Qullaawa Maxaafa Nabbawa Hanafa Dandeemmohu Hiittoonniiti?

Qullaawu Maxaafi niwaawe hagiirsiissannota assiꞌratto gedenna roore horo afiꞌratto gede kaaꞌlannoheri maati? Hanni batinye manna kaaꞌlitinota onte hedo laꞌno.

Injaanno bayicho heedhe nabbawi. Qaxaqaꞌa yiino bayichonna dancha yanna doodhi. Nabbabbanni nootto coye illachisha dandaatto gede, hedokki billaallitanno gede assannore hooꞌli. Danchu xawaabbinna ayyare Qullaawu Maxaafi niwaawenni roore horo afiꞌratto gede kaaꞌlitahera dandiitanno.

Qullaawu Maxaafira gara ikkitino lao heedhohe. Qullaawu Maxaafi iimi Anninke uyinonkeho; konni daafira baxillaanchu annisiwiinni rosa hasiꞌranno qaaqqi gede ikkittoro, Qullaawu Maxaafinni roore kaaꞌlo afiꞌra dandaatto. Qullaawu Maxaafira gara ikkitinokki lao nooheha ikkiro, Maganu rosiisannohe gede tenne lao hooꞌlate sharrami.—Faarso 25:4.

Nabbawattora albaanni huuccatto assiꞌri. Qullaawu Maxaafi Maganu hedo amadinoha ikkino daafira, kuni maxaafi yaannore huwatate Isi kaaꞌlo hasiissannonketi egennantinote. Maganu ‘huuccidhannosirira Qullaawa Ayyaana’ aara qaale eino. (Luqaasi 11:13) Kuni ayyaani Maganu hedo huwatatto gede kaaꞌlannohe. Gale hosanni kuni ayyaani Maganunniha “goꞌlino coye” huwatatto gede nafa assannohe.—1 Qorontoosi 2:10.

Nabbabbanni noottore huwatate woꞌnaali. Mitto gafa gudate geeshshira calla nabbabbooti. Nabbabbanni noottore seekkite hedi. Ateneeto aante noo xaꞌmuwa xaꞌmi: ‘Tenne xagge giddo kulloonni manchira hiitti akatta noosi? Heeshshoꞌya giddo konne roso harunsa dandeemmohu hiittoonniiti?’

Mixo fushshiꞌri. Qullaawa Maxaafa nabbabbe kaaꞌlo afiꞌrate, nabbabbanni nootto gafinni heeshshokkira kaaꞌlannore rosate mixo fushshiꞌri. Aante noo mixo fushshiꞌra dandaatto: ‘Maganu daafira roore rosa hasiꞌreemmo.’ ‘Dancha mancho, dancha minaama woy dancha minaanna ikka hasiꞌreemmo.’ Hakkiinni mixokki wonshiꞌrate kaaꞌlannoheha Qullaawu Maxaafi gafa doodhi.a

Tini ontenti hedo Qullaawa Maxaafa nabbawa hanafate kaaꞌlitannohe. Kayinni Qullaawu Maxaafi niwaawe roore baxissannota assiꞌra dandaattohu hiittoonniiti? Aane noo birxichira tennera kaaꞌlannore ronseemmo.