Hawarro Hawarro Soqqama Dandiitinanni?
1. Mittu maxaafi yiino garinni, hawaariya Phaawuloosi minunni mine soqqamannohu ma yannaraati?
1 Hawaariya Phaawuloosi, “10 saatenni kayise hashshu taalo meddi yaa geeshsha” roorenka minunni mine soqqamannota Deyilii Layifi Ini Bayibili Tayimsi yinanni maxaafi xawisanno. Phaawuloosi pirogiraame fushshiꞌre yannate kiiro konni garinni soqqamannoronna teꞌee dianfoommo; “danchu duduwira yee duuchare assa” hasiꞌrannota kayinni anfoommo. (1 Qor. 9:19-23) Isi, haammata manna hasaawisate injiitanno yannara minunni mine soqqamate umisi hajo biddi biddi assiꞌrannoti dihuluullissannote.
2. Hawarro yanna soqqanshote dancha ikkitinohu mayiraati?
2 Duuchu qooxeessira saammintete giddo halashshaano minunni mine hadhe soqqantannohu soodooti. Ikkina kiꞌne qooxeessira xaano tini yanna roore danchate? Mittu suwisaanchi insa killile gara coyiꞌranni togo yiino: “Roore yanna barra mannu mine diheeꞌranno. Rooru manni mine heeꞌrannohu hawarrooti.” Hawarro yanna hakko iso labballoho dancha duduwo kulate roore woyyitinota ikkitara dandiitanno. Roore wote togoo yanna, mannu fooliishshiꞌrannotenna hasaawa hasiꞌrannote. Qooxeessiꞌnera hawarro yanna soqqanshote injiitannoha ikkiro, cimeeyye simirriitete gambooshshe qixxeessa hasiissannonsa.
3. Hawarro soqqammeemmo wote wodancha noonketa leellisha dandiineemmohu hiittoonniiti?
3 Wodancha Hasiissanno: Hawarro soqqammeemmo wote wodanchineemmore ikka hasiissannonke. Lawishshaho, mannaho injiinokki yannara marroommoha ikkiro wole wote dangeemmo yine haꞌra woyyate. Tunsichu yanna ikkituro mini mannira leellineemmowa uurra, hattono ranke ninkeneeto egensiisanna mayira dangoommoro kula hasiissannonke. Qoleno calluwinke minunni mine haꞌrantenni gaamo ikkine soqqama, hattono lamu mini manna coyishiishshanno wote ninke fanfummokki agara hayyote. Mini manna rabbashshinannikki gede gonxanni yannara martinoonte. (2 Qor. 6:3) Mittu qachi tunsi gedensaanni soqqamate dancha ikka hoogiro, yannante soqqamme tunsikki agura woyyate.—Law. 22:3.
4. Hawarro soqqanshonni mayi atoote afiꞌneemmo?
4 Afiꞌneemmo Atoote: Soqqansho roore hagiirsiissannonkehu marroommo manna afiꞌne hasaawinsummorooti. Manna hasaawisate faro afiꞌnummo kiiro, mannu “gatanno gedenna halaalunnita gara ikkitino egenno afiꞌranno gede” roore kaaꞌla dandiineemmo. (1 Xim. 2:3, 4) Pirogiraameꞌne biddi assidhine hawarro hawarro soqqama dandiitinakka?