Dancha Beettonna Busha Beetto

KUNEETI Qayeelinna Abeeli lai. Xa lamunku lophphitino. Qayeeli baatto loosirannoha ikki. Gide, addi addi laalonna akaakilte loosiranno.

Abeeli gereewo cei. Isino shiimmaadda wiliiꞌle allaaꞌla baxanno. Wiliiꞌluno lophphe jajjabba gereewo ikki; konni daafira Abeelira allaaꞌlanno gereewi mulenni hoshsha ikkisi.

Mitto barra Qayeelinna Abeeli Maganoho kakkalo shiqishshu. Qayeeli baatto loosire fushshirino laalchi giddonni shiqishi. Abeeli kayinni gereewisi giddonni dancha doore shiqishi. Abeelinna kakkalosinni Yihowa hagiidhino. Qayeelinna kakkalosi kayinni dihagiirsiissinosi. Mayiraatiro afootto?

Abeeli kakkalo Qayeelitenni roortino daafira diꞌꞌikkino. Abeeli dancha beetto ikkinohuraati. Isi Yihowano rodoosino baxanno. Qayeeli kayinni bushaho; qoleno rodoosi dibaxanno.

Konni daafira Maganu Qayeeli busha ikkitanni nootto yiisi. Isi kayinni yiinosita macciishsha giwi. Maganu Abeeli roorse baxino daafira Qayeeli lowo geeshsha hanqi. Konni daafira Qayeeli Abeeli, ‘Xawo hinge haꞌno’ yii. Xawoho lamunku calla heedheenna rodoosi Abeeli gani. Lowo geeshsha ganinosi daafira Abeeli reyi. Qayeeli assinori busha coye diꞌꞌikkino?

Abeeli reyiha ikkirono, Maganu xaa geeshsha dihawinosi. Abeeli dancha beettooti; Yihowa qole hattoo manna horonta dihawanno. Konni daafira mitto barra Yihowa Abeeli galagale heeshshote heeꞌranno gede assannosi. Hatte yannara Abeeli horonta direyaanno. Tenne uulla aana hegerera heeꞌranno. Abeeli gedee manni ledo egennama dancha diꞌꞌikkitino?

Ikkollana Qayeeli gedee manni Magano dihagiirsiisanno. Konni daafira Qayeeli rodoosi shiihu gedensaanni, ayiiddisiwiinni baxxe fafo gobba haꞌranno gede asse Maganu qorichchishinosi. Qayeeli wole gobba haꞌri wote, meya roduuwisi giddonni mitte adhe haꞌri; iseno galtesi ikkitu.

Gedensaannino Qayeelinna galtesi ooso iltu. Addaaminna Heewaniti wole labballunna meya oosono kuꞌu kuꞌuyi ledo adhante ooso iltu. Mulenni uullate aana noo manni lowoha ikki. Hanni mitu mitu mannire laꞌno.