Kiristaanu Heeshshonna Soqqanshote Xiinxallote Maxaafichora Qummi Assinoonni Borro
© 2024 Watch Tower Bible and Tract Society of Pennsylvania
ARFAASA 6-12
MAGANU QAALI GIDDO NOOTA MUXXE JIRO | FAARSO 127-134
Annuwanna Amuuwa—Muxxe Eltoꞌne Towaata Agurtinoonte
Yihowa Maate Mereero Nooꞌne Qeecha Naadde
9 Yihowa mannaho ooso ilate dandoo uyinonsa; qoleno oosonsa iso baxxannonna isira soqqantanno gede assite lossitara qeecha uyinonsa. Ooso iloottoha ikkiro, tenne baxxitino elto naadatto? Yihowa sokkaasine lowo geeshsha maassiꞌrinonsaha ikkirono, ooso ilate dandoo diuyinonsa. Hakko daafira, ooso ilte lossidhanni noori tenne qoossonsa naada hasiissannonsa. Yihowa annuwatenna amuuwaho oosonsa “Mootichu amaalenni” seejjitanni lossitanno gede jawa qeecha uyinonsa. (Efe. 6:4; Mar. 6:5-7; Far. 127:3) Maganu dirijjite annuwanna amuuwa kaaꞌlate, Qullaawu Maxaafi aana xintaminoha batinye uduunne lawishshaho borro, viidiyo, faarsonna webisayitenke aana fulannore qixxeessitino. Addanko, iimi Anninkenna Beettisi oosonke baxxanno. (Luq. 18:15-17) Annuwunna amuuwu Yihowa addaxxitannohanna muxxe oosonsa towaaxxate dandiiture baala assitannoha ikkiro, Yihowara tashshi yaannosi. Qoleno hatto assitanno annuwinna amuuwi, oosonsano hegerera Yihowa maate wido ikkitanno gede kaaꞌlitannonsa!
Annuwanna Amuuwa—Qaaqquulliꞌne Yihowa Baxxanno Gede Qajeelse
20 Xiinxalla ikke. Faarso 127 qaaqquullu worbichu gede ikkitinota kultanno. (Faarso 127:4 nabbawi.) Worbicho babbaxxinorinni seekka dandiinanni, qoleno geeshshshinsano babbaxxanno; hatteente gede mittu mittunku qaaqqi baxxinoho. Hakko daafira, annuwunna amuuwu mitto mittonka qaaqqo ma garinni qajeelsitannoro afa hasiissannonsa. Lame qaaqquullensa Yihowara soqqantanno gede asse lossiꞌrinori yannanke Israeelera heeꞌranno minaanninna minaama “Mittu mittunku qaaqqira Qullaawa Maxaafa xiinxallinseemmohu addi addinniiti” yiino. Ikkollana mittu mittunku maatete umi, qaaqquulle konni garinni xiinxallisa woyyitannoronna teꞌee mura hasiissannosi.
Maganu Qaalinni Ronseemmore
Yihowara Soqqama Dandaakkinni Hagiidhi!
6 Faarso 131:1, 2tenni annuwunna amuuwu kaajja roso rosa dandiitanno. (Qummeeshsha nabbawi.) Moote Daawiti, ‘jawurira woy wolqaꞌsira aleenni ikkinorira, shembeephannokkita’ coyiꞌrino. Isonooto heeshshi assannohanna dhukasi afinoha ikkasi “harshammonna keere” afiꞌranno gede assitinosi. Annuwunna amuuwu Daawiti coyiꞌrinorinni maa rossanno? Annuwunna amuuwu uminsa assitannorira calla ikkikkinni, oosonsa assitara hasidhanno coyirano quwa saꞌannokkire ikkite, insaneeto heeshshi assitannorenna dhukansa affinore ikkansa leellisha dandiitanno. Insa qaaqqinsa wonshiꞌra dandaanno mixo fushshiꞌranno gede kaaꞌlitanno woyite, assa dandaannorenna dandaannokkire huwattinota afanno gede assite jawaachishshasira dandiitanno. Maarina yinanni rodoo togo yitino: “Amaꞌya sasu roduuwiꞌya ledono ikko wole ooso ledo diheewisiissannoe. Ise ninke mittu mittunkura addi addi dandoo noonketanna Yihowa mitto mittonka baxannonketa rosiissinoe. Tini aneneeto wolootu ledo heewisiiseemmakki gede kaaꞌlitinoe.”
