Dancha Hasaawu Bitima Qixxaawa Dandiineemmo Gara
1. Dancha hasaawu bitima horoonsiꞌra hasiissannonkehu mayiraati?
1 Sagale intara albaanni kokke fantara intanniti shiinqa sagale, shiqqara noota waanna sagale quqquxamme agadhinanni gede assitannonte gede, danchu hasaawu bitimino Qullaawu Maxaafire dancha gede hasaawate faro fananno. Danchu hasaawu bitimi yaano hasaawa jammarate coyiꞌneemmori seedara woy haraꞌmara, woy kayinseemmo hajo babbaxxitara dandiitanno; ikkirono, coommitanno sagale qixxeessate assinanninte gede hasaawa dancha gede assine jammarate balanxe hende qixxaawa hasiissanno. (Law. 15:28) Dancha hasaawu bitimaati yinannihu hiittooho?
2. Dancha hasaawu bitima qixxaawa dandiineemmohu hiittoonniiti?
2 Mannu Afa Hasiꞌranno Hajo Kayisse: Hasaawu bitiminke mannu roore afate quqquxamanno gede assannoha ikka hoogiro, mannu hasaawa uurrisara dandaanno. Konni daafira, qixxaabbinanni wote qooxeessiꞌnera mannaho xiwannore heda hasiissannoꞌne. Qooxeessiꞌne mannira xiwannohu danchu gashshootireeti, maate hagiirraame assiꞌnanni garaatinso olunnireeti? Roore wote mannu lawinonsare coyiꞌra digiwanno; konni daafira hedonsa coyiꞌranno gede assitanno xaꞌmo xaꞌme. Maganu Mangiste Soqqanshonkera fulannohu hasaawa jammarate kaaꞌlanno lawishshi giddo mitto horoonsiꞌra dandiitinanni? Maatete Magansiꞌra yannara saꞌine saꞌine hasaawu bitima rosiisidhiniro danchaho.
3. Hasaawu bitimanke qooxeessaho rosaminori ledo sumuu yaanno gede assa dandiineemmohu ma garinniiti?
3 Budenna Qooxeessaho Rosaminore Hedde: Mitowa mannu insata marroommohu mayiraatiro ranke kullammonsara hasiꞌranno. Wolewa kayinni mannu balanxe keere haaꞌnansara woy mite meessi mashalaqqe kullansara hasiꞌranno; hatto assa hoongiro oosi-mannu gede asse kiiranno. Mitu qooxeessira hasaawa jammarate umonni Qullaawa Maxaafa yinanni coyiꞌra qarra diafidhino. (Looso 2:14-17) Ikkollana, Kiristaanu ammaꞌno harunsannokki manna woy horonta ammaꞌno noonsakkire hasaawinseemmo wote umonni Qullaawa Maxaafa yinanni coyiꞌrantenni, galagalle marre hasaawinseemmo wote hatto assa woyyitanno.—Looso 17:22-31.
4. Hasaawa jammarate umo yineemmore ma garinni qixxaawa hasiissannonke?
4 Jammarreemmo Wote Yineemmore: Hasaawa jammartinanni wote umo yitinannire seekkitine qixxaabbe. Haranchorenna huwatate qarrisannokkire coyiꞌra lowo geeshsha danchate. Coyiꞌra jammarreemmo wote coyiꞌneemmo garino lowo waaga afiꞌrino. Iibbado simmeetenni coyidhe. Coyishiishshinanni manchira assaabbinannita leellishanno garinni, faasiiqqine coyishiishshe. Tenne baala assaawe harunsanke, qooxeessinke manni “Yihowa sagale” sagaꞌlate quqquxamanno gede assanno bitima qixxaawate kaaꞌlitannonke.—1 Qor. 10:21.