Ibiraawootu Sokka

5 Mannu mereerinni dooraminohu mittu mittunku kakkalaanote biili, cubbu daafira afanshanna kakkalo shiqishanno gede insa riqiwe Maganu soqqanshora shoomamanno. 2 Isi umisi laanfe noosiha ikkino daafira, afibbeelootanna sodhannore* mararrotenni* laꞌꞌansara dandaanno; 3 konninni kainohunni mannu cubbira kakkalo shiqishannonte gede, umisi cubbirano shiqisha hasiissannosi.

4 Mittu manchi konne ayirrinye afiꞌrannohu Aarooni gede Maganu woshshisiro callaati ikkinnina umisinni kae diꞌꞌikkino. 5 Kiristoosino umosi kakkalaanote biilo asse isonooto gotti gotti diassino; hatteentenni, “Ati beettoꞌyaati; techo ani atera anna ikkoommohe” yiinosi Magani gotti gotti assinosi. 6 Qoleno wole bayicho, “Ati Melketsedeqi gede hegerera kakkalaanchoho” yiino.

7 Kiristoosi uullate aana noo yannara* lowo geeshsha raaranninna hindiiddiꞌranni reyotenni gatisasira dandaanno Magano hige hige eeggifate huucciꞌrino; Magano waajjannoha ikkino daafira huuccattosino macciishshantinosi. 8 Maganu Beetto ikkirono iillinosi qarrinni hajajama rosino. 9 Guuta ikkihu gedensaanni, hajajantannosiri baalu hegere gato afidhanno gede doogo ikkinonsa; 10 korkaatuno Maganu iso Melketsedeqi gedeeha kakkalaanote biilo asse shoominosi.

11 Isi daafira coyiꞌneemmori lowori no; ikkollana maccaꞌne dunkitino daafira xawise kulate qarraho. 12 Xaa geeshsha woleteemmero rosiisaano ikka hasiissannoꞌneri, Maganunnihu qullaawu qaaliha umi coye galagale hanafotenni kayise rosiisannoꞌneha hasidhinanni; qoleno kaajjado sagale ita agurtine wirro ado hasiꞌrate higginoonni. 13 Ado haqaanqannihu baalu qaaqqo ikkino daafira keeraanchimmate qaali ledo diegennaminoho. 14 Kaajjado sagale hasiissannohu bushanna dancha bada dandaanno gede, wodanchate dandoonsa horoonsiꞌranni qajeelsiꞌrinohura gikki yiino manniraati.