ARFAASA 13-19
MAGANU QAALI GIDDO NOOTA MUXXE JIRO | FAARSO 135-137
“Kaaliiqi Maganna Baalanta Rooranno”
Kiristoosi Maganu Wolqaati
15 Kiristoosira wolqa uyinohu Yihowa umosiiti; konni daafira Duuchanka Dandaanno Magani kalaqamu wolqa woꞌmunni woꞌma illaallisa dandaannota ammana dandiineemmo. Hanni mito lawishsha laꞌno. Baote Wayi daara albaanni Yihowa togo yiino: “Lamalu barri gedensaanni, 40 barranna 40 hashsha woꞌma uullate aana xeena dirriseemmo.” (Kal. 7:4) Hattonni Wolapho 14:21 togo yitanno: “Yihowa wolqaataame soojjaati bubbe abbe baara badhera qole xooqisino.” Yoonaasi 1:4 qolte togo yitanno: “Yihowa baaru aana bayira bubbe abbi; wolqaataamu dambali kaeenna yowolo hiiqqantara kaꞌu.” Yihowa kalaqamu wolquwa hajaja dandaannota afanke jawaachishshannote. Addaho, Uullanke albillitte hiikkitakka yine yaada dihasiissannonke.
Yihowahu Bagamannokki Baxilli Kaaꞌlannonkehu Hiittoonniiti?
16 Yihowa bagamannokki baxille leellishannohu ayeooraati? Qullaawu Maxaafi banxeemmohu lowo coyi noota lawishshaho, “baatto loosiꞌra,” “woyinenna buuro,” “seejjo” hattono “egenno” banxeemmota kulanno. (2 Dud. 26:10; Law. 12:1; 21:17; 29:3) Ikkirono bagamannokki baxille leellinshannihu wole coyibbara ikkikkinni mannaho callaati. Yihowa bagamannokki baxille leellishannohu kayinni baalunku mannira diꞌꞌikkino. Isi konne baxille leellishannohu isi ledo muli jaaloomi noonsariraati. Maganinke jaallasira ammanaminoho. Isi insara dhagge ikkitanno hexxo uyinonsa hattono baxa diagurannonsa.
Maganu Qaalinni Ronseemmore
Yihowahu Bagamannokki Baxilli Kaaꞌlannonkehu Hiittoonniiti?
10 Maganunnihu bagamannokki baxilli hegereho. Maganunnihu bagamannokki baxilli hegereha ikkinota Faarso 136te 26 hinge qummi assinoonni. Hanafote kiiro togo yitanno: “Shaqqado ikkinohura Kaaliiqa galattesi; bagamannokkihu baxillisino hegerehona.” (Far. 136:1) Kiiro 2 kayisse 26te geeshsha “bagamannokkihu baxillisino hegerehona” yitanno. Wole gattino kiiro nabbambeemmo woyite, Yihowa agurikkinni batinye doogganni bagamannokki baxille leellishanno gari dhagge ikkannonke. Duucha hinge yinoonniti “bagamannokkihu baxillisino hegerehona” yitanno yaatto, Yihowahu mannisira noosi baxilli soorramannokkiha ikkinota buuxissannonke. Yihowa soqqamaanosi cincannonsata afanke lowo geeshsha jawaachishshannonke! Isi ammanante soqqantannosire baxa diaguranno; roorenkanni qarru iillannonsa woyite ledonsa ikkanno. Horo afiꞌneemmo gara: Yihowa ledonke ikkannota afanke hagiidhineemmo gede assitannonke; qoleno qarru iillannonke woyite dandiine saꞌꞌate hasiissannonke jawaante afiꞌneemmo gedenna heeshshote doogonni fulleemmokki gede kaaꞌlitannonke.—Faarso 31:7 nabbawi.
Ammanakki Xawisse Kuli
ijwfq birxicho 7
Yihowa Farciꞌraasine Kiristaanaho?
Ee, Kiristaanaho. Korkaatuno:
◼ Yesuusi Kiristoosi rosonna akatasi seekkine harunsate sharrammeemmo.—1 Pheexiroosi 2:21.
