Yihowa Sokkaasinchi Hiziqiyaasi Gatisino

Asooru olanto, tonne gaꞌre afiꞌrinoha Israeelete gashshoote adhitino. Asooru moote Senaakireemi, lame gaꞌre afiꞌrinoha Yihudu gashshooteno adhara hasiꞌrino. Senaakireemi duucha Yihudu katamma adha hanafi. Kayinni isi roore adha hasiꞌrinohu Yerusaalamete katamaati. Senaakireemi, Yihowa Yerusaalamete katama agare noota diafino.

Yihudu moote Hiziqiyaasi, Senaakireemi Yerusaalame aguranno gede lowo woxe soyinosi. Senaakireemi hakkonne woxe adhino; kayinni isi Yerusaalame qassanno gede wolqaataamma olanto soyino. Asooru olanto Yerusaalamete katamiwa shiqqi yite daggino daafira, hakko heeꞌranno manni lowo geeshsha waajjino. Hakkiinni Hiziqiyaasi mannaho togo yii: ‘Waajjitinoonte. Asooru olanto wolqaataamma ikkiturono, Yihowa ninke insanni roore wolqaataamma assannonke.’

Senaakireemi mannu waajjanno gede assara, soqqamaanchosi Yerusaalamete katama soyino; hakkonne soqqamaancho Rabshaaqu yinanni. Hakku soqqamaanchi katamu xullichira uurre togo yee qoonqosi naggi asse coyiꞌri: ‘Yihowa dikaaꞌlannoꞌne. Hiziqiyaasi dogoonkeꞌne. Ninke anganni gatisannoꞌne magani horo dino.’

Hiziqiyaasi Yihowa, ‘Ma asso?’ yee xaꞌmi. Yihowa togo yee qolino: ‘Asooru moote soyino sokkaanchi coyiꞌrinore macciishshite waajjitooti. Senaakireemi Yerusaalamete katama diadhanno.’ Hakkiinni Senaakireemi Hiziqiyaasira togo yee sokka soyi: ‘Yihowa gatise diafannohena anera anga uyi.’ Hiziqiyaasi togo yee huucciꞌri: ‘Yihowa, mannu baalu ati callu halaalaancho Magano ikkoottota afanno gede, eeggatena gatisinke.’ Yihowa Hiziqiyaasira togo yii: ‘Asooru moote Yerusaalamete katama dieanno. Ani katamaꞌya agareemmo.’

Senaakireemira Yerusaalamete katama adhannoha lawinosi. Kayinni mitto hashsha, Yihowa sokkaasinchosi Asooru olanto noo qacha soyi. Hakku sokkaasinchi 185,000 ikkitannota Asooru olanto shiino! Senaakireemiti wolqaataamma olanto reyite gooffu. Isi qeelame qaesi higino. Yihowa Hiziqiyaasinna Yerusaalamete katama agareemmo yiinonte gede agarino. Ati Yerusaalamete katamira heeꞌroottoha ikkoommero, Yihowa addaxxatto?