Luqaasi Wongeella

19 Hakkiinni Yesuusi Iyyaarkote katama eꞌꞌe giddoonni hige sai. 2 Hakkiicho Zakkiwoosi yinannihu mittu dureessu manchi no; isi qaraxaasinete roorrichaati. 3 Isi Yesuusi ayetiro laꞌꞌara hasiꞌre no; ikkollana hojja harancho ikkinohuranna mannu batiꞌrino daafira laꞌꞌa didandiino. 4 Yesuusi hakkaanni hige saꞌꞌanni noo daafira, Zakkiwoosi iso laꞌꞌara alba hige dodanni mare mitte odakkote haqqicho giddi. 5 Yesuusi hakkira iilliti iima hige lae, “Zakkiwoosi, techo ate minira dayeemmo daafira rakke dirri” yiisi. 6 Hatte yannara isi rahe dirre Yesuusa hagiidhe wosinsiꞌri. 7 Insa tenne laꞌuti baalunku, “Cubbaataamu manchi minira wosinimmawe mari” yite gururaꞌu. 8 Zakkiwoosi kayinni kae uurre Mootichaho togo yii: “Mooticha, afiꞌroommo jiro taaloote buxanete eemmo; mannuwiinni hanaaqe adhoommore baala shoole ero asse qoleemmo.” 9 Hatte yannara Yesuusi togo yiisi: “Kuni manchino Abirihaami beetto ikkino daafira, techo gato konni minira daggino. 10 Korkaatuno manchi Beetti dayinohu bainoha hasaraatinna gatisaraati.”

11 Insa konne coye macciishshitanni heedheenna Yesuusi wole lawishsha kulinsa; isi konne lawishsha kulinonsahu Yerusaalame iillitanno woyite, Maganu Gashshooti bayichonkonni daannoha* lawinonsa daafiraati. 12 Konnira togo yii: “Mittu mootete beetti mootimma adhe higara xeerto gobba haꞌrara kai. 13 Borojjootisi giddonni tonne woshshe tonne minaane* oye, ‘Daammo geeshsha daddalle’ yiinsa. 14 Gobbasi manni kayinni giwannosi daafira isi haꞌrihu gedensaanni, ‘Kuni manchi ninkera moote ikkara dihasiꞌneemmo’ yite kultara manna soyi.

15 “Yannate gedensaanni isi mootimma adhe higiti, daddalte mageeshsha tirfissinoro afara woxe* uyinsa borojje woshshi. 16 Konnira umihu isiwa shiqe, ‘Mooticha, mitte minaanekkinni tonne minaane tirfisoommo’ yii. 17 Mootichisino togo yiisi: ‘Hashshu worbaꞌya, ati dancha borojjichooti! Shiimurira ammanamootto daafira, tonnu katamira gashshaancho assoommohe.’ 18 Layinkihuno daye, ‘Mooticha, mitte minaanekkinni onte minaane tirfisoommo’ yii. 19 Mootichisi konne borojjichono, ‘Ateno ontu katamira gashshaancho assoommohe’ yiisi. 20 Wolu borojjichi kayinni daye togo yii: ‘Mooticha, hoccunni xaaxe maaxoommo minaanekki kuneeti. 21 Hatto assoommohu kaajjado mancho ikkootto daafira waajjeeti; ati wodhoottokkire adhattohonna wixiꞌroottokkire mixxattoho.’ 22 Mootichisino togo yiisi: ‘Ati bushu borojjichi, coyiꞌrootto qaalinni amadeemmohena, ane wodhinokkire adhannohonna wixiꞌrinokkire mixxannoho kaajjado manchooti yiittoena, 23 dayeemmo woyite qallonte ledo adheemmo gede woxeꞌya* mayira qalamannowa wora giwittoyya?’

24 “Konnira isi hakkiicho uurre noo manna, ‘Minaane isiwiinni haadhine tonne minaane noohura uuyye’ yii. 25 Insa kayinni, ‘Mooticha, isira tonne minaane noosiwe!’ yitu. 26 Mootichuno togo yiinsa: ‘Kuleemmoꞌnena, noosihura baalaho lendannisi; noosikkihura kayinni hakkonne noosinka haaꞌne hoollanni. 27 Qoleno mootensa ikkeemmota gibbinore hakkore diinnaꞌya abbitine albaꞌyaanni shiiyye.’”

28 Yesuusi konne coye coyiꞌre kaihu gedensaanni Yerusaalame haꞌri. 29 Beetefaagenna Biitaaniyu qachi nooha Ejedhete Ilaala iilliti, rosaanosi giddonni lame soyi; 30 togo yiinsa: “Kooee laꞌinanni qacha marre; hakkira martinihu gedensaanni, mittu manchino gulufe egenninokkita usurante noo darmicho affinannina tirtine kawira abbe. 31 Ikkollana aye manchino ‘Mayira tirtinanni?’ yee xaꞌmiꞌnero, ‘Mootichu hasiꞌrino daafiraati’ yiiyye.” 32 Sonkoonniri martanno woyite, baalunku coyi Yesuusi yii gede ikke nooha affu. 33 Ikkollana insa darmicho tirtanni heedheenna ayiddu, “Darmicho mayira tirtinanni heedhinoonni?” yiinsa. 34 Insano, “Mootichu hasiꞌrino daafiraati” yitu. 35 Hakkiinni darmicho Yesuusiwa massitu; uddannansa darmichote badhera worte Yesuusi gulufanno gede assitu.

36 Isi haꞌranni heeꞌreenna uddannansa doogote kartu. 37 Ejedhete Ilaalinni woro qolte haadhe hadhanno doogo iilla rahe heeꞌreenna, batinye rosaano laꞌino maalale baalantenni hagiidhitu; hattono qoonqonsa naggi assite Magano guwissu; 38 togo yitu: “Moote ikke Yihowa suꞌminni daannohu maassaminoho! Gordoho keeru ikko; iimira iimaanni heeꞌrannohura ayirrinyu iillo!” 39 Ikkollana, mannu mereero noo Farisooti giddonni mitu, “Rosiisaancho, rosaanokki hayi yii” yitu. 40 Isi kayinni, “Kuleemmoꞌnena, insa nafa sammi yituro kinna ilillissanno” yii.

41 Yesuusi Yerusaalame iilla rahiti, konne katama lae wiꞌli; 42 togo yii: “Techo keere aannohe coye wodanchoottaro ma danchi bai; xa kayinni kuni coyi illekkinni goꞌlino. 43 Korkaatuno diinnakki qunxoonni mokkollonni huxxa huxxite, raga baala doyissite fula hoꞌlite shetissannohe yanna dagganno. 44 Atenna giddokki noota oosokki uulla tugge buko buluulo assitanno; ate giddo kinchu kinchu aana duunamino gedeenni diagurtanno; korkaatuno, qonqolchine laꞌnahera dangi yanna diwodanchootta.”

45 Hakkiinni Yesuusi qullaawu minira eꞌꞌe hakkiicho hiꞌranni noo manna fushshe shorri; 46 togo yiinsa: “‘Miniꞌya huuccattote mine ikkanno’ yine borreessinoonni; kiꞌne kayinni mulqiꞌraanote goda assitinoonni.”

47 Yesuusi barru baala qullaawu mini giddo rosiisanno. Kakkalaanote roorrooti, seeru rosiisaanonna dagate sooreeyye kayinni iso shitara hassanni no; 48 ikkollana mannu baalu isi yaannore macciishshara mulisinni fafannokki daafira, heddinore assa didandiitino.