Ibiraawootu Afiite Shiimiidi Fidalenni Afiꞌneemmota Kaajja Taje

Maganu eino qaali baalu woꞌmannota addaxxa dandiineemmo? Yesuusi tenne addaxxino; isi rosiisino rosino macciishshaanosi ammana kaajjishannoho. Isi ilaalaho sabbaki yannara, Maatewoosi 5:18 aana noo lawishsha coyiꞌrino; togo yiino: “Halaale kuleemmoꞌne; gordunna baatto saꞌꞌa geeshsha seeru baalu woꞌmanno ikkinnina, Seeru giddonni shiima fidale woy bicamme dibaꞌanno.”

Ibiraawootu Afiiti shiimiidi fidale yoodi (י) yinannite; tini fidale Maganu Yihowa suꞌma amaddinote Tetiragiramateni yinanni fidalla giddo umite.a Borreessaanonna Farisootu Maganu Seera kultannota mitte mittenta qaallanna fidallano aguranna, “bicamme” nafa lowori gede assite laꞌanno.

Yesuusi, Seeru giddo kulloonniri shiimuri nafa woꞌmikki gatante, iiminna uulla sairo woyyannota coyiꞌrino. Ikkollana Qullaawu Maxaafi, iiminna uulla hegerera heeꞌrannota kulannonke. (Faarso 78:69) Konni daafira, aleenni noo yaatto, Seeru giddo kulloonniri shiimuri nafa woꞌmikki gatannokkita leellishanno.

Maganu Yihowa shiimmaadda coye nafa illachishanno? Ee illachishanno. Hanni tenne hedi: Hundi Israeele Faasikaho gorritanno geꞌrechi miqqa giddo mittono hiiqqitannokki gede kulloonninsa. (Fulo 12:46) Tini shiima hajajo labbara dandiitanno. Israeele miqqa hiiqqaqqa hasiissannonsakkihu mayiraatiro huwattino? Huwattinokkiha ikkara dandaanno. Yihowa kayinni tini Mesihicha haqqaho sunte shinanni wote miqichisi giddonni mittuno hiiqqamannokkita leellishshanno masaalo ikkitinota afino.—Faarso 34:20; Yohaannisi 19:31-33, 36.

Yesuusi coyiꞌrinorinni maa ronseemmo? Ninkeno Yinowa wonsheemmo yee coyiꞌrinori shiimuri nafa gatikkinni baalunkuri woꞌmannota addaxxa dandiineemmo. Ee Ibiraawootu Afiite shiimiidi fidalenni kaajja taje afiꞌnoommo!