Maatewoosi Wongeella

25 “Qoleno gordu Gashshooti, mushurricha haaˈrara caabbichonsa adhe fulinori tonne seemo gedeeti. 2 Insa giddo onte gowwootaho, onte kayinni busulootaho.* 3 Gowwootu caabbichonsa adhitinoha ikkirono, gooffuro wodhitanno zayite* diadhitino; 4 busulootu kayinni zayite uduunnichoho wodhe caabbichinsa ledo adhe no. 5 Mushurrichu keeshshita baalunku mugiseennansa goxe bai. 6 Hashshu taalootira mannu, ‘Mushurrichu dayinona fultine haadhe!’ yaanni canci. 7 Hakkiinni tonnenti seemo kae caabbichonsa biddi assiˈri. 8 Gowwootu busuloota, ‘Caabbichinke xoaraatina shiima zayiteˈne uuyyenke’ yitu. 9 Busulootuno togo yite qoltu: ‘Kiˈnera uyinummoro ninkera ajjara dandiitanno daafira, hadhine hiranno manniwiinni hidhe.’ 10 Hidhitara hadhe heedheenna, mushurrichu dayi. Qixxaawe noo seemooti isi ledo sargete jila ei; waalchono cunfi. 11 Hakkunni gedensaanni gatino seemooti daye ‘Mooticha, Mooticha, faninke!’ yii. 12 Isino qole, ‘Halaale kuleemmoˈne, ani diegennoommoˈne’ yiinsa.

13 “Konnira, barranna saate affinoonnikki daafira, woˈmanka woyite baqqi yitine agadhe.

14 “Qoleno gordu Gashshooti, borojjootasi woshshe jajjasi insara hadara wodhe wole gobba haˈrara kaino manchi gedeeti. 15 Isi mittu mittunkura dandoosi garinni mittoho onte taalaante,* mittoho lame, mittoho kayinni mitte oye wole gobba haˈri. 16 Onte taalaante adhihu bayichonko haˈre daddale wole onte taalaante tirfi. 17 Lame taalaante adhihuno wole lame taalaante tirfi. 18 Mitte taalaante calla adhi borojjichi kayinni, haˈre mootichisi woxe* baatto ume waami.

19 “Lowo yanna gedensaanni hakko borojjooti mootichi daye insawiinni woxesi gamba assiˈri. 20 Onte taalaante adhino borojjichi wole onte taalaante lede haaˈre shiqe togo yii: ‘Mooticha, ati onte taalaante oottoe; kuneeti ani tirfise onte taalaante lede abboommo.’ 21 Mootichisino togo yiisi: ‘Hashshu worbaˈya, ati danchahonna ammanamootto borojjichooti! Shiimu coyira ammanamoottona, lowo coyira shoomeemmohe. Mootichikki ledo hagiidhi.’ 22 Hakkiinni lame taalaante adhino borojjichi daye togo yii: ‘Mooticha, ati lame taalaante oottoe; kuneeti ani tirfise lame taalaante ledoommo.’ 23 Mootichisino togo yiisi: ‘Hashshu worbaˈya, ati danchahonna ammanamootto borojjichooti! Shiimu coyira ammanamoottona, lowo coyira shoomeemmohe. Mootichikki ledo hagiidhi.’

24 “Jeefote, mitte taalaante adhino borojjichi daye togo yii: ‘Mooticha, ati wixiˈroottokkiha mixxattohanna loosiˈroottokkiha gamba assiˈrattoha kaajjado mancho ikkoottota afoommo. 25 Konnira waajje haˈre taalaantekki baattote giddo waamoommo. Woxikki kuneeti.’ 26 Mootichisino qole togo yiisi: ‘Ati bushu ceeˈmaleessu borojjichi, ane wixiˈrinokkiha mixxannohonna loosiˈrinokkiha gamba assiˈrannoho yiittoena, 27 dayemmo woyite qallonte ledo adheemmo gede woxeˈya* qalamannowa mayira wora giwittoyya?

28 “‘Konnira taalaante isiwiinni haadhine tonne taalaante noohura uuyye. 29 Korkaatuno noosihura baalaho lendannisi; woˈmeno duˈnamannosi. Noosikkihura baalaho kayinni hakkonne noosinka haaˈne hoollanni. 30 Konne tidhinokki borojjicho fushshitine gobba tunsote tugge. Hakkiicho wiˈlona, hinkono gaˈmiˈrona.’

31 “Manchi Beetti sokkaasinesi ledo ayirrinyisinni daanno woyite, ayirrado zuufaanesira ofollanno. 32 Allaalaanchu geˈreewo meuwiinni badannonte gede, isino manna lame gaamo asse badanno. 33 Geˈreewo qiniitesiinni, meˈˈe kayinni gurasiinni qolanno.

34 “Hakkiinni Moote qiniitesiinni noore togo yaanno: ‘Kiˈne Anniˈya maassiˈrinoˈneri amme, alame xintantuhunni* kayise qixxaawinoˈneha gordu Gashshoote ragidhe. 35 Korkaatuno hudiˈreenna itissinoonnie; gooˈreenna hayikkissinoonnie. Wosinimma dayenna wosinsitinoonnie; 36 kalleenna* uddisiissinoonnie. Dhiwameenna towaattinoonnie. Usurameenna xaˈmitinoonnie.’ 37 Hakkiinni keeraano togo yite qoltannosi: ‘Mooticha, hudiˈroottoha mama anfe itinsummohe? Woy gooˈroottoha mama anfe hayikkinsummohe? 38 Wosinimma dayottoha mama anfe wosinsiˈnummohe? Woy kalloottoha mama anfe uddisiinsummohe? 39 Dhiwamoottoha mama anfe laˈnummohe? Woy usuramoottoha mama anfe xaˈminummohe?’ 40 Mooteno qole togo yaannonsa: ‘Halaale yeemmoˈnena, kuri baalunkunni ajjino roduuwiˈya giddo mittoho assitinoonnihu anera assitinoonnihu gedeeti.’

41 “Hakkiinni gurasiinni noore togo yaanno: ‘Kiˈne rumantinoonniri anewiinni faffe; Daawuloosiranna sokkaasinesira qixxeessinoonnita hegere giira eˈe. 42 Korkaatuno hudiˈreenna diˈˈitissinoonnie; gooˈreenna dihayikkissinoonnie. 43 Wosinimma dayeenna diwosinsitinoonnie; kalleenna diuddisiissinoonnie; dhiwameenna dilaˈinoonnie; usurameenna dixaˈmitinoonnie.’ 44 Insano qolte togo yitannosi: ‘Mooticha, hudidheenna woy goodheenna woy wosinimma daggeenna woy kalliteenna woy dhiwanteenna woy usuranteenna mama anfe kaaˈla hoongummohe?’ 45 Hakkiinni isi togo yee qolannonsa: ‘Halaale yeemmoˈnena, kuri baalunkunni ajjinori giddo mittoho assitinikki gattinoonnihu, anera assitinikki gattinoonnihu gedeeti.’ 46 Kuri hegere baowa hadhanno;* keeraano kayinni hegere heeshshowa hadhanno.”