Maganohonna Olliichinkera Baxillu Heeꞌrannonke Gede Assiꞌneemmo Gara

Kiristaanu Muse Seeri hunda nooha ikka hoogirono, Maganonna olliichonke baxa hasiissannonketa kultannoti baalanta roortannoti lame hajajo, Yihowa maa assinammora hasiꞌrannoro xaphi assite kultannonke. (Mt 22:37-39) Togoo baxilli mulla afiꞌnanniha diꞌꞌikkino. Kuni baxilli heeꞌranno gede assiꞌra hasiisannoho. Hiittoonni? Mitte qara doogo Qullaawa Maxaafa barru baala nabbawate. Qullaawa borro giddo kulloonnita addi addita Maganu akatta xiinxallinummoro, Yihowa “danchumma laꞌneemmo.” (Fa 27:4) Tini Maganoho noonke baxilli lexxanno gedenna hedonkeno isite gedeeta ikkitanno gede assitannonke. Tini qolte, Maganu uminke horo agurre wolu mannira baxille leellinshammora hajajinonke hajajo agadhineemmo gede kakkayisannonke. (Yoh 13:34, 35; 1Yo 5:3) Aane noohu sasu coyi Qullaawu Maxaafi niwaawe roore baxissannota assiꞌrate kaaꞌlannoho:

• Nabbawattore seekkite hedi, huwatote bisi kifillakki horoonsiꞌri. Hakko noottohu gede assite hedi. Qooxeessaho noore lai, huuro macciishshi, foole suꞌniissi hattono Qullaawu Maxaafi xagge giddo kulloonni mannira mayi macciishshaminonsaro huwatate woꞌnaali.

  

• Addi addi hayyo horoonsiꞌri. Aanchine kulloonnire horoonsiꞌri: Huurokki naggi assite nabbawi woy qoonqote qaddaꞌnoonni borro macciishshi. Qullaawa Maxaafa fooliishshote aante garinni nabbawantenni, giddosi kulloonni manchi xagge aana woy mitte hajo aanna illachishshe nabbawi. Lawishshaho Yesuusi daafira roore afate Maganu Qaale Xiinxalli yitanno biroshere gafa 4 woy 16 nabbawa dandaatto. Barru qummeeshsha nabbawatto wote qummeeshsha haꞌnoonni fooliishsho woꞌma nabbawi. Qullaawa Maxaafa, borreessinoonni aante garinni nabbawi.

  

• Nabbabbanni noottore huwatate woꞌnaali. Nabbambe gudate yine lowo fooliishsho nabbawantenni, mitto barra mitte fooliishsho nafa ikkituro nabbambenna hiincine huwata woyyitanno. Mamiwaro (hakkawaro noo ikkitonna yanna) wodanchate woꞌnaali. Mitto mittonka coye hedi. Kaartuwanna fiixxanno hedo kultanno qummeeshshuwa horoonsiꞌri. Nabbawatto wote leellinohekkiri giddo ajayi ajeenna mitto coye buuxate xiinxalli. Dandaamannoha ikkiro, nabbawate gaaꞌmootto geeshshi yanna hiincateno gaaꞌma dandaatto.