Maatewoosi Wongeella
15 Hakkiinni, Yerusaalametenni daggino Farisootinna seeru rosiisaano Yesuusiwa shiqqe togo yitu: 2 “Rosaanokki albi manni woga diiggannohu mayiraati? Lawishshaho, insa sagale ittara kaˈanno woyite anga dihayishshidhanno.”*
3 Isino togo yee qolinsa: “Kiˈne wogaˈnera yitine Maganu hajajo diigginannihu mayiraati? 4 Lawishshaho Maganu, ‘Annakkinna amakki ayirrisi,’ hattono ‘Annasi woy amasi xonannoha* shinona’ yiino. 5 Kiˈne kayinni, ‘Ayi manchino annisiranna amasira, “Kiˈne kaaˈleemmokki gede, nooere baala Maganoho aammora qaale eoommo” yiiro, 6 annasi ayirrisate digadadamanno’ yitinanni. Hakko daafira wogaˈnera yitine Maganu qaale diigginanni. 7 Kiˈne lawisiisaano, Isayyaasi kiˈne daafira togo yee masaalasi garaho: 8 ‘Kuni manni suumensanni ayirrisannoe; wodaninsa kayinni anewiinni lowo geeshsha xeertiˈrino. 9 Rosiissannohu mannu wodho ikkino daafira, ane magansiˈransa mulla haafaho.’” 10 Hakkiinni Yesuusi manna isiwa woshshe togo yiinsa: “Macciishshe, macciishshitinannireno wodanche. 11 Mancho batteessannohu afiisira eanno coye diˈˈikkino; batteessannosihu afiisinni fulannoreeti.”
12 Hakkiinni rosaanosi isiwa dagge “Farisootu coyiˈroottore macciishshite koffi yitinota* afootto?” yitusi. 13 Isino togo yee qolinsa: “Iimi Anniˈya kaasinokki kaashshi baalu buqqisamanno. 14 Insa balloota massagaanootina agurre. Ballichu ballicha massagiro lamunku balete ubbanno.” 15 Hakkiinni Pheexiroosi “Lawishshu tiro kulinke” yii. 16 Hatte yannara isi togo yiinsa: “Xaa geeshsha kiˈneno dihuwattinoonni? 17 Afuu giddora eannori baalu godowa dirre hakkiinni fule bale eannota diaffinoonni? 18 Afuunni fulannohu baalu kayinni wodanu giddonni daanno; mancho batteessannohuno hakkonneeti. 19 Lawishshaho, wodanu giddonni busha hedo: shoo, soorro, foorre,* mooru, kapho farciˈranna xono fultanno. 20 Manna batteessannori koreeti; anga hayishshiˈnikkinni* ita kayinni manna dibatteessitanno.”
21 Yesuusi hakkiinni kae Sidooninna Xiroosi qooxeessa haˈri. 22 Hakko qooxeessira heedhannoti mitte Finqe gobba* mancho dagge togo yite woxaratte huuccidhu: “Daawiti Beetto, Mooticha mararie.* Beettoˈya agaaninte amaddeenna shette no.” 23 Isi kayinni mittoreno didawarinose. Hakko daafira rosaanosi isiwa dagge, “Tini mancho hoodenke hadhanni woxarattanni noona haˈrisi ballo” yite huuccitusi. 24 Isino togo yee qoli: “Maganu soyinoehu Israeelete mine baino geˈreewiraati ikkinnina wole mittohono diˈˈikkino.” 25 Ikkollana mancho isiwa dagge guluphite* “Mooticha kaaˈlie!” yitu. 26 Isino, “Oosote sagale haaˈne woshshu buttuliˈra tuga digaraho” yee qoli. 27 Manchono togo yitu: “Mooticha, hattee woyite halaaleho; kayinni woshshu buttuˈlino mootoollansa ittanna giggilinoha itannowe.” 28 Hakkiinni Yesuusi “Ati lowo ammana noohe manchooti; hasiˈroottari ikkohe” yee qolise. Beettoseno hakkawoyintenni hurtu.
29 Yesuusi hakkiinni kae Galiilu baari mulira dayi; ilaalu iimira fulihu gedensaanni hakkiicho ofolli. 30 Hakkiinni lowo manni naafoota, laanshaabbinore, balloota, danqootanna dhiwaminoha wole lowo manna haaˈre Yesuusiwa abbe lekkasi mule wori; isino hursinsa. 31 Mannu danqootu coyidhanna, laanshaabbinori hurtanna, naafootu qaaffanna hattono ballootu ille faˈnantanna lae maalaˈli; Israeelete Maganono ayirrisi.
32 Yesuusi rosaanosi isiwa woshshe togo yiinsa: “Kuni manni ane ledo sase barra keeshshinohuranna itannori noonsakki daafira mararsinoe. Haˈranni doogo shaqqe uwara dandaanno daafira, hudiˈre* heeˈreenna haˈrisa dihasiˈreemmo.” 33 Rosaanosi kayinni togo yitusi: “Konne baddowa kageeshshi manna duushshitanno daabbo mamiinni abbineemmo?” 34 Hatte yannara Yesuusi “Meˈˈe daabbo nooˈne?” yiinsa. Insano “Lamala daabbonna boode shiimaadda qulxuˈme” yitu. 35 Hakkiinni manna uulla ofollanno gede hajajihu gedensaanni, 36 lamalanta daabbonna qulxuˈme haaˈre Magano galate, hiiqqaqqe rosaanosira uyi; rosaanosino mannaho iillishshu. 37 Baalunku itte duubbu; hakkiinni gatino giggilo lamala jajjabba gimboola woˈma gamba assitu. 38 Itino manni meentonna qaaqquulle kiirrikkinni 4,000 labballooti. 39 Jeefote manna haˈrisihu gedensaanni, yowolo gidde Megedooni yinanni qoqqowo dayi.