Filimoona Sokka
1 Kiristoosi Yesuusi daafira yee usuramoommohu ani Phaawuloosinna rodiinke Ximootewoosi, banxeemmohu loosu miilinke Filimoonara, 2 rodoonke Afibiyara, ninke ledo Kiristoosi olamaancho ikkinohura Arkipharanna minekki gamba yitanno songora:
3 Maganu Anninkenna Mootichu Yesuusi Kiristoosi eltonna keeri kiꞌnera ikko.
4 Ate daafira huuccatto assummo kiiro Maganoꞌya galaxxeemmo. 5 Ammanakki daafira, hattono Mootichu Yesuusiranna qullaawoota baalaho noohe baxilli daafira macciishshannilla noommo. 6 Atetinna roduuwikki ammana, dancha coye baala afiꞌnoommohu Kiristoosi widoonni ikkinota huwatatto gede assitahera huucceemmo. 7 Rodooꞌya, baxillikki daafira macciishshe lowo hagiirrenna jawaante afiꞌroommo; korkaatuno atenni kainohunni qullaawootu wodani fooliishsho afiꞌrino.
8 Konnira, Kiristoosi soqqamaasincho ikkoommo daafira gara ikkinore assatto gede hajaja dandeemmo. 9 Ikkirono ani Phaawuloosi geercho ikkoommohuranna xa qole Kiristoosi Yesuusira yee usurame noommo daafira, baxillunni huucciꞌreemmohe. 10 Usurame heeꞌre annu gede ikkoommosihu beettiꞌya Anaasmoosi daafira huucciꞌreemmohe. 11 Bashshora isi kaaꞌlannoheri dinooho; xa kayinni ateno aneno kaaꞌlannoha ikkino. 12 Lubbora baxeemmoha iso galagale atewa soommo.
13 Danchu duduwira yee usurame noommo daafira, ate bayicho soqqamannoe gede iso kowiicho gatisiꞌroommoro digiwoommo. 14 Kayinni dancha coye gadachante ikkikkinni umikki baxxe assatto gede, mitto coyeno ati sumuu yiittokki assa dihasiꞌreemmo. 15 Isi shiima yanna* geeshsha atewiinni bae haꞌrinohu, miteekke galagale hige woꞌmanka woyite ateha ikke heeꞌrara ikkara dandaanno. 16 Konni kaꞌa isi borojjichu gede ikkikkinni, borojjichunni roore ayirrado rodookkiiti; ani iso lubbora baxeemmo; borojjichokkinna ammanate rodookki ikkinohura ati isinni roore baxattosi. 17 Hakko daafira, ane jaalikki gede assite kiirittoero, ane haaꞌrattohu gede assite isono anga fante haaꞌrisi. 18 Qoleno, assinohe sao heedhuro woy asalu noosiha ikkiro ani baaxxeemmo. 19 Ani Phaawuloosi tenne angaꞌyanni borreessoommohe: Noosi asale ani baaxxeemmo; qoleno, anera heeshshokki asali nafa nooheta atinni afootto. 20 Konnira rodooꞌya, lamunku Mootichu rosaano ikkinoommo daafira, konni coyira kaaꞌlie ballo; Kiristoosi rosaancho ikkootto daafira wodanaꞌya fooliishshiishie.
21 Tenne borreessoommohehu, konni coyira maahoyye yaattotanna ani yoommoherinni roorsite assattota afoommo daafiraati. 22 Qoleno Maganu huuccattoꞌne macciishsheenna kiꞌnewa galagale dayemmo* yee hexxeemmo daafira, dayummoro galeemmowa qixxeessie.
23 Kiristoosi Yesuusira yee ledoꞌya usuraminohu Ephafira keere soyinohe. 24 Loosu miillaꞌya Maarqoosi, Arisxirookoosi, Deemaasinna Luqaasino keere sokkinohe.
25 Giddoꞌne dancha ikkitino daafira, Mootichu Yesuusi Kiristoosi elto kiꞌne ledo ikkito.