Aliidi Bisi Soyino Dabdaabbe
Muxxe Yihowa Farciꞌraasine:
Yihowara ammanantine soqqantinanni heedhinoonniri xa lamala miliyoone aleenni ikkitinanniri muxxe roduuwi baalunkura dabdaabbe borreessineemmo wote lowonta tashshi yaannonke. Wole gobbanni dayinohunni ammanate rodiiꞌnenni xaaddinanni wote, hakkawotenni rodiimmate baxilli macciishshamannoꞌne. (Yoh. 13:34, 35) Tayixeha Diru Maxaafa nabbabbinanni woteno, addi addi gobbara heedhanno roduuwiꞌne ammanarenna ammanamare kultannoti wodana tashshi assitanno taarike, baxxitinoti baxillu simmeete macciishshantannoꞌne gede assitannota dihuluullammeemmo.
Batinyu roduuwi Maatete Magansiꞌra pirogiraamensa ganye harunsannota alame woꞌmate rippoorte leellishshanno. Shiimmaaddu qaaqquulli nooꞌneri qaaqquullu tenne pirogiraame ceeꞌmikki harunsanno gede assate duucha doogo horoonsidhinanni. (Efe. 6:4) Minaannuwunna minaamuwu mitteenni xiinxallansa, mimmitu ledo hasaawate faro fantinonsa daafira albinni roore baxamanni haꞌrino. (Efe. 5:28-33) Ee, Maganu Qaale seekkine xiinxallinammora assinoonnitenni tenne qixxaawonni roduuwu gilletennino ikko maatensa ledo lowo xiqime afidhanni no.—Iya. 1:8, 9.
Muli yannara addi addi danonni lowo roduuwinke baxanno manna shiirinohuranna lowo miinjinsa goofinohura ninkeno lowonta xissiisiꞌnoommo. Adagunni gawajjantinore irkisate woꞌnaalli yannara kiꞌneneeto marartinikki kaaꞌlitinoonnire baalanka galanteemmoꞌne. (Soq. Los. 11:28-30; Gal. 6:9, 10) Qoleno, mitte mittente songo giddo anga ajjino roduuwa affiniro umiꞌnenni kaꞌine kaaꞌlitinanniri heedhinoonni. Biꞌre Dorqa yinannite gede, kiꞌneno “danchu loosinninna mutsuwaate aatenni” egennantinoonnireeti. (Soq. Los. 9:36) Yihowa assitinannire laꞌꞌannotanna qole kiisannoꞌneta horonta huluullantinoonte.—Maat. 6:3, 4.
Mite gobbara “higge horoonsidhe qarra abbitannori” mabteꞌne kadde coqqontanni nooꞌneta anfoommo. (Far. 94:20-22) Yesuusi tenne balaxe masaalinota affinoonni daafira, iillannoꞌne qarranna darte cincatenninna worbimmatenni qeeltinanni heedhinoonni. (Yoh. 15:19, 20) “Nooꞌne hexxora korkaata kultinanni gede xaꞌmannoꞌne manchi baalunkura dawaro qoltinanni” hadhini kiiro, kiꞌnera muxxe roduuwira ganyine huuccineemmoꞌneta huluullantinoonte.—1 Phe. 3:13-15.
Sheexaanu hili geeshsha nafa fooliishshiꞌrikki amanyootu maaeelle gobba tuqisanni nooha ikkirono, lowo miliyoone ikkitinanni roduuwi amanyootunni xuru nooꞌnekkire ikkitine heedhinanni heedhinoonni daafira lowonta galanteemmoꞌne. Alame amanyootunni maaeelte mancaꞌanni noo yannara, “Mootichunna bayira jawaantesi wolqa ikkitanni nooꞌne.” (Efe. 6:10) “Maganuwiinni afiꞌnanniha woꞌma olu uduunne uddidhinoonni” daafira, “Daawuloosite xagarrote hayyonni” didogantinoonni. (Efe. 6:11, 12) Yihowa, xonannosihura Sheexaaneho fenjeejje dawaro qolate kiꞌne lawishsha asse kulanni noota habbinoonte!—Law. 27:11.
2011nni Mootichinke reyo Qaaggooshshira 19,374,737 ikkanno manni gamba yiino daafira lowo geeshsha hagiidhinoommo. Kageeshshihu lowo manni gamba yaanno gede assinori giddo mittu, kiꞌne saihu Dotteessu aganira kaaꞌlaano suwisaano ikkaꞌneeti. Lowo miliyoone ikkitannoti alamete gosa, ammanantinori Yihowa Farciꞌraasine mittu garita galatu faarso isira shooshshite faarsitanna macciishshitino! (Ro. 10:18) Hakko aganira kaaꞌlaano suwisaano ikkitinoonniri 2,657,377 roduuwino ikko albinni roore soqqamate sharrantinoonni roduuwi baalunku, umiꞌne fajjonni diinaggaabbine soqqantinoonni daafira lowo geeshsha tashshi yiinonke.—Far. 110:3; Qol. 3:23.
Niro 263,131 manni insaneeto Yihowara sayise uyinota cuuame leellishino. Tennera Yihowa galanteemmosi; qoleno, “‘Amo!’ Macciishshannohu baalunkuno, ‘Amo!’ yoo. Gooꞌrinohu baalunku dawo; hasiꞌrannohu baalunku heeshshote waa mulla adho” yine xaano wole manna mitteenni koyinseemmo gede ninke ledo karsantinoonnire baala galanteemmoꞌne. (Aju. 22:17) Maganu Mangiste abbitanno atootire 2011nnihu awuraajju gambooshshira tamaarrummo kawa, albinni roore “Mangistekki Daggo!” yinanni heeꞌnoommo. Yesuusi, “Rahe dayeemmo” yaasi quqquxammeemmo gede assitinonke daafira, ninkeno hawaariya Yohaannisi gede woꞌma giddonkenni, “Hamiiꞌni! Mooticha Yesuusa amo ballo” yinanni heeꞌnoommo.—Aju. 22:20.
Hattee wodana tashshi assitanno yanna baqqi yitine agadhe; hattono “loosunninna halaalunni” Yihowa baxxinannita leellishshinanni heedhinoonnire kiꞌne mitto mittonka muxxe meyanna labbaa roduuwa giddonkenni banxeemmoꞌneta huluullantinoonte!—1 Yo. 3:18.
Roduuwiꞌne,
Yihowa Farciꞌraasinehu Aliidi Bisi