◼ Gato afiꞌrate Yesuusa ammana qara coye ikkitinota ammanneemmo; korkaatuno “gatote hasiisannonkehu mannaho uyinoonni suꞌmi gordoho woroonni wolu dino.”—Soqqamaasinete Looso 4:12.
◼ Mittu manchi Yihowa Farciꞌraasincho ikkanno woyite, Yesuusi suꞌminni cuuamanno.—Maatewoosi 28:18, 19.
◼ Huuccatto assiꞌneemmohu Yesuusi suꞌminniiti.—Yohaannisi 15:16.
◼ Labballo baalaho Umu woy roorre noosihu Yesuusa ikkinota ammanneemmo.—1 Qorontoosi 11:3.
Ikkollana, ninke Kiristaanaho yitannote wole ammaꞌnowiinni duucha doogonni baxxinoommoreeti. Lawishshaho, Qullaawu Maxaafi kulanno garinni, Yesuusi Sillaase wido ikkikkinni Maganu Beetto ikkinota ammanneemmo. (Maarqoosi 12:29) Qoleno lubbo reyitannota, Maganu manna hegerera sioolete giira giddo giiranno yaanno rosi kapho ikkinota, hattono ammaꞌnote hajora albisa ikkite soqqantannore wolootuwiinni bande maaragete suꞌminni woshsha hasiissannokkita ammanneemmo.—Rosiisaancho 9:5; Hiziqeeli 18:4; Maatewoosi 23:8-10.
ARFAASA 20-26
MAGANU QAALI GIDDO NOOTA MUXXE JIRO | FAARSO 138-139
Waajjillu Badhera Qoloonkeꞌne!
Songote Mereero Yihowa Guwisidhe
10 Dawaro qoleemmo yite anga kayisate hedattto woyite afale beꞌe yitannohe? Hatto ikkiro, togo macciishshamannohehu ate calla diꞌꞌikkootto. Noore coyiꞌniro, ninke giddo rooriidi dawaro qolleemmo woyite mito geeshshano ikkiro waajjineemmo. Tenne waajja qeeꞌlate, waajjatto gede assinoheri maatiro afa hasiissannohe. ‘Coyiꞌrate hedoommori baꞌꞌannoe woy gara ikkinokkire coyiꞌrammora dandeemmo’ yite waajjatto? Qolatto dawaro wolootu qoltannote geeshsha dancha diꞌꞌikkitanno yite yaadatto? Hatto yite hedakki busha diꞌꞌikkitino. Korkaatuno tini umokki heeshshi assattoha ikkoottotanna wolootu atenni roortannohu gede assite hedattota leellishshanno. Yihowa togoo akata baxanno. (Far. 138:6; Fil. 2:3) Ikkollana Yihowa gambooshshunniwa iso guwisiꞌrattoranna roduuwakki jawaachishattora hasiꞌranno. (1 Tes. 5:11) Isi baxannohe, hattono worba ikkatto gede kaaꞌlannohe.
Songote Gambooshshiwa Mimmito Jawaachishshe
7 Konni albaanni Agarooshshu Shaera fultinota mite hedo wirro xiinxalla kaaꞌlitaꞌnera dandiitanno. Lawishshaho seekkitine qixxaabbe. (Law. 21:5) Seekkitine qixxaabbiniro dawaro qoltinanni woyite hakkeeshshi geeshsha diwaajjitinanni. Hattono harancho dawaro qolle. (Law. 15:23; 17:27) Qoltinanni dawaro harancho ikkituro waajjitinanni gede assannoꞌneri ajanno. Seeda hedo coyiꞌrantenni mitte woy lame coyi fooliishsho calla coyiꞌra roduuwinkeno qolloommo dawaro roore huwattanno gede kaaꞌlitanno. Umikki yaattonni harancho dawaro qola dancha gede qixxaawoottotanna roso seekkite huwatoottota leellishshanno.
Maganu Qaalinni Ronseemmore
Kaote Hexxo Maganu Baxille, Hayyonna Cinca Leellishshanno
13 Aleenni ronsummonte gede Yihowa mitto mancho reyotenni kayisanno woyite surresinna akattasi qolanno. Hatