Maatewoosi Wongeella
4 Hakkunni gedensaanni, qullaawu ayyaani Yesuusa halallira haaˈre haˈrisi; hakkiicho Daawuloosi jifisi. 2 Yesuusi 40 barranna 40 hashsha xoomihu gedensaanni hudiˈri. 3 Hakkiinni jifannohu shiqqi yee mare togo yiisi: “Hanni ati Maganu beettootiro, tini kinna daabbo ikkitanno gede hajaji.” 4 Yesuusi kayinni togo yee qoli: “‘Manchu Yihowa afiinni fulanno qaali baalunni ikkinnina, sagaletenni calla heeˈra dihasiissannosi’ yine borreessinoonni.”
5 Hakkiinni Daawuloosi iso Yerusaalamete katama massihu gedensaanni qullaawu mini guunxora* uurrise 6 togo yiisi: “Maganu beetto ikkoottoro, hanni kawiinni eela higge kubbite uwi; korkaatuno togo yine borreessinoonni: ‘Isi ate daafira sokkaasinesi hajajanno,’ hattono ‘Lekkakki kinchu gane gawajjannohekki gede insa angansa woroo worte irkisse kayissannohe.’” 7 Yesuusi qole, “‘Maganokki Yihowa jiffooti’ yineno borreessinoonni” yiisi.
8 Xaano Daawuloosi Yesuusa lowo geeshsha seedino ilaali birxe haaˈre fushshe alamete gashshoote baalanna ayirrinyensa leellishisi. 9 Hakkiinni togo yiisi: “Mitte higge kumbuulte magansiˈrittoero, konne baala coye eemmohe.” 10 Yesuusino togo yiisi: “Koo Sheexaane anewiinni fafi! ‘Maganokki Yihowa calla magansiˈri; qullaawa soqqanshono isira calla shiqishiˈri’ yine borreessinoonnina.” 11 Hakkunni gedensaanni Daawuloosi isiwiinni agure haˈreenna, sokkaasine dagge soqqantusi.
12 Yesuusi Yohaannisi usuraminota macciishshe, kae Galiila haˈri. 13 Naazireetetenni haˈrihu gedensaanni, Zaabilooninna Niftaaleemi qoqqowira baaru* mule Qifirinaahoomi yinanni katamira heeˈra hanafi; 14 kuni ikkinohu masaalaanchu Isayyaasi togo yee coyiˈrinori woˈmanno gedeeti: 15 “Baarunniwa* massitanno doogo mule Yoordaanoosi Lagira widoonni heedhinanniri Zaabilooninna Niftaaleemi gobba, hattono daga heedhanno Galiila! 16 Tunsote heeˈranno manni waraˈa yiino xawaabba lai; reyote caali gobbara heedhannorira xawaabbu xawinsa.” 17 Hatte yannanni kayise Yesuusi, “Gordu Gashshooti gambisinona maaro eˈe” yaanni sabbaka hanafi.
18 Yesuusi Galiilu Baari* muleenni hige saˈˈanni heeˈre, lame roduuwa yaano, Pheexiroosi yiniha Simooninna rodoosi Indiriyaasi afi; insa qulxuˈme woshshaaxxitannore ikkitino daafira woshshaado baaru giddo tugganni no. 19 Hakkiinni Yesuusi, “Ane hoode amme, ani manna woshshaaddinannire asseemmoˈnena” yiinsa. 20 Insano hakkawoyintenni woshshaadonsa agurte hoodesi hadhu. 21 Hakkiinni shiima geeshsha sae, wole lame roduuwa yaano Zebidewoosi beetto Yaaqoobinna rodoosi Yohaannisi afi. Insa yowolote giddo heedhe anninsa Zebidewoosi ledo woshshaadonsa gophitanni noore afe woshshinsa. 22 Insano bayichonko, yowolono annansano hakko agurte hoodesi hadhu.
23 Hakkiinni Yesuusi xaadu minnansara rosiisanninna Maganu Gashshootiha dancha duduwo duduwanni, hattono duuchunku gari dhibbanna xisso hursanni Galiilu gobba baala tuqi. 24 Isi duduwi Sooriyu gobba baala iilli; qoleno mannu, addi addi dhibbinna buutote xisso waaddannonsare, agaaninte amaddinore, hawwunaatu noonsarenna laanshaabbinore baala isiwa abbi; isino hursinsa. 25 Hakko daafira, Galiilunni, Dikaapolisinni,* Yerusaalametenni, Yihudunninna Yordaanoosi Lagi widiidinni dayinohu lowo manni harunsisi.