Qullaawu Maxaafi Xaꞌmonna Dawaro
Sokkaano kaaꞌlitannonkeri no?
Sokkaano ammanaminoha Maganu soqqamaancho Daanieeli kaaꞌlitinonte gede, yannankerano mannaho danchu duduwi iillanno gede kaaꞌlitanno
Maganu Yihowa manna kalaqara lowo diri albaanni lowo miliyoone ikkitanno sokkaano kalaqino. (Iyyoobi 38:4, 7) Sokkaano Maganoho soqqantannote wolqaataamma ayyaanu kalaqooti; mito wote insa uullate aana noore Maganu soqqamaano marraꞌanno gedenna agartanno gede sonkanni. (Faarso 91:10, 11) Yannankera sokkaano mannu Yesuusi harunsaano sabbakkanni nooha dancha duduwo macciishshanno faro afiꞌranno gede kaaꞌlitanni no.—Ajuuja 14:6, 7 nabbawi.
Kaaꞌlo afiꞌrate sokkaanonniwa huuccatto assiꞌra hasiissannonke? Dihasiissannonke. Huuccatto assiꞌra magansiꞌrate yaate; magansiꞌra hasiissannonkehu qole Magano callaho. (Ajuuja 19:10) Sokkaano Maganu soqqamaano ikkitinohura, mannu kulannonsare ikkikkinni Maganu kulannonsare assitanno. Konni daafira, ayewoteno Yesuusi widoonni Magano calla huucciꞌra hasiissannonke.—Faarso 103:20, 21; Maatewoosi 26:53 nabbawi.
Busha sokkaano nooni?
Maganu mannu ooso gede, sokkaanono doodhate qoosso oye kalaqino; hakko daafira insa danchare woy bushare assa doodha dandiitanno. Batinye sokkaano Maganoho finqiltino; tini dadillissannote. (2 Pheexiroosi 2:4) Kuri giddo umihu Sheexaaneho; wolootuno isi faale harunsite agaaninte ikkitino. Yannankera Sheexaanunna agaaninte iiminni uullara tugantino.—Ajuuja 12:7-9 nabbawi.
Alamete aana 1914nni hanaffe bunshenna finqille lowo geeshsha batiꞌrase, Maganu Sheexaanenna agaaninte muli yanna giddo sammi assannota buuxissanno. Hakkiinnino Maganu alba hedino garinni uulla Gannate assanno.—Ajuuja 12:12; 21:3, 4 nabbawi.