Maatewoosi Wongeella
2 Moote Heeroodiisi* waro Yesuusi Yihudu katamira Beeteliheemete ilamihu gedensaanni, ayyaanto* Soojjaatinni kaˈe Yerusaalame dagge, 2 togo yitu: “Soojjaato heeˈne beeddakkosi laˈne ayirrinye uyinammosira* dangoommona, ilamihu Ayihudete moote hiikko no?” 3 Moote Heeroodiisinna Yerusaalamete noo manni baalu tenne macciishshiti lowo geeshsha masi. 4 Mooteno Ayihudennire kakkalaanote roorrootanna Seeru rosiisaano baala gamba asse, Kiristoosi* hiikko ilamannoro xaˈmi. 5 Insano togo yitusi: “Ilamannohu Yihudu katamira Beeteliheemeteeti. Korkaatuno masaalaanchu togo yee borreessino: 6 ‘Ati Yihudu gobbara noottati Beeteliheeme, mannaˈya Israeele allaalanno gashshaanchi atewiinni fulanno daafira, Yihudu gashshaasine mereero horo mishamoottata diˈˈikkatta.’”
7 Hakkiinni Heeroodiisi mannu afikki ayyaanto isiwa woshshe, beeddakko leeltino yanna xaˈme buuxi. 8 Insa togo yee Beeteliheeme soyi: “Hadhine qaaqqo seekkitine hasse; anino mare ayirrinye eemmosi gede affiniro daggine kulleˈˈe.” 9 Ayyaantono moote yiinore macciishshituhu gedensaanni fulte hadhu; hakka woyite Soojjaato heedheenna leeltunsa beeddakko qaaqqu noowa iillite uurrita geeshsha albansaanni hadhanni no. 10 Insano beeddakko uurritinota laˈuti hagiidhite ikkitannota hooggu. 11 Hakkiinni minira eˈe, qaaqqu amasi Maariyaami ledo nooha affe guluphite ayirrinye uyitusi.* Hakkunni gedensaanni ogorransa fante qaaqqoho culka, hixaananna kaarbe* afansha assite uyitusi. 12 Ikkollana, Heeroodiisiwa higgannokki gede Maganu haaqeetenni qorowisiisinonsa daafira, wole doogo amadde gobbansa hadhu.
13 Ayyaanto hadhuhu gedensaanni, Yihowa sokkaasinchi haaqeetenni Yooseefira leelle togo yiisi: “Heeroodiisi qaaqqo hase shaara hedinona, kaˈe qaaqqonna amasi haadhe Gibitse xooqi; ani kulammohe geeshsha hakko heeˈri.” 14 Hakko daafira Yooseefi kae, qaaqqonna qaaqqu ama haaˈre hashsha Gibitse haˈri. 15 Isi Heeroodiisi reya geeshsha hakko heeˈrino. Konni garinni, Yihowa masaalaanchisi widoonni “Beettoˈya Gibitsetenni woshshoommo” yee coyiˈrino qaali woˈmi.
16 Hakkiinni Heeroodiisi ayyaanto dogginosita afe lowo geeshsha hanqi. Isi beeddakko leeltino yanna ayyaanto xaˈme buuxino garinni, manna soye Beeteliheemetenna qooxeessisera noore lame dironna hakkunni woro ikkannonsare labballo qaaqquulle baalanka shiishiishi. 17 Hatte yannara Maganu masaalaanchu Ermiyaasi widoonni togo yee coyiˈrino qaali woˈmi: 18 “Raama katamira wiˈlanna didatto macciishshini. Raaheeli oososera wiˈlitu; oosose gooffino daafira sheshifata hooggu.”
19 Heeroodiisi reyita, Yihowa sokkaasinchi Gibitsete gobbara Yooseefira haaqeetenni leelle 20 togo yiisi: “Qaaqqo shitara hassuri* reyitinona, kaˈe qaaqqonna amasi haadhe Israeelete gobba higi.” 21 Konni daafira, Yooseefi kae qaaqqonna qaaqqu ama haaˈre Israeelete gobba higi. 22 Ikkirono, Arkeloosi annisi Heeroodiisi darga Yihudu gobba gashshe noota macciishshe hakkiira haˈra waajji. Qoleno Maganu haaqeetenni qorowisiisinosi daafira, agure Galiilu gobba haˈri. 23 “Naazireeticha* yinannisi” yine masaalaanote widoonni coyiˈnoonni qaali woˈmanno gede, isi mare Naazireetete katamira heeˈri.