Baxxitino Sagale

KUNI mannu uullanni gamba assiꞌranni noohu maatiro afootto? Loja lawannorichchooti. Qoleno waajjoho, shaqqadohonna boolamannoho. Ikkollana loja diꞌꞌikkino; intannireeti.

Isiraeelete gosa Gibitsetenni fultunku aganalla ikkinonsa. Xa insa halallaho no. Halallaho gidu laalannokkihura togo yite gunguntu: ‘Yihowa Gibitsete heeꞌneenna gudoommenkero woyyannonkenka. Hakkiichcho wole nafa hoongiro hasiꞌnummo dani sagale inteemmo.’

Konni daafira Yihowa, ‘Sagale iiminni dirrisammoraati’ yiinsa. Isino yiinonte gede assi. Layinki soodo Isiraeele konne giggilinore waajjore laꞌuti insa insaneewa, ‘Kuni maati?’ yitu.

Museno, ‘Tini Yihowa ittinara uyinoꞌne sagaleeti’ yiinsa. Insano hatte sagale, MENNAHO yitu. Intanni wote daabbote gede ikke coommannoreeti.

Museno Isiraeelete gosara, ‘Mittu mittunku manchi itanno geeshshiha gamba assiꞌra hasiissannosi’ yee kulinsa. Hakko daafira layinki soodo yiinonsa gede assitu. Hakkiinnino arrishsho iibbituta, gamba assinanna gatino menni daaqe goofi.

Muse qoleno, ‘Ayino menna layinki soodora gashshira dihasiissannosi’ yiinsa. Gamu manni kayinni isi yiinota giwi. Mannu giwita mayi ikkiro afitto? Layinki soodo laꞌnanni wote gashshidhino menni daꞌmuule bowi!

Ikkollana, Yihowa lamalate giddo gosa lame ero menna gamba assidhanno gede kulinonsahu mittu barri no. Hakku barri leyikki barraati. Qoleno Yihowa gosa gama menna layinki barrira gashshidhanno gede kulinsa; korkaatuno lamalki barra Yihowa mittoreno didirrisanno. Lamalki barrira gashshidhu wote, mennu didaꞌmuulino; qoleno dibowino! Tinino wole maalaleeti!

Isiraeelete manni halallaho keeshshi diro duuchchanka Yihowa menna itisinonsa.