Qullaawa Maxaafa Dancha Gede Xiinxallisa
1. Qullaawa Maxaafa xiinxallissanno halashshaanora mayi halaafinati noonsa?
1 Maganu umisiwa qole “goshooshinoha” agurranna isira soqqama dandaannohu dino. (Yoh. 6:44) Ikkirono, Qullaawa Maxaafa xiinxallissanno halashshaano mannootu iimi Anninsawa shiqqanno gede kaaꞌla hasiissannonsa. (Yaq. 4:8) Konne assate qixxaawo hasiissanno. Xiinxallinseemmo manchi sokka huwatanno gede kaaꞌlate, mitte mittenta gufo nabbawanna qixxaabbino xaꞌmo xaꞌma calla diꞌꞌikkitanno.
2. Qullaawa Maxaafa dancha gede xiinxallisate maa maa assa hasiissanno?
2 Halashshaano dancha gede xiinxallisate, rosaanonsa (1) Qullaawu Maxaafi yaannore huwattanno gede, (2) Qullaawu Maxaafi yaannore ammantanno gedenna (3) Qullaawu Maxaafi yaannore loosu aana hosiissanno gede kaaꞌla hasiissannonsa. (Yoh. 3:16; 17:3; Yaq. 2:26) Rosaanchu konne baala assanno gede kaaꞌlate haammatu agani hasiisannoha ikkara dandaanno. Ikkirono, rosaanchu Yihowa ledo fiixooma kalaqiꞌranno gedenna heeshshosi isira sayise aanno gede, dirimu dirimunni konne assasi hasiissinote.
3. Kaajja rosiisaano laote xaꞌmuwa xaꞌmitannohu mayiraati?
3 Qullaawu Maxaafi Rosaanchiꞌne Hedo Maati?: Xiinxallinseemmo manchi rosanni noo coye huwatinotanna ammanannota afate, ninke calla coyiꞌra agurre rosaanchu hedosi fushshe coyiꞌranno gede assino. (Yaq. 1:19) Xiinxallanni noo coyi daafira Qullaawu Maxaafi yaannore huwatino? Rosinore umisi yaattonni kula dandaanno? Rosino coyi daafira mayi macciishshamannosi? Qullaawu Maxaafi yaannori garaho yee ammananno? (1 Tes. 2:13) Rosino coyi heeshshosi gara soorre biddi assanno gede assiꞌra hasiissannosita huwatino? (Qol. 3:10) Togoo xaꞌmuwara qolanno dawaro afate, hayyotenni laote xaꞌmuwa (hedosi afate kaaꞌlitanno xaꞌmuwa) xaꞌmine, hakkiinni macciishsha hasiissannonke.—Mat. 16:13-16.
4. Rosaanchoho Qullaawu Maxaafinni rosanni noore huwata woy loosu aana hosiisa qarra ikkitusiro, ma assa hasiissannonke?
4 Mittu manchi gadenna hedanno gari roore wote rumuxxinoha ikkanno daafira fushshe hooꞌlate yanna hasiissannosi. (2 Qor. 10:5) Mittu rosaanchi rosino coye ammana woy loosu aana hosiisa hoogirona? Maganu Qaalinna qullaawu ayyaani rosaanchu wodani giddo loosanno gede yanna aate cinca hasiissanno. (1 Qor. 3:6, 7; Ibi. 4:12) Rosaanchoho mitto Qullaawu Maxaafi roso huwata woy loosu aana hosiisa qarra ikkitusiro, agurre wolu rosira saꞌꞌa woyyitanno. Qullaawu Maxaafi yaannore cincine baxillunni agurrummokki xiinxallinseemmosiha ikkiro, gale hosanni assa hasiissannosire assara dandaanno.