Umi Teselonqe Sokka

1 Ani Phaawuloosi, Silwaanoosinna* Ximootewoosi, Maganu Annunna Mootichu Yesuusi Kiristoosi ledo mittimma nootera Teselonqe manni songora:

Maganu eltonna keeri kiꞌne ledo ikko.

2 Kiꞌne baalunkura huuccatto assinummo kiiro, woꞌmanka woyite Magano galaxxineemmo; 3 korkaatuno ammanate loosoꞌne, baxillu kakkayiseennaꞌne daafurtinanni daafuronna Mootichanke Yesuusi Kiristoosi hexxaꞌnenni kainohunni kaajjitine uurritinoonnita Maganinkenna Anninke albaanni woꞌmanka woyite qaangeemmo. 4 Maganu baxannoꞌne roduuwa, isi doorinoꞌneta anfoommo; 5 korkaatuno sabbankummoꞌnehu danchu duduwi kiꞌnewa dayinohu, qaalunni calla ikkikkinni wolqatenninna qullaawu ayyaaninni hattono kaajjado ammananniiti; qoleno kiꞌnera yine mereeroꞌne hiittoo manna ikkine heeꞌnoommoro affinoonni. 6 Lowo qarri amadiꞌnerono, qaale qullaawu ayyaaninni afiꞌnanni hagiirrinni adhitinoonni daafira, ninkenna Mootichu faale hadhinoonni; 7 konni daafira Meqedooniyahonna Akaayyaho heedhanno ammanaasine baalantera lawishsha ikkitinoonni.

8 Yihowa* qaali kiꞌnewiinni kae macciishshaminohu Meqedooniyahonna Akaayyaho calla diꞌꞌikkino; hatteentenni, Maganoho nooꞌne ammana wole bayicho baala tuqqino; konnira ninke mittoreno coyiꞌra dihasiissannonke. 9 Korkaatuno umo kiꞌne ledo xaandoommo garanna heeshshonnihunna halaalaanchu Maganira soqqamate kaphu magannaꞌne agurtine Maganunniwa higginoonni gara insa uminsa woꞌmanka woyite coyidhanno; 10 qoleno Maganunniwa higginoonnihu, reyotenni kayisinosihanna daanno hanqinni gatisannonkeha Beettosi yaano Yesuusi gordunni daannota agadhateeti.