Yanna Agara Roso Assidhe
1. Yihowa maaho lawishsha ikkinonke?
1 Yihowa horonta barrisiꞌre diegennino. Lawishshaho, soqqamaanosi kaaꞌlannohu ‘kaaꞌlo hasiisse noonsa yannaraati.’ (Ibi. 4:16) Qoleno ayyaanaamittete sagale “hasiissanno yannara” aannonke. (Mat. 24:45) Konni daafira, Yihowahu hanqu barri ‘keeshshikki daannota’ dihuluullammeemmo. (Imb. 2:3) Ee, Yihowa yanna agarannoha ikkasi lowore kaaꞌlitannonke! (Far. 70:5) Ninke kayinni mitiimmaammanna guuntete xeꞌne noonkere ikkinoommo daafira, yanna agara qarra ikkitankera dandiitanno. Ikkina, yanna agara roso assiꞌra hasiissannonkehu mayiraati?
2. Barrisiꞌra hooga Yihowa ayirranno gede assitannohu hiittoonniiti?
2 Tenne goofimarchu barruwara, lowo manni umonsa baxannohonna insaneeto qeeꞌlannokkiho; hakko daafira yanna agaranno manni baxxe leellanno. (2 Xim. 3:1-3) Konni daafira Kiristaanu loosoho, dinyetenna gambooshsheho barrisiꞌrannokkiha ikkiro wolu manni tenne lae Yihowa ayirrisara dandaanno. (1 Phe. 2:12) Maalaamittete looso yannante jammartinanniha ikkirono, ayyaanaamittete coyira kayinni duucha wote barrisidhinanni shettinanni? Gambooshshe yannante marre hanafote faarsonna huuccatto saꞌe baꞌunkekki iillanke, amanyootu noosihu iimi Anninke lawishsha harunsa hasiꞌneemmota leellishshanno.—1 Qor. 14:33, 40.
3. Barrisiꞌra hooga wolu mannira assaambeemmota leellishshannohu hiittoonniiti?
3 Barrisiꞌra hooga wolu mannira assaambeemmotano leellishshanno. (Fil. 2:3, 4) Lawishshaho, songote gambooshshinna simirriitete gambooshshira yannante iillanke, wolu roduuwi hedo bebbeehantannokki gede kaaꞌlitanno. Yannate kiiro barrisiꞌneemmoha ikkiro kayinni, wolu mannira insa yannanni roore ninketi waaga afidhino gede assine hendeemmoha lawansara dandaanno. Yanna agarreemmoha ikkiro ammaꞌninannire, looso banxeemmorenna addaxxinannire ikkineemmo; duuchu manni qole tenne akatta kaffi asse laꞌꞌanno.
4. Duucha hinge barrisiꞌneemmoha ikkiro woyyeessiꞌra dandiineemmohu hiittoonniiti?
4 Duucha wote barrisidhinanniha ikkiro, barrisidhinanni gede assannoꞌneri maatiro seekkitine assaabbe. Loossinanni looso yannantenni gudate kaaꞌlitannoꞌneta harunsa dandiitinanni pirogiraame fushshidhine darajjaꞌinoonnire ikke. (Mek. 3:1; Fil. 1:10) Yihowa kaaꞌlannoꞌne gede huuccidhe. (1 Yoh. 5:14) Jajjabba hajajo yaano Maganonna jaalakki baxi yitanno hajajo kaffi assine laꞌneemmota leellinsheemmo doogga giddo mitte yanna agarate.—Mat. 22:37-39.