Aliidi Bisi Soyino Dabdaabbe
Muxxe Roduuwa:
“Kiꞌne baalanka huuccattonke giddo qummi assinummo kiiro Magano galanteemmo; korkaatuno, ammanate loosoꞌnenna baxillu kakkayiseennaꞌne daafurtinanni daafuro, hattono Mootichanke Yesuusa hexxitine kaajjitine uurritinoonnita Maganinkenna Anninke albaanni aye woteno dideꞌneemmo.” (1 Tes. 1:2, 3) Tini xiqise kiꞌne ma garinni laꞌneemmoꞌnero dancha gede assite xawissannote! Kiꞌnenna loossinanni heedhinoonnihu danchu loosi daafira Yihowa galanteemmo. Mayira?
Sai diro, ‘ammanantinenna baxillunni’ Maganu Mangiste ledo xaado afiꞌrinoha lowo looso loossinoonni. Kiꞌne giddo batinyu soqqanshoꞌne halashidhinanni doogga hasidhinoonni. Mite halashshaano Mangistenniha wongeelu looso loossannori roore hasiissannowa hadhe soqqamate wole gobba nafa hadhino. Wolootu gudumaaleho farcidhe albinni roore soqqantino. Batinyu Qaagooshshu ayyaani woggara, woradu aliidi laꞌꞌaanchi songo towaatanno yannaranna Woxawaajje 2014nnihu baxxino zamachi yannara kaaꞌlaano suwisaano ikkitino. Heedhinoonni gari babbaxxinoha ikkirono, Yihowara woꞌma lubbonni loossinanni heedhinoonnita anfoommo, konni daafira galanteemmoꞌne. (Qol. 3:23, 24) ‘Ammanantine’ loossinanni loosi Yihowa galanteemmo gede assannonke!
Qoleno alamete doyichoha addi addiha tiokiraasenniha gimbaatu looso ‘baxillunni kaꞌine’ loossinoonni daafira galanteemmoꞌne. Yihowa daga kiiro lexxitanni hadhanni noo daafira, gimbaatu loosi ranke loosa hasiissannoho. (Isa. 60:22) Sai diro halashshaanote kiiro lexxite 8,201,545, ikkitino; hattono aganu kiiro Qullaawa maxaafa xiinxallanno manni kiiro mereerimunni 9,499,933 ikkitinota hedde. Halashshaanote kiiro lexxitino daafira, batinye sinu biiro halashsha woy haaroonsa hasiissino. Qoleno tini roore Mangistete Addaraashuwa hasiissanno gede assitino! Hattonni alamete qooxeessira tirote looso loossanno roduuwinke, insa coyidhanno afoo coyiꞌnanni base hadhe hakko heedhe loossanno gede assate tirote loosi biiro hakko mina hasiissino.
Konni daafira, ninkeneeto togo yine xaꞌma dandiineemmo: ‘Gimbaatu looso kaaꞌlate assa dandeemmori maati?’ Mitu gimbaatu looso uminke fajjonni kaaꞌla dandiineemmoha ikkara dandaanno. Gimbaatu looso loosate ogimma noonkerino noonkekkirino, dandiineemmore assine konne hasiisanno looso loosate mabte noonke. (Law. 3:9, 10) Biꞌre xaadooshshu dunkaana seekkini yannara, Isiraeele uminsa fajjonni kakkaꞌe hasiisannore ikkinona agurre yine kulla geeshsha abbitino. (Wol. 36:5-7) Qullaawu Borro giddo noohu togoo lawishshi loosoho kakkaꞌneemmo gede assannonketi dihuluullissannote. Togoohu hasiisanno loosira “baxillunni daafurtine” soqqantinanniti qullaawa soqqanshono Yihowa galanteemmo gede assitannonke!
Qoleno ammanansanni kaajjite uurritino roduuwanke laꞌꞌanke baxxino garinni hagiidhineemmo gede assitannonke. Lawishshaho, Wodiidi Kooriyira noori muxxe roduuwinke noo gara hendo. Hatte gobbara heedhanno wedellooti, Kiristaana ikkansanni kainohunni poletikaho anga wodha gibbanno daafira 1950 jammarre usurranni keeshshinoonni; insa giddo mitu seeda mitu harancho diro usurante noori no. Yannankera noo roduuwinke togoo qarra dandiite kaajjite heedhanni no. Insa dandiite heedhanni noota kulannohu togoo lawishshi ammananke kaajjishannoho!
Ertiraho heedhanno roduuwinke giddo sasu 20 saꞌꞌanno diro usurante no. Wolootu, meya roduuwinkenna qaaqquullinsa qole muli yannanni jammare usurame no. Insa tirranni gede assate lowo geeshsha sharrammoonniha ikkirono, xaa geeshsha tidhaminohu dino. Ammanansa kayinni dishoshshoggitino. Lowo geeshsha dadillisanno coyi iillinsarono, insa Yihowara ammanante heedhanni no. Kuri ammanantino roduuwinkera huuccatto assa hamboonke.—Rom. 1:8, 9.
Addaho, kiꞌne giddo rooru ammanaꞌnenni kainohunni diusurantinoonni. Ikkirono, kiꞌne giddo gamu ordu fayyimma hoonginni woy diru akkallenni kainohunni qarru iillannoꞌne, qoleno ammantannokki maate, galte woy fiixi iillishanno taqaawwumo iillitannoꞌne; hattono kiꞌne calla affinoonni qarri iillannoꞌne. Ikkirono Yihowara ammanantine soqqantinanni heedhinoonni. (Yaaqoobi 1:12) Konni daafira galanteemmoꞌne. Konne dandiitine ammanantine heeraꞌneno Yihowa galanteemmo gede assitannonke.
Ee, ammanantinenna baxillunni loossinanni loosi, hattono qarra dandiitine heeraꞌne ‘danchummasira Yihowa galanteemmo’ gede assitannonke. (Far. 106:1) Baalanka addinta banxeemmoꞌne; Yihowa jawaachishannoꞌne, irkisannoꞌne gedenna hegerera isira soqqantinanni gede maassiꞌrannoꞌne gede huuccineemmo.
Roduuwiꞌne,
Yihowa Farciꞌraasinehu Aliidi Bisi