Birra

Hajajama qarra ikkite egentinohe? Moote Daawitira hajajama qarra ikkitinosi woyiti no; hakko daafira isi “Maahoyyete ayyaaninni irkisie” yee Magano huucciꞌrino. (Far. 51:12) Daawiti Yihowa baxanno. Ikkirono mito woyite Daawitira hajajama qarra ikkitinosi; ninkerano hajajama qarra ikkitannonke woyiti no. Mayira? Umihunni, hajajama qarra ikkitannonke gede assanno cubbo ragiꞌnoommo. Layinkihunni, Sheexaanu woꞌmanka woyite isinte gede finqilleemmo gede assankera woꞌnaalanno. (2 Qor. 11:3) Sayikkihunni, heeꞌnoommohu finqilanno manni batiꞌrino alameraati; kuni akati ‘xa Maganoho hajajantannokkire gashshe noo ayyaanaati.’ (Efe. 2:2) Cubbo loonseemmo gede assitannonke dooꞌꞌo calla ikkikkinni Daawuloosinna tini alame hajajammeemmokki gede assate xixxiibbannonketano gargadhate sharrama hasiissannonke. Yihowaranna isi silxaane uyinonsarira hajajamate sharrama hasiissannonke. w23.10 6 guf. 1

Yesuusi maalaletenni waa woyinete xajjera qole soorrinota kultanno xaggenni maa ronseemmo? Umonke heeshshi assa hasiissannota ronseemmo. Yesuusi loosino maalalenni dinaaxxino; isi assinore kule horo dinaaxxino. Hatteentenni isi umosi heeshshi asse duucha hige ayirrinye baala Annisira uyino. (Yoh. 5:19, 30; 8:28) Ninkeno Yesuusi lawishsha harunsine umonke heeshshi assineemmoha ikkiro, assinoommore kulle dinaaxxineemmo. Uminkenni naaxxantenni, isira soqqamate qoosso uyinonkeha Maganonke ayirrinso. (Erm. 9:23, 24) Ayirrinyu hasiisannohu isiraati. Hige Yihowa kaaꞌlo nookkiha ninke uminkenni assa dandiineemmori mayi no? (1 Qor. 1:26-31) Umonke heeshshi assineemmore ikkinummoro, wolootaho assinoommohu danchu coyiꞌra ninke galantankera dihasiꞌneemmo. Yihowa assineemmore laꞌꞌannotanna naadannota afanke harshammi assitannonke. (Maatewoosi 6:2-4 ledo heewisiisi; Ibi. 13:16) Yesuusi lawishsha harunsine umonke heeshshi assineemmore ikkinummoro Yihowa hagiidhannoti dihuluullissannote.—1 Phe. 5:6. w23.04 4 guf. 9; 5 guf. 11-12

Soqqamaasinchu Phaawuloosi qullaawu ayyaani massageennasi Kiristaanu wolootu hasatto balaxisiisanno gede jawaachishino. Gambooshshu yannara tenne amaale harunsa dandiineemmohu hiittoonniiti? Wolootuno ninkente gede gambooshshunniwa dawaro qola hasidhannota dea dihasiissannonke. Hanni tenne hedi. Jaallakki ledo hasaawatto woyite insara hasaabbanno faro uyittokkinni sammi yite hasaawatto? Dihasaawatto! Insano hasaabbara hasiꞌratto. Hatteente gede dandaami deerrinni gambooshshunniwa batinyu manni dawaro qolara hasiꞌneemmo. Isinni ammanate roduuwanke jawaachinsheemmote qara doogga giddo mitte insa ammanansa daafira coyidhanno faro afidhanno gede assate. (1 Qor. 10:24) Konnira harancho dawaro qolate sharrami; tini wolootu dawaro qoltanno yanna heedhanno gede assitanno. Qolatto dawaro harancho ikkituro nafa duucha hedo coyidhooti. Gufote giddo noore baalankare coyiꞌrittoro, wolootu qoltannori diheeꞌranno. w23.04 22-23 guf. 11-13

Roorenkanni sabbakate looso loonse woꞌmanka woyite woloota kaaꞌla lowo geeshsha hasiissannota ikkitinota qaaga hasiissannonke. Sabbankeemmo woyite duuchunku gari mannira farciꞌrate sharrama hasiissannonke. Sabbankeemmo woyite addi addi ammaꞌno, akatinna budi noonsa manninni xaandeemmo. Soqqamaasinchu Phaawuloosi duuchunku gari mannira sabbakino; ninkeno isi lawishsha harunsa dandiineemmo. Yesuusi Phaawuloosi ‘dagate soqqamaasincho’ asse shoominosi. (Rom. 11:13) Hakko daafira Phaawuloosi Ayihudootaho, Giriikootaho, lowo roso rosino mannira, loosiꞌre galino mannira, lowo silxaane noonsariranna mootoollate sabbakino. Phaawuloosi duuchunku gari mannira wodanaho coanno garinni sabbakate ‘baalunku mannira baalankare ikkino.’ (1 Qor. 9:19-22) Isi sabbakanno manni budi, lophino garinna ammaꞌnonsa hiittootero hedino; tini sabbakanno gara biddi assiꞌranno gede kaaꞌlitinosi. Ninkeno duuchunku gari mannira sabbakate dandoonke woyyeessiꞌneemmohanna mitto mittonka mancho kaaꞌlanno garinni sabbankeemmohu hiittoonniitiro hendeemmoha ikkiro, dancha guma afiꞌnammora dandiineemmo. w23.07 23 guf. 11-12

Joongillu jawaantete ikkinnina laanfe diꞌꞌikkino. Qarru yannara wodanaaꞌmate jawaante hasiissanno. Joongillu qullaawu ‘ayyaani laalo’ widooti. (Gal. 5:22, 23) “Joongille” yine tirroonniha Giriikete afii qaale leenjinshoonni farashsho kulate horoonsiꞌnoonni woyitino no. Hanni leenjinshoonni farashsho hedi. Kuni farashshi xa jooga ikkinoha ikkirono wolqasi noo gedeennilla no. Ninke mannu ooso jooguulle ikkine heeꞌnenni worbuulle ikka dandiineemmohu hiittoonniitiyya? Ninke uminke wolqanni diꞌꞌikkino. Kuni kaajju akati heeꞌrannonke gede assiꞌrate kaaꞌlannonkeha qullaawa ayyaana afiꞌrate huuccatto assiꞌra hasiissannonke. Jooguulle ikka dandiinannita leellishannohu batinyu woꞌnaalshi no. Batinyu ammanate roduuwinke mannu hanqisinsa woyite jooguulle ikkansa leellishshino; tini qolte, mannu Yihowa Farciꞌraasine daafira danchare hedanno gede assitino.—2 Xim. 2:24, 25. w23.09 15 guf. 3

Soqqamaasinchu Yohaannisi 24 geerri iima Yihowa magansidhanna leellishshannota dhagge ikkitanno ajuuja laino. Insa “Ayirrinyu, guweenyunna wolqa ikkitohe!” yitanni Magano guwissino. (Aju. 4:10, 11) Ammanantino sokkaasineno Yihowa guwissannonna ayirrissanno gede assannonsahu duuchu korkaati noonsa. Insa iima ledosi heedhanno daafira Yihowa seekkite affino. Insa isi kalaqinore laꞌe akattasi huwata dandiitanno. Qoleno Yihowa assinore laꞌꞌansa iso guwissanno gede assitannonsa. (Iyo. 38:4-7) Ninkeno huuccatto assiꞌneemmo woyite, Yihowa banxeemmohunna ayirrinseemmohu mayiraatiro kulle iso guwisa dandiineemmo. Qullaawa Maxaafa nabbabbinanninna xiinxallitinanni woyite, kiꞌne roore baxissannoꞌneta Yihowa akatta hedate woꞌnaalle. (Iyo. 37:23; Rom. 11:33) Hakkiinni tenne akatta daafira mayi macciishshamannoꞌnero Yihowara kulle. Qoleno Yihowa ninkeranna ammanate roduuwinkera assinore kulle iso guwisa dandiineemmo.—1 Sam. 2:1, 2. w23.05 3-4 guf. 6-7

Maganu manni 1919nni Bayira Baabiloone giddonni fulino. Hakko diro “ammanaminohunna wodanaamu borojjichi” shoomamino; hakkiinni kuni borojjichi suwashshu wodani noonsa manni ‘Qullaawa Doogora’ haꞌranno gede kaaꞌla hanafino. (Mat. 24:45-47; Isa. 35:8) Doogo qixxeessate konni albaanni wolootu loossino loosi jawa doogora haꞌra hanafino manni albinni roore Yihowanna isi hedinori daafira rosanno gede kaaꞌlino. (Law. 4:18) Qoleno kuni manni heeshshonsa Yihowa biddishshi ledo sumuu yitanno gede assiꞌra dandiino. Yihowa mannisi biddi assiꞌra hasiissannonsa coye baala mitte hige biddi assiꞌra hasiissannonsa diyiino. Hatteentenni isi mannasi gale hose xalashshino. Assineemmo coyi baalunkunni Maganonke tashshi assineemmo woyite lowo geeshsha hagiidhineemmo! Baalanta doogo ganyine haaroonsa hasiissanno. Rooru manni Bayira Baabiloone giddonni fulanno gede kaaꞌlate 1919nni hananfoonniha ‘Qullaawa Doogo’ looso loonsanni heeꞌnoonni. w23.05 17 guf. 15; 19 guf. 16

Aliidi Bisi umisi Aliidi Bisi Komite giddo kaaꞌlaano ikkite addi addi looso loossanno roduuwa qajeelsanni keeshshino. Kuri kaaꞌlaano ikkite soqqantanno roduuwi uyinoonninsaha shota ikkinokki looso ammanante loossanni no. Insa woꞌmanka woyite Kiristoosi geꞌreewo towaatate dancha gede qixxaabbino. Uullate aana gattinori buurantinori quuxxote qarri jeefora iimira hadhe gooffanno woyite, Yihowa halaalunni magansiꞌranno manni uullate aana heeꞌranno. Hatte yannarano massagannonkehu Yesuusi Kiristoosa ikkino daafira, uullate aana noohu Yihowa manni ammaname iso magansiꞌra diaguranno. Hige hatte yannara Maagoogi Googi yaano buusantino daga Maganu manna siꞌannota anfoommo. (Hiz. 38:18-20) Ikkollana kuni siꞌꞌi mulenni uurranno; hattono Yihowa manni iso magansiꞌrannokki gede diassanno. Yihowa mannasi gatisannoti egennantinote! Soqqamaasinchu Yohaannisi Kiristoosiha wolu geꞌreewi wido ikkinoha “lowo manna” ajuujatenni laino. Yohaannisira kuni lowo manni ‘lowo qarra qeele fule dayinoha’ ikkinota kulloonnisi. (Aju. 7:9, 14) Addanko Yihowa insa gatisannonsa! w24.02 5-6 guf. 13-14

Qullaawa ayyaana afiꞌrate maa assa dandiineemmo? Huuccatto assiꞌra, qullaawu ayyaaninni borreessinoonniha Maganu Qaale xiinxallanna ayyaanisinni massagantannote Yihowa dirijjite wido ikka dandiineemmo. Togo assa ‘qullaawu ayyaani laalo’ wido ikkitino akatta heedhannonke gede kaaꞌlitannonke. (Gal. 5:22, 23) Maganu qullaawa ayyaanasi aannohu gara ikkinore heddannoriranna danchu amanyooti noonsarira callaati. Isi gara ikkinokkire hendeemmonna assineemmoha ikkiro qullaawa ayyaanasi diaannonke. (1 Tes. 4:7, 8) Woꞌmanka woyite qullaawa ayyaana afiꞌrate, ‘himanano minsheemmokki gede’ qoropha hasiissannonke. (1 Tes. 5:20) Konni qummeeshshira ‘himana’ yinoonnihu Maganu ayyaanisi widoonni kulannonke sokkaati; tenne sokka giddo gama Yihowa barri daafiranna heeꞌnoommohu gooffe daggino yanna giddo ikkinota kultannote. Yihowa barri woy Armagedooni ninke yannara didaanno yine heda dihasiissannonke. Hatteentenni danchu amanyooti heeꞌrannonke gede assiꞌnenna ‘Magano lawatenni heeꞌneemmota’ leellishannore assine Yihowa barri gambisinohu gede assine heda dandiineemmo.—2 Phe. 3:11, 12. w23.06 12 guf. 13-14

Elektirooniksete uduunnicho horoonsiꞌnanna teeda baꞌino misilla hedeweelcho dagguro ninke Kiristaanu ma assa hasiissannonke? Bayichonkonni tenne misile laꞌꞌa agura hasiissannonke. Noonketi muxxe jiro Yihowa ledo noonke jaalooma ikkitinota qaaganke tenne assate kaaꞌlitankera dandiitanno. Teeda baꞌinokkiti mite misilla nafa gara ikkinokkire hendeemmo gede assitankera dandiitanno. Togoo misilla laꞌꞌa hasiissannonkekkihu mayiraati? Korkaatuno foorrete daafira hendeemmo gede assannonkeha shiima coye nafa assa dihasiꞌneemmo. (Mat. 5:28, 29) Tayilaandete heeꞌrannohu Deevidi yinannihu songote cimeessi togo yiino: “Aneneeto togo yee xaꞌmeemmo: ‘Laeemmo misilla teeda baꞌinota ikka hoogguro nafa togoo misilla duucha hige laꞌꞌaꞌya Yihowa hagiirsiissanno?’ Konni garinni hedaꞌya gara ikkinore asseemmo gede kaaꞌlitinoe.” Yihowa dadillisannoha aye coyeno assineemmokki gede waajja, gara ikkinore assineemmo gede kaaꞌlitannonke. “Kaaliiqa waajja egennote umoho.” w23.06 23 guf. 12-13

Konni qummeeshshira ‘mine’ yinoonnihu songuwa kulate ikkara dandaanno. Yihowa ammanate roduuwinke ledo isira mittimmatenni soqqama agurreemmokkiha ikkiro, bayiru qarri yannara agarannonketa kule qaale eino. Hakko daafira roduuwinke laanfe agurre saꞌꞌa calla ikkikkinni insa godowinta baxate sharrama hasiissannonke. Ganteemmohu hatto assinummoro callaati! “Jawu [Yihowa] barri” mannu baalu lowo geeshsha qarramanno gede assanno. (Sof. 1:14, 15) Yihowa mannirano qarru iillannonsa. Kayinni xaanni qixxaambeemmoha ikkiro, wodanaaꞌmine heeꞌranna woloota kaaꞌla dandiineemmo. Iillannonke qarra baala cincine saꞌneemmo. Ammanate roduuwinke qarrantanno woyite insa mararreemmota leellishatenna hasiisannonsare assine kaaꞌlate dandiinummore baala assineemmo. Qoleno xaanni ammanate roduuwanke baxa ronsummoro albillitte insa baxa qarra diꞌꞌikkitannonke. Hatto ikkiro, danonna qarra horo qaangannikki alamera Yihowa hegere heeshsho oye baꞌraasannonke.—Isa. 65:17. w23.07 7 guf. 16-17

