Qullaawa Maxaafa Seekkine Xiinxalla Dandiinanni Gara

Fonqolu iillannohe yannara Daanieeli gede Maganoho ammanama hasiꞌratto? Daanieeli Maganu Qaale seekke xiinxallino, hattono hawa gede leeltannokki masaalo huwatate woꞌnaalino. (Da 9:2) Qullaawa Maxaafa seekkite xiinxallakki, ammanante heeꞌratto gede kaaꞌlitahera dandiitanno. Hiittonni? Togo assakki, Yihowa eino qaale wonshannota albinni roore addaxxatto gede assitannohe. (Iy 23:14) Hattono, Maganoho noohe baxilli lexxanno gede kaaꞌlitannohe; tini qolte gara ikkinore assatto gede kakkayissannohe. (Fa 97:10) Ikkina, Qullaawa Maxaafa seekkite xiinxalla dandaattohu hiittoonniiti? Hanni aante noo hedo lai.

• Maa xiinxalla hasiissannoe? Songote gambooshshira seekke qixxaawa dancha rosichooti. Lamalannita Qullaawu Maxaafi niwaawe nabbabbanna leellinohekki coyi heeꞌriro, yanna gaaꞌmite tenne hajo daafira seekkite xiinxallakki niwaawekkinni horo afiꞌratto gede kaaꞌlitannohe. Mitu manni Qullaawu Maxaafi giddo kulloonni masaalo daafira, Maganu ayyaani gumi akatta daafira, Phaawuloosi misiyoone ikke soqqamino soqqanshorenna Yihowa kalaqamire lede afate xiinxalla baxanno. Qullaawu Maxaafi ledo xaado afidhino xaꞌmo heedhuhero, hattee xaꞌmo borreessite amaxxite aantanno yannara xiinxalla dandaatto.

• Hiikkonne uduunnicho horoonsiꞌra dandeemmo? Mite doogga afate Maganu Qaali Giddo Noota Muxxe Jiro Afiꞌrate Kaaꞌlanno Uduunnicho yitanno viidiyo lai. Lawishshaho, Daanieeli fooliishsho 7te kulloonni moyichi hiikkonne alamete gashshoote riqiwannoro xiinxalla dandaatto.

• Xiinxallote mageeshshi yanna gaaꞌma hasiissannoe? Qullaawa Maxaafa ganye xiinxalla ayyaanaamittete fayyimmara lowo geeshsha kaaꞌlitanno. Umo harancho yanna xiinxalla dandaatto; hakkiinni hasiisannoha ikkiro, galte hossanni xiinxallatto yanna lexxa dandaatto. Maganu Qaale xiinxalla, maaxantino jiro afiꞌrate umate gedeeti; maaxantino jiro afiꞌritto kiiro ledde uꞌmate kaꞌꞌatto! (La 2:3-6) Hatteente gede, Qullaawu Maxaafi giddo noota muxxe jiro afiꞌritto kiiro, Maganu Qaalira noohe baxilli lexxanno daafira, Qaalesi ganyite xiinxalla rosicho assiꞌratto.—1Ph 2:2.

DAANIEELI FOOLIISHSHO 7TE KULLOONNI MOYICHI MAA RIQIWANNO?

• 

  Da 7:4

• 

  Da 7:5

• 

  Da 7:6

• 

  Da 7:7

WOLE XAꞌMO:

Daanieeli 7:8, 24 woꞌmitinohu hiittoonniiti?

WOLE WOTE:

Yohaannisi Ajuuja fooliishsho 13te kulloonni moyichi maa riqiwanno?