Luqaasi Wongeella
5 Mitto barra Yesuusi Gensereexi garbi* qaccera uurre Maganu qaale rosiisanna, lowo manni gamba yee macciishshi; mannuno isiwa shiqqi yaate mimmito xiiwanni cifisi. 2 Hatte yannara garbu qaccera lame yowolo uurrite noota lai; qulxuꞌme woshshaaddannori kayinni yowolote aaninni dirrite woshshaadonsa hayishshidhanni no. 3 Yesuusino kuri lame yowolo giddo mitte gidde, yowolote anna Simooni yowolo shiimare garbu giddora qole shiqqi assanno gede kulisi. Hakkiinni yowolote aana ofolle manna rosiisi. 4 Rosiise kaihu gedensaanni Simooni, “Diimenniwa higge shiqqi yiteenna woshshaadoꞌne tuggine woshshaaxxe” yiisi. 5 Simooni kayinni togo yee qoli: “Rosiisaancho, hashsha woꞌma daafurranni galle mitte qulxuꞌmichono diamandoommo; ati yiittoro kayinni woshshaado tugeemmo.” 6 Isi yiinonsa gede assituta, woshshaadonsa nafa tattaꞌa geeshsha lowo qulxuꞌme amaddu. 7 Konnira wole yowolo aana noore loosu miillansa dagge kaaꞌlitannonsa gede qiphi assite woshshidhu; insano dagge lamente yowolora qulxuꞌme wonshiteenna yowolo itantara kaꞌu. 8 Simooni Pheexiroosi tenne laiti Yesuusi lekkara uwe, “Mooticha, ani cubbaataamohona anewiinni hoꞌli” yiisi. 9 Hatto yiinohu isinna ledosi noori amaddino qulxuꞌme batinyi lowo geeshsha dhagge ikkeennansaati; 10 Simooni ledo loossannori Zebidewoosi ooso Yaaqoobinna Yohaannisino lowo geeshsha dhagge assidhu. Yesuusi kayinni Simooni, “Waajjitooti! Xaanni kayisse manna lubbote heeꞌreenna woshshaadattoha ikkatto” yiisi. 11 Konnira, insa yowolonsa baaru qacce qolte baalankare agurte hoodesi hadhu.
12 Wole yannara mittu katamira heeꞌreenna, hakko biso baala dhiigu gudinosi manchi no! Kuni manchi Yesuusa laiti albasiinni uwe, “Mooticha, hasiꞌrittoro hursattoera* dandaattowe” yee huucciꞌri. 13 Yesuusino angasi diriirse mancho amammade, “Hasiꞌreemmona huri!” yiisi. Dhiigu dhibbino bayichonko agurisi. 14 Hakkiinni Yesuusi manchu tenne mittohono kulannokki gede hajajisi; togo yiisi: “Kayinni hadhe huroottota kakkalaanchoho leellishi; kakkalaano huroottota affanno gede, Muse hajajino garinni keeraawate kakkalono shiqishi.” 15 Ikkollana isi duduwi gobba baala tuqi; lowo mannino isi coyiꞌranna macciishshatenna dhibbinsanni hurate gamba yii. 16 Isi kayinni duucha woyite mannu nookkiwa haꞌre huuccatto assiꞌranno.
17 Mitto barra isi rosiisanni heeꞌreenna, Galiilunna Yihudu qachi baalunni hattono Yerusaalametenni daggino Farisootinna Seeru rosiisaano hakko ofolte no; manna hursanno gede kaaꞌlitannositi Yihowa wolqa ledosi no. 18 Hatte yannara mannu mitto laanshaawino mancho reretenni duhe haaꞌre dayi; insa mancho minira eessite Yesuusi albaanni worate woꞌnaaltu. 19 Mannu batiꞌrino daafira eessitanno faro hoogguti minu iimira giddite, mineho iimiido murte mancho reretenni Yesuusira albaanni noo manni mereero dirrissu. 20 Yesuusino ammanansa lae laanshaawino mancho, “Cubbokki maarroonnihe” yiisi. 21 Hakkiinni seeru rosiisaanonna Farisootu, “Magano xonannohu kuni isi ayeti? Magano agurranna cubbo gatona yaara dandaannohu nooni?” yitanni hasaabbu. 22 Yesuusi kayinni heddinore afe togo yee qolinsa: “Wodaniꞌnenni heddinanni heedhinoonniri maati? 23 ‘Cubbokki maarroonnihe’ yaatenna, ‘Kaꞌe haꞌri’ yaate giddo shottannoti hiitteeti? 24 Ikkollana manchi Beettira uullate aana cubbo gatona yaate silxaane noosita affinara hasiꞌreemmo.” Hakkiinni laanshaawino mancho, “Kai, rerekki duqqite minikkira haꞌri yeemmohe” yiisi. 25 Hatte yannara manchu albansaanni kae, goxe noo rere duqqe Magano galatanni minisira haꞌri. 26 Hakkiinni baalunku lowo geeshsha dhagge assidhe Magano galattu; qoleno lowo geeshsha waajjite, “Techo dhagge ikkannore laꞌnoommo!” yitu.
27 Hakkunni gedensaanni Yesuusi fule haꞌranni heeꞌre, Leewi yinanni qaraxaasinchi qaraxo qaranxanni darga ofolle nooha lae, “Hoodeꞌya amo” yiisi. 28 Isino, baalanka coye facci asse agure kae hoodesi haꞌri. 29 Hakkiinni, Leewi minesi Yesuusira lowo jila jili; jilunniwa lowo qaraxaasinenna wolu manni ledonsa itanni no. 30 Hatte yannara Farisootunna insa wido ikkitinori seeru rosiisaano, “Qaraxaasinetenna cubbaataammu ledo ittinannihunna agginannihu mayiraati?” yite rosaanosira gunguntu. 31 Yesuusino togo yee qolinsa: “Xagisaanchu hasiisannohu dhiwantinoriraati ikkinnina fayyu mannira diꞌꞌikkino. 32 Ani dayoommohu cubbaataammu maaro eꞌanno gede woshshammoraati ikkinnina keeraano woshshammora diꞌꞌikkino.”
33 Insano togo yitusi: “Yohaannisi rosaano ganyite xoontanno hattono eeggifatte huuccidhanno; Farisootu rosaanono hatto assitanno; ate rosaano kayinni ittanni agganni no.” 34 Yesuusi kayinni togo yiinsa: “Mushurrichu ledonsa heeꞌreenna mushurrichu jaalla xoontanno gede assa dandiitinannini? 35 Ikkollana mushurricha insawiinni haaꞌne hoollanni yanna dagganno; insa hakkawoyite xoontanno.”
36 Qoleno togo yee mitto lawishsha kulinsa: “Haaro uddanonni hocco mure haaꞌre akkala uddanora qaaffisiꞌranno manchi dino. Hatto assiro haaru hocci tae hoꞌlanno; haaro uddanonni murre haaꞌnoonni hocci akkala uddano ledo mitto gara diꞌꞌikkanno. 37 Qoleno haaro woyine akkalu woyinete ogorira wodhanno manchi dino. Hatto assiro haaro woyine ogoro dhoossanno; woyineno duꞌnantanno; woyine worranni ogorino baꞌꞌanno. 38 Ikkollana haaro woyine haaru woyinete ogorira wora hasiissanno. 39 Akkala woyine age kae haaro woyine hasiꞌrannohu dino; korkaatuno, ‘Akkala woyine kaajjate’ yaanno.”