Albi Metseettanke Seekkitine Horoonsidhe

Albi metseettanke mine duunnummoro woy hunnummoro kaaꞌlitannori nookki daafira mannaho elate woꞌnaala hasiissannonke. Mitte metseete calla mittu manchita halaaleho noosi hasatto kakkayissaranna Yihowa suꞌma woshsha jammaranno gede assitara dandiitanno. (Rom. 10:13, 14) Aante shiqqino assaawe albi metseettanke danchu garinni horoonsiꞌrate kaaꞌlitannote.

• Duucha hinge sabbankoonnikki qooxeessira soqqantinanni wote, mannu mine nookki qaera wolu manni laꞌꞌannokki garinni mitte metseete wora dandiitinanniha ikkanno.

• Gudumaaleho lawishshaho, mannu makeena agadhe noowa farciꞌneemmo wote nabbawannore hasiꞌrannoronna teꞌee xaꞌmine albi metseettanke giddonni baxissinonsata doore adhanno gede haammachinshe leellisha dandiineemmo.

• Songoꞌne killile giddo noota akimete minna, umo amaxxinanniwa, woy haxiꞌnanniwa woy wole hattoo base hadhinanni wote boode albi metseetta wora dandiitinanni. Roore wote togoo basera halaafinatu noosiha balaxe fajjishiisha danchate. Hattoowa wonanni metseetta worre heeꞌnoonniha ikkiro, leddine wortinoonte.

• Manna galagaltine martine hasaawisate qixxaabbinanni wote, martine hasaawissinanni manchi hasatto hedde. Isi maate noosiho? Gobbatenni gobba haꞌra baxannoho? Haqqenna awawa kaase towaaxxa lawinore assa baxannoho? Isi nabbawa baxanno gedeere amaddino metseete nooronna teꞌee albi metseetta giddo laꞌe; hakkiinnino tenne wirro martinanni wote hatte borro uyiyyesi.

• Duucha higgine qaesi martine hoogginoonnihu hasatto noosi manchinni wirro xaaddinanni wote, adhikkinni saꞌe baꞌinosi borro leellishshesi.