Maganu Qaali ammanamino manna duucha woyite worbuullu gede asse kulanno. Ikkirono insa giddo roore jawaatoota ikkitinorira nafa jawaatoota ikkitinoha lawinonsakki woyiti no. Lawishshaho Moote Daawiti “jawaatu ilaali gede” ikkinohu gede asse hedino woyiti no; wole yannara kayinni ‘masino.’ (Far. 30:7) Saamsooni Maganu ayyaani wolqa oyennasi wolu manninni roore wolqaataamo ikkinoha ikkirono, Maganu ayyaani kaaꞌla hoogisiro kayinni ‘wolqasi baꞌeenna wolu manni gedeeha ikkannota’ afino. (Eje. 14:5, 6; 16:17) Kuri ammanantino mannooti jawaatoota ikkitinohu Yihowa wolqa uyinonsa daafira callaati. Soqqamaasinchu Phaawuloosino Yihowa aanno wolqa hasiissannosita huwatino. (2 Qor. 12:9, 10) Isono dhibbu waadinosi. (Gal. 4:13, 14) Isira gara ikkinore assa qarra ikkitinosi woyiti no. (Rom. 7:18, 19) Qoleno isi yaadinonna waajjino woyiti no. (2 Qor. 1:8, 9) Ikkirono Phaawuloosi wolqiweeli woyite wolqa afiꞌrino. Hiittoonni? Yihowa Phaawuloosira wolqa uyinosi. Hattono jawaata assinosi. w23.10 12 guf. 1-2

Mito woyite, ditidhinoommoreeti yine hendanni qarrammeemmoha ikkiro, Yihowa umisi isiwa abbinonketa qaaga hasiissannonke. (Yoh. 6:44) Isi ninke nafa anfoommokkiha dancha akatanke afanno; hattono wodananke laꞌꞌanno. (2 Dud. 6:30) Hakko daafira Yihowa ninke isira muxxe ikkinoommota kulannonke woyite ammana dandiineemmo. (Yoh. 3:19, 20) Ninke giddo mitu halaale ronsammora albaanni loonsoommo cubbi xaa geeshsha ninkeneeto bushiinsheemmo gede assannonkeha ikkara dandaanno. (1 Phe. 4:3) Yihowara ammanante soqqantannore nafa laanfensa waaddannonsa. Tiiꞌꞌikki bushiishannohe? Hatto ikkiro, ammanantinore Yihowa soqqamaanono togoo hedo waaddinonsata afakki sheshifachishshannohe. Lawishshaho soqqamaasinchu Phaawuloosi laanfesi hede, “Ani hiittoo qarraataamooti!” yiino. (Rom. 7:24) Hige Phaawuloosi cubbisira maaro eino hattono cuuamino. Ikkirono isi ‘soqqamaasine duuchantera woriidihanna cubbaataammu baalunkunni roore cubbaataamo’ ikkinota coyiꞌrino.—1 Qor. 15:9; 1 Xim. 1:15. w24.03 27 guf. 5-6

Moote Iyoaasi doodhinohu bushu doorshinni, Yihowa baxxannorenna iso hagiirsiisa hasidhanno jaalla doodha hasiissannonketa ronseemmo. Darawonke calla jaalla assiꞌra dihasiissannonke. Yoodahe Iyoaasi diro lowo geeshsha roorannota qaango. Jaalla doodhate daafira ateneeto togo yite xaꞌmi: ‘Doodheemmo jaalla ammanaꞌya kaajjitanno gede kaaꞌlitannoereeti? Maganu seeri garinni heeꞌreemmo gede jawaachishshannoe? Yihowanna halaalisi daafira hasaabbannoreeti? Insa Maganu biddishsha ayirrissannota leellishshanno? Ani macciishsha hasiꞌreemmore kultannoereetinso soꞌreemmo woyite worbimmatenni seejjitannoereeti?’ (Law. 27:5, 6, 17) Jaallakki Yihowa baxxannokkire ikkituro insa ledo jaalooma agura hasiissannohe. Yihowa baxxannore ikkituro kayinni insawa aana agurtooti; insa kaaꞌlitannohe!—Law. 13:20. w23.09 9-10 guf. 6-7

Yihowa “Albihunna Gedensihu aneeti” yaasi, isi mitto coye hanafihu gedensaanni hakku coyi danchu garinni gumulamanno gede assannota leellishshanno. Yihowa Addaaminna Heewani kalaqihu gedensaanni, togo yiinonsa: “Ille ilamme, sirchiꞌne baatto woꞌmo; baattono kiꞌne gashshitinannita ikkito.” (Kal. 1:28) Hatte yannara Yihowa ‘Albiha’ ikkinota coyiꞌrinohu gedeeti. Isi assara hedinore xawise kulino: Guutanna hajajantannore ikkitinori Addaaminna Heewani ooso uulla woꞌmitannotinna uulla Gannate assitanno yanna daggannota leellishannore coyiꞌrino. Albillitte Yihowa hedinori woꞌmanno woyite isi ‘Gedensiha’ ikkinota coyiꞌrinohu gedeeti. Yihowa “gordonna baatto” hattono “giddose noore baala” kalaqihu gedensaanni isi hedinori woꞌmannota leellishannore coyiꞌrino. Isi mannu oosoranna uullate hedinore wonshikki gatannokkita buuxisino. Yihowa hedinori konni lamalki barri jeefora woꞌmunni woꞌma gumulamanno.—Kal. 2:1-3. w23.11 5 guf. 13-14

