AANIIDI QOOLIHA COYI UMO | LOOSATTO LOOSINNI HAGIIDHA DANDAATTO GARA
DIINAGGAAWE LOOSA Yanna Saꞌinoreeti?
Aleksi uduunne mittu bayichinni wolewa gurtanno dirijjitera loosanno; isi mitte kaartoone duhe hogowu makeenira wore kae uffa yii. Hakkiinni togo yee hedi: ‘Konne looseenna mittoreno kaaꞌlinoekki looso mayira cuꞌmire shetoommo? Mamarolla faffaekka? Looseemmokkiha ikkoommero, woyyannoenka!’
Aleksinte gede, batinyu manni kabbaade looso loosa dibaxanno. Makeena biddi assannohu Aarooni togo yiino: “Lowo manni ‘ajinshe laꞌnanni’ looso loosa ayirrinyensa xeissannohu gede asse hedanno. Rooru mannira, ‘Konne looso loosanni noommohu woyyino looso afiꞌrammo geeshshaatilla’ yitanno hedo noonsa.”
Ikkina, batinyu manni diinaggaawe loosa hasiissannonsakkihu gede asse hedannohu mayiraati? Miteekke kuni manni, xaadooshshu buusira kullannire ammanannoha ikkara dandaanno; xaadooshshu buusi “dancha” heeshshooti yinanniti qawaaxxotenna faffote heeshsho ikkitinota kulanno. Hiiqqamino uduunne seekkannohu Maatiwu togo yiino: “Batinyu manni, heeshshote hasiisannore afiꞌrate daafure loosanno manchi, hakkeeshshi geeshsha diqiniinosiho yee hedanno.” Ishine feyate looso loosannohu Sheenino mannaho togoo dooꞌꞌo noota wodanchino. Togo yiino: “Yannankera mannu shiima looso loose lowo woxe adha hasiꞌranno.”
Wolu batinyu manni kayinni diinaggaawe loosa baxanno. Gimbaatu looso loosannohu 25 diro ikkinosihu Daanieeli togo yiino: “Diinaggaawe loosa hakko iso danchu alaamira loonsanniha ikkiro, lowo geeshsha kiissannote.” Lemiina sase diro ikkinosihu Andireno tennera sumuu yaanno. Isi togo yiino: “Hagiirrunna harshammo loosu ledo xaado afidhinota ammaneemmo. Seekke loosa hooga geedanno hagiirre abbitannota ikkitukkinni heeshsho ceeꞌmishshannota ikkitanno gede assitanno.”
Daanieelinna Andirete gedee lao noonsa manni diinaggaawe loosa baxanno gede kaaꞌlinonsari maati? Haranchunni, heeshshonsa giddo Qullaawu Maxaafita xintu seerubba harunsa kaaꞌlitinonsa. Qullaawu Maxaafi diinaggaambe loonsannita dihoolanno; isinni qarooyyenna jawaata ikkinanni gede amaalanno. Kayinni Qullaawu Maxaafi looso loonseemmo gede calla kulannoha diꞌꞌikkino. Loonseemmo loosinni hagiidhineemmo garano kulannonke.
Loosatto loosinni hagiidhatto gede kaaꞌlitannoheti Qullaawu Maxaafiti xintu seerubba hiikkuriiti? Aane noo birxichira, kuri giddo gama laꞌꞌattora koyinsoommohe.