Yaaqoobi Sokka
2 Roduuwaꞌya, kawaanni ayirrado Mootichanke Yesuusi Kiristoosi ammantine heedhine, kaꞌaanni hiitto mallaaddinanni? 2 Angate culku cuue wodhinohunna biifado uddano uddiꞌrino manchi songoꞌnewa dayironna xurtino uddano uddiꞌrinohu buxichu manchino hakkiira eiro, 3 biifado uddano uddiꞌrino mancho ayirrissine, “Kowiicho dancha darga ofolli” yitine, buxicho kayinni, “Hakka higge uurri,” woy “Kowiicho lekkaꞌyanni kaxxoommowa woroonni ofolli” hiitto yitinanni? 4 Hatto yitinanniha ikkiro, mereeroꞌne badooshshe kalaqqinanni diheedhinoonni? Qoleno busha yoo yitinanni daanyoota diꞌꞌikkitinoonni?
5 Baxantinoonni roduuwaꞌya, macciishshe. Maganu ammanatenni dureeyye ikkitanno gedenna baxxannosirira qaale eino Gashshoote ragidhanno gede alamete illera buxane ikkitinore didoorino? 6 Kiꞌne kayinni buxicho shollishshinoonni. Gadadissannoꞌnerinna goshooshshe yoote minira massitannoꞌneri dureeyye diꞌꞌikkitino? 7 Woshshantinoonniha dancha suꞌma xontannorino diꞌꞌinsaati? 8 Konnira qullaawa borro garinni, “Olliichokki* umikki gede assite baxi” yaannoha mootete seera wonshitinanniha ikkiro, dancha assitinanni heedhinoonni. 9 Mallaada agura hoogginiro kayinni cubbo loossinanni heedhinoonni; seeruno sao assitinoonni yee yoo yaannoꞌne.*
10 Mittu manchi baalanka Seera agadhe heeꞌrenni, mitte hajajo wonshikki gatiro baalanta diiginohu gedeeti. 11 Korkaatuno, “Soorritooti” yiinohu “Shitootino” yiino. Konnira soorra hoogittorono, shiittoro seera diigootto yaate. 12 Wolaphino manni seerinni* yoo yinanninsari coyidhanno garinni coyiꞌranna insa assitannore assa agurtinoonte. 13 Maarannokki manchira maaro nookkiha yoo yinanni. Maaro yoo qeeltanno.
14 Roduuwaꞌya, mittu manchi ammana nooe yiirono, ammanasi kayinni loosunni leellishannokkiha ikkiro ma kaaꞌlitanno? Hatti ammana gatissasira dandiitannoni? 15 Mittu rodii woy mitte rodoo uddidhannorenna barraho hasiissannonsata gari sagale hoogguro, 16 kiꞌne giddonni mittu, “Keerunni hadhe; qiidu ganoonkeꞌne; duubbe” yiinsaro, mannimmansara hasiisannore kayinni aa hooginsaro tini ma kaaꞌlitannonsa? 17 Hakko daafira loosu nookki ammana umise reyitinote.
18 Ikkollana mittu manchi togo yaanno: “Atera ammana noohe; anera loosu nooe. Ammanakki loosu nookkiha leellishie; ani kayinni ammanaꞌya loosiꞌyanni leellisheemmohe.” 19 Mittu Magani noota diammanatto? Ammanakki danchate. Ikkollana agaaninteno ammantanno; qoleno waajjite huxidhanno. 20 Ati hawanyu manchi, ammana loosu nookkiha kaaꞌlitannori nookkita afa hasiꞌratto? 21 Anninke Abirihaami, beettosi Yisaaqi kakkalote darga shiqishihu gedensaanni keeraaꞌminohu diloosunniiti? 22 Ammanasi loosisinni leeltinotanna loosisi ammanasi guuta assinota laitto? 23 Qoleno, “Abirihaami Yihowa ammani; ammanasino keeraanchimmate kiirantusi” yaannohu qullaawa borro qaali woꞌmino; Yihowa jaala yineno woshshinoonnisi.
24 Konnira mittu manchi keeraaꞌmannohu ammanatenni calla ikkikkinni loosunnino ikkinota huwattinanni. 25 Foora mancho* Reaabino sonkeenna marino manna wosinsidhuhunna wole doogo widoonni haꞌranno gede assituhu gedensaanni keeraaꞌmitinohu diloosunniiti? 26 Addanko, foolu* nookki mannimma reyitinota ikkitinonte gede, loosu nookki ammanano reyitinote.