Baabiloonetenni kaꞌne Israeele haꞌnanni doogo lowo geeshsha qarrissannote; qoleno shoolu agani geeshsha haꞌrissanno; ikkirono Yihowa Ayihude gobbansa higgannokki gede guficho ikkannonsaha aye coyeno hoolannonsata kule qaale einonsa. Ammanaminohu Ayihudete manni afiꞌranno atooti, Israeelete gobba higate yee aguranno coye baala roorannota seekke afino. Insa afidhannohu baalunkunni rooranno atooti magansiꞌransa ledo xaadooshshe afiꞌrinoho. Baabiloonete Yihowahu qullaawu mini dino. Hakkiicho Israeele Muse Seeri hajajanno garinni kakkalo shiqishshannohu kakkalote bayichi dino; hattono tenne kakkalo shiqishate qinaawino garinni soqqantanno kakkalaasine dino. Qoleno hakkiicho heeꞌrannohu Yihowanna biddishshasi ayirrisannokkihu kaphu maganna magansiꞌranno manni Yihowa manna kiiro rooranno. Hakko daafira Magano waajjannohu lowo kume ikkannohu Ayihudete manni, gobbansa hige halaalu magansiꞌra wirro xintate quqquxamino. w23.05 14-15 guf. 3-4

Woꞌmanka woyite ‘xawaabbu giddo heeꞌranno manni gede ikkine heeꞌrate’ Maganunnihu qullaawu ayyaani kaaꞌlo hasiissannonke. Mayira? Korkaatuno, tenne amanyootunni maaeeltino alame giddo xuru nookkire ikkine heeꞌra shota diꞌꞌikkitino. (1 Tes. 4:3-5, 7, 8) Qullaawu ayyaani alamete hedo lawishshaho mannu hedonna Yihowa hedo ledo sumuu yitannokki hedo gargadhineemmo gede kaaꞌlannonke. Qoleno qullaawu ayyaani ‘addi addi danchummanna keeraanchimma’ assineemmo gede kaaꞌlannonke. (Efe. 5:9) Qullaawa ayyaana afiꞌneemmoti mitte doogo huuccatto assiꞌrate. Yesuusi Yihowa ‘huuccidhannosirira qullaawa ayyaana aannonsata’ coyiꞌrino. (Luq. 11:13) Qoleno gambooshshunniwa mitteenni Yihowa guwisiꞌneemmo woyite qullaawa ayyaana afiꞌneemmo. (Efe. 5:19, 20) Maganunnihu qullaawu ayyaani Yihowa hagiirsiisanno garinni heeꞌneemmo gedeno kaaꞌlannonke. w24.03 23-24 guf. 13-15

Albinni roore cincitinannire ikka hasiissannoꞌne? Hatto ikkiro, huuccatto assidhe. Cinca ayyaanu laalo widooti. (Gal. 5:22, 23) Hakko daafira qullaawa ayyaana afiꞌratenna qullaawu ayyaani laalo wido ikkitino akatta heedhannonke gede kaaꞌlankera Yihowa huucciꞌra dandiineemmo. Cinca qarra ikkitannonke gede assanno fonqoli iillinkero cincineemmo gede kaaꞌlannonkeha qullaawa ayyaanasi aannonke gede agurrummokkinni Yihowa ‘huucciꞌra’ hasiissannonke. (Luq. 11:13) Qoleno Yihowa mitto coye isi laꞌꞌanno garinni laꞌneemmo gede kaaꞌlankera huucciꞌra dandiineemmo. Huuccatto assiꞌnummohu gedensaanni barru baala cincineemmore ikkate dandiinummore baala assa hasiissannonke. Albinni roore cincineemmore ikkate huuccatto assiꞌneemmohanna konne akata leellishate sharrammeemmoha ikkiro, konni albaanni cincineemmokkire ikkinummoro nafa Yihowa woꞌmanka woyite cincineemmore ikkineemmo gede kaaꞌlannonke. Qullaawu Maxaafi giddo kulloonni manni lawishsha hiincano kaaꞌlitannonke. Qullaawu Maxaafi giddo cincatenni lawishsha ikkannoha batinye manna kulloonni. Konni manni xagge hiincine cincineemmore ikkinoommota leellinsheemmo doogga rosa dandiineemmo. w23.08 22 guf. 10-11

Yesuusi soqqamaasinchu Pheexiroosira Yihowa kaaꞌlannosita buuxisinosi. Reyotenni kainohu Yesuusi, Pheexiroosinna wole soqqamaasine xaano maalaletenni qulxuꞌme amaddanno gede asse kaaꞌlinonsa. (Yoh. 21:4-6) Tini maalale Pheexiroosi, Yihowa hasiisannosiha maalaamittete coye aannosita buuxanno gede assitinositi dihuluullissannote. Hakkiinni Pheexiroosi, Yesuusi ‘balaxxe Maganu Gashshoote’ hasidhannorira Yihowa hasiisannonsare wonshannonsata coyiꞌrino hedo qaaginoha ikkara dandaanno. (Mat. 6:33) Kuni baalu Pheexiroosi qulxuꞌme woshshaadate looso ikkikkinni sabbakate looso balaxisiisanno gede kaaꞌlinosi. Isi 33 M.D. Phenxeqosxete ayyaani barra worbimmatenni sabbakkino; tini lowo kume ikkanno manni dancha duduwo macciishshe adhanno gede kaaꞌlitino. (Soq. 2:14, 37-41) Pheexiroosi hakkuyi gedensaanni Samaariyu manninna Dagate wido ikkino manni, Kiristoosi daafira rosannonna isi harunsaano ikkanno gede kaaꞌlino. (Soq. 8:14-17; 10:44-48) Yihowa Pheexiroosi horoonsiꞌre duuchunku gari manni Kiristaanu songo daanno gede assino. w23.09 20 guf. 1; 23 guf. 11

