 15 Ammanatenni huuccinanni huuccatto dhiwaminoha* hursitanno; Yihowano kayisannosi. Qoleno cubbo loosinoha ikkiro gatona yinannisi.

16 Hakko daafira, hurtinanni gede cubboꞌne mimmitoho xawissine kulle; hattono mimmitoho huuccatto asse. Keeraanchu manchi eeggifate assanno huuccatto lowo wolqa afidhino.* 17 Eeliyaasi ninke gedee manchooti; ikkollana xeena ganannokki gede eeggifate huucciꞌri yannara, sase dironna lee agana baattote aana xeena diganino. 18 Hakkiinni galagale huuccatto assi; gorduno xeena uyi; baattono guma laashshitu.

19 Roduuwaꞌya, kiꞌne mereerinni mittu manchi halaalu doogonni soꞌre fulironna wolu manchi qolisiro, 20 cubbaataamo soꞌrote doogonni qolannohu aye manchino iso* reyotenni gatisannotanna lowo cubbo diwannota affe.