Layinki Yohaannisi Sokka

1 Ani geerchu,* doorantino manchoranna* oososera: Godowinta baxeemmoꞌne; ane calla ikkummokkinni halaale affinori baalu baxxannoꞌne; 2 banxeemmoꞌnehu giddonke noo halaalinni kainohunniiti; kuni halaali ledonke hegerera heeꞌranno. 3 Maganu Annunna Anninke Beetti Yesuusi Kiristoosiwiinni elto, maaronna keere halaalunna baxillu ledo afiꞌneemmo.

4 Oosokki giddonni mitu, Anninkewiinni adhinoommo hajajo garinni halaalu giddo millissanni noota afe lowo geeshsha hagiidhoommo. 5 Hakko daafira dooramootta mancho, mimmito banxeemmo gede huucciꞌreemmohe. (Borreessanni noommohe hajajo haaro ikkitukkinni uminni kayinse adhinoommote.) 6 Qoleno baxilleho yaa, Maganu hajajo garinni millisate. Hajajosino, kiꞌne uminni kayissine macciishshitini garinni baxillunni millissinanni heedhinanni gedeeti. 7 Yesuusi Kiristoosi mancho ikke* dayinota ammantannokkiri lowo soꞌrisiisaano alamete aana kaꞌe no. Togoo manchi soꞌrisiisannohonna Kiristoosi giwannoho.

8 Woꞌma baꞌraarsha adhitinanni gede ikkinnina, daafurroommo coyi baꞌꞌannoꞌnekki gede umiꞌnera qorophe. 9 Kiristoosi rosiwiinni sae haꞌrannohuranna rosisinni kaajje heeꞌrannokkihura baalaho Maganu dinosi. Konni rosinni kaajje heeꞌrannohura kayinni Annuno Beettuno noosi. 10 Aye manchino kiꞌnewa dayironna konne roso haaꞌre daa hoogiro minira eessidhinoonte; keereno haadhinoonte. 11 Korkaatuno, iso keere haaꞌranno manchi bushu loosisira gutamanno.

12 Borreesseemmoꞌnehu lowo coyi nooha ikkirono, woraqatunninna qalametenni borreessa dihasiꞌreemmo; hatteentenni hagiirriꞌne woꞌma ikkanno gede, kiꞌnewa dayenna xaande hasaambeemmo yee hexxeemmo.

13 Doorantino rodookki ooso keere sokkinohe.