Baabiloonootu Yerusaalame huntuhunni mitu lamu diri gedensaanni, Baabiloonete Moote Naabukadanatsoori mitte jawa misile haaqeetenni laino; tini haaqee lowo geeshsha waajjishshannote. Isi haaqiiꞌrino haaqeenna tirose kula hoogguro hayyoolle baalanta shaannota kule waajjishiishino; hatto ikkiro Daanieelino shinanni yaate. (Dan. 2:3-5) Daanieeli rahe mittore assa hasiissinosi; hatto ikka hoogiro lowo manna shinanni. Isi “hakkawoyintenni eꞌꞌe haaqee tirate shiima yanna uyinannisi gede moote [huucciꞌrino].” (Dan. 2:16) Tenne assate worba ikkanna ammana hasiissanno. Qullaawu Maxaafi Daanieeli hakkuyira albaanni haaqee tire egenninota dikulanno. Isi jaallasi “gordu Magani marare maaxamino coye xawisansara huuccidhanno gede” kulinonsa. (Dan. 2:18) Yihowano huuccattonsara dawaro qolino. Maganu kaaꞌlinosi daafira Daanieeli Naabukadanatsoori haaqiiꞌrino haaqee tiro kulino. Daanieelinna jaallasino dishinoonni. w23.08 3 guf. 4

Cincineemmore ikkinummoro afiꞌneemmo horo hedi. Cincineemmore ikkinummoro hagiirraammanna wodanaaꞌmineemmore ikkineemmo. Cincineemmore ikkanke surrenkeranna ordu fayyimmankera kaaꞌlitannonke. Woloota cincineemmoha ikkiro insa ledo dancha aante heedhannonke. Songote giddo albinni roore mittimma heedhanno gede assineemmo. Mittu manchi hanqisannonke woyite hanqoho muddammeemmokkire ikkanke coyi roore bushannokki gede assitanno. (Far. 37:8; Law. 14:29) Baalunkunni roore iimi Anninke lawishsha harunsineemmo hattono albinni roore isiwa shinqeemmo. Cinca lowo geeshsha baxisannohonna kaaꞌlannoho kaajja akataati! Cinca woꞌmanka woyite shota ikkitannonkekkiha ikkirono Yihowa kaaꞌlonni woꞌmanka woyite kuni akati heeꞌrannonke gede assiꞌra dandiineemmo. Haaro alame dagganno yanna cincine ‘agadhineemmo’ woyite Yihowa kaaꞌlannonketanna agarannonketa addaxxa dandiineemmo. (Mik. 7:7) Baalunku woꞌmanka woyite cinca uddiꞌrate murciꞌno. w23.08 22 guf. 7; 25 guf. 16-17

Yaiqoobi mittu manchi ammana noosihu gede asse hedinoha ikkirono, ammanasi kayinni loosunni leellishinokkita coyiꞌrino. (Yai. 2:1-5, 9) Yaiqoobi mittu rodiira woy rodoora uddano woy sagale noosikkita afanni heeꞌre insara mitore asse kaaꞌlinokki manchi daafira kulino. Kuni manchi ammana noosihu gede asse hedinoha ikkirono, assootisi kayinni ammana noosikkita leellishanno. (Yai. 2:14-16) Yaiqoobi Reaabi ammanase loosunni leellishshe dancha lawishsha ikkitinota coyiꞌrino. (Yai. 2:25, 26) Ise Yihowa daafira macciishshitino; hattono isi Israeele kaaꞌlanni noonsata huwattino. (Iya. 2:9-11) Ise lame Israeelete qotaano maaxxe gatisse ammanase loosunni leellishshino. Hakko daafira Israeelitte ikkitinokkita tenne guuntete xeꞌne noose mancho Abirihaami gede keeraanchote yinoonnise. Reaabi lawishshinni ammananke loosunni leellisha lowo geeshsha hasiissannota ikkitinota ronseemmo. w23.12 5-6 guf. 12-13

Kiristaana ikkinoommo daafira Qullaawu Maxaafihu xinta ikkino rosinni calla kassi yaa dihasiꞌneemmo. Maganunnihu qullaawu ayyaani kaaꞌlannonke daafira, “Maganunniha hawa gede huwantannikki coye” nafa xiinxallate quqquxammeemmo. (1 Qor. 2:9, 10, NW) Yihowawa albinni roore shiqate hojju xiinxallokki yannara seekke xiinxallate pirogiraame fushshiꞌra dandaatto. Lawishshaho isi hunda heedhino soqqamaanosi baxannota leellishinohu hiittoonniitironna tini isi ateno baxannoheta leellishshannohu hiittoonniitiro xiinxalla dandaatto. Qoleno Yihowa Israeele iso magarinni magansidhara hasiꞌrannoronna xaa yannarano magarinni magansiꞌnammosira hasiꞌrannoro heewisiissanni xiinxalla dandaatto. Woy Yesuusi uullate aana soqqami yannara woꞌmitanno gede assino masaalo daafira seekkite xiinxalla dandaatto. Yihowa Farciꞌraasineta Xiinxallote Kaaꞌlitanno Borro horoonsidhe kuri birxichuwa xiinxallittoro lowo hagiirre afiꞌra dandaatto. Qullaawa Maxaafa seekkite xiinxallakki ammanakki kaajjishiꞌratto gedenna “Maganu coyeno seekkite buuxatto” gede kaaꞌlitannohe.—Law. 2:4, 5. w23.10 18-19 guf. 3-5

Soqqamaasinchu Pheexiroosi horoonsiꞌrinohu “seekkitine” yaanno qaali noo gedeenni tirriro “bedeeda” yitanno tiro afirono. Kiiro 8 nooti umi hedo qolte seekkine baxama afidhino horo kultanno. Seekkine baxama roduuwinke cubbo dibbanno. Tenne lawishshunni xawisa dandiinanni: Baxillu lamente angankenni bedeende amandoommohu fididdi yaanno hocci gedeeti; baxillu mitto woy lame cubbo calla ikkikkinni ‘batinye cubbo diwa’ geeshsha bedeende amandeemmo yaate. Diwa roduuwinke cubbo agura leellishshannote. Hoccu xure diwannonte gede, baxilluno wolootu laanfenna guuntete xeꞌnensa diwanno. Ammanate roduuwinke soꞌro gatona yaa qarra ikkitannonke woyite nafa, gatona yaate insara noonke baxilli kaajjado ikkanno gede assiꞌra hasiisannonke. (Efe. 4:32) Insa gatona yineemmoha ikkiro baxillinke kaajjado ikkinotanna Yihowa hagiirsiisa hasiꞌneemmota leellinsheemmo. w23.11 11-12 guf. 13-15

Moote Iyosiyaasi qullaawa mine gatamara hanafinohu 26 dirihu heeꞌreeti. Konne looso loonsanni heeꞌneenna, “Kaaliiqi Musera uyinoha Seeru Maxaafa” anfoonni. Moote konne Seera nabbambanna macciishshe bayichonkonni hakko seerira borreessinoonnire loosu aana hosiisino. (2 Dud. 34:14, 19-21) Qullaawa Maxaafa ganyite nabbawa baxatto? Qullaawa Maxaafa barru baala nabbawate sharrantanni noottoha ikkara dandaanno. Kaaꞌlitannohe qummeeshshuwa hedate woꞌnaalatto? Iyosiyaasi 39 diro ikkisi balla heeshshosi hooganno gede assitanno soꞌro loosino. Isi Yihowa biddishsha hasiꞌra agure umosi addaxxino. (2 Dud. 35:20-25) Ninke tennenni ronseemmori no. Dirinke woy Qullaawa Maxaafa xiinxallinanni keeshshinoommo diri ikki geeshshihano ikkiro, Yihowa hasiꞌra agura dihasiissannonke. Tenne assate biddishshasi afiꞌrate ganyine huuccatto assiꞌra, Qaalesi xiinxallanna ayyaanaamittetenni gikki yiino Kiristaani aannonke amaale adha hasiissannonke. Hatto assineemmoha ikkiro, jawa soꞌro diloonseemmo; hattono albinni roore hagiirraamma ikkineemmo.—Yai. 1:25. w23.09 12 guf. 15-16

Qullaawu Maxaafi giddo Yihowa baxannohanna isira soqqaminoha batinye dhagge ikkanno meento kulloonni. Insa ‘jilba saꞌꞌannokkireetinna baalunku coyira ammanaminoreeti.’ (1 Xim. 3:11) Qoleno meya roduuwi songonsara, dancha lawishsha ikkannoha ayyaanaamittetenni gikki yiinoha meya roduuwa afiꞌra dandaanno. Wedella meya roduuwa, dancha lawishsha ikkannoꞌnehu ayyaanaamittetenni gikki yiinohu affinoonnihu meya roduuwi no? Insara noonsata baxissanno akatta huwatte; hakkiinni kiꞌneno togoo akatta leellisha dandiitinanni gara hedde. Ayyaanaamittetenni gikki yinoommota leellinsheemmoti mitte qara doogo, umonke heeshshi assate. Mitte rodoo umose heeshshi assitannoha ikkiro, Yihowanna wolootu ledo danchu jaaloomi heeꞌrannose. Lawishshaho Yihowa baxxanno rodoo iimi Annise xintinote umimmate silxaanera umose heeshshi assite hajajantanno. (1 Qor. 11:3) Kuni xintu seeri songoteno maatete giddono harunsa hasiissannoho. w23.12 18-19 guf. 3-5

Yihowa minaanni minaamasi baxaranna maalaamittetenninna ayyaanaamittetenni hasiisannosere asse towaatasera hasiꞌranno. Wodanchate dandoo heedhannohe gede assiꞌra, meya roduuwa ayirrisa, hattono addaxxinanniha ikka seenne adhatto woyitira kaaꞌlitannohe. Seenne adhittohu gedensaanni, ooso ilattoha ikkara dandaanno. Dancha anna ikkate daafira Yihowawiinni maa rosa dandaatto? (Efe. 6:4) Yihowa Beettosi Yesuusa baxannotanna isinni hagiidhannota faajjete kulino. (Mat. 3:17) Anna ikkoottoha ikkiro, qaaqquullikkira baxattonsata ganyite kulinsa. Assitinohu danchu coyira galatinsa. Yihowa lawishsha harunsitanno annuwi oosonsa ayyaanaamittetenni gikki yitinore ikkitanno gede kaaꞌlitanno. Miniꞌne mannanna songote giddo noo roduuwa baxillunni towaatte hattono baxattonsatanna naadattonsata kulte konni qeechira xaanni qixxaawa dandaatto.—Yoh. 15:9. w23.12 28-29 guf. 17-18

Ammanammoommore Yihowa soqqamaano ikkinummorono manna baalaho iillanno qarri iillannonke; hattono wolu manninte gede dhiwammeemmo. Qoleno gimbanninketa woy darammeemmo gede assinanninketa dandiine saꞌꞌa hasiissannonke. Yihowa togoo qarri iillannonkekki gede golamannonkekkiha ikkirono, kaaꞌlannonketa kule qaale eino. (Isa. 41:10) Isi kaaꞌlannonke daafira hagiirrinke baikkinni heeꞌra, dancha doorsha doodhanna buutote qarri iillinkerono isira ammanamme heeꞌra dandiineemmo. Yihowa Qullaawu Maxaafi giddo kulloonniha ‘keeresi’ aannonketa kule qaale eino. (Fil. 4:6, 7) Kuni keeri Yihowa ledo kaajja jaalooma kalaqiꞌne afiꞌneemmote giddoyidi harshammooti. Kuni keeri ‘mannu hedora aliidiho’; qoleno dhagge ikkannoho. Yihowa eeggifatte huucciꞌrittohu gedensaanni giddoyidi keere afidhe dhagge assiꞌrootto woyiti no? Maganu aanno ‘keeri’ yaa togooti! w24.01 20 guf. 2; 21 guf. 4

Ammanamino manni Magano baxansa, suꞌmasi woꞌma giddonni guwisanno gede assitannonsa. Moote Daawiti Yihowa suꞌma guwisa Yihowa umosi guwisa ikkitinota wodanchino. Yihowa suꞌma gannanna macciishshineemmo woyite, isi hiittoohoronna assinoha dhagge ikkanno coye qaangeemmo. Daawiti Annisi suꞌmi qullaawanno gede assanna guwisa hasiꞌrino. Isi ‘woꞌma mannimmasinni’ yaano woꞌma giddosinni tenne assa hasiꞌrino. Leewaawootuno albisa ikkite Yihowa suꞌma guwissino. Insa coyidhanno qaali Yihowaha qullaawa suꞌma woꞌmunni woꞌma guwisate guutinoha ikkinokkita ammante adhitino. (Neh. 9:5) Insa umonsa heeshshi assite woꞌma giddonni Yihowa guwisansa iso hagiirsiissinoti dihuluullissannote. w24.02 9 guf. 6

Yihowa wolqankera aleenni ikkitino mixo wonshiꞌra hoongoommo daafira didadillanno. (2 Qor. 8:12) Guficho woy ataawe ikkinohe coyinni rosate woꞌnaali. Konni albaanni wonshiꞌrootto mixo qaagi. Qullaawu Maxaafi “Maganu halaalaancho yoo yaannoho; loosoꞌne . . . dihawanno” yaanno. (Ibi. 6:10) Hakko daafira atino konni albaanni assoottore hawa dihasiissannohe. Konni albaanni, Yihowa ledo noohe jaalooma kaajjishiꞌrate, isi daafira wolootaho kulate woy cuuamate fushshiꞌrootto mixo wonshiꞌrate assoottore hiinci. Konni albaanni fushshiꞌroottota ayyaanaamittete mixo wonshiꞌroottonte gede xa noohe mixo wonshiꞌrateno sharrama dandaatto. Yihowa kaaꞌlonni mixokki wonshiꞌra dandaatto. Ayyaanaamittete mixokki wonshiꞌrate sharramatto woyite Yihowa kaaꞌlinohenna maassiꞌrinohe gara deꞌooti. (2 Qor. 4:7) Hexxo mudha hoogittoro lowo atoote afiꞌratto.—Gal. 6:9. w23.05 31 guf. 16-18

Yihowa baxannonsarira insanni hagiidhannota leellisha hasiꞌranno. Qullaawa Borro Yihowa lame yannara Yesuusa baxannotanna isinni hagiidhannota kulinosita kultanno. (Mat. 3:17; 17:5) Yihowa atenni hagiidhannota kulanna macciishsha hasiꞌratto? Yihowa hasaawisannonkehu xaaddotenni ikkikkinni Qaalisi widoonniiti. Wongeelluwate giddo Yesuusi coyiꞌrinore nabbambeemmo woyite, Yihowa ninkenni hagiidhannota kulanna “macciishsha” dandiineemmo. Yesuusi Annisi akatta guutu garinni leellishino. Hakko daafira Yesuusi guuntete xeꞌne noonsari ammanantino rosaanosinni hagiidhinota kulinota nabbambeemmo woyite, Yihowa ninkenni hagiidhannota kulanni noonkehu gede assine heda dandiineemmo. (Yoh. 15:9, 15) Qarru iillinonke yaa Yihowa ninkenni dihagiidhino yaa diꞌꞌikkitino. Hatteentenni iillannonke qarri Yihowa mageeshshi geeshsha banxeemmoronna addaxxineemmoro leellinsheemmo faro fanannonke.—Yai. 1:12. w24.03 28 guf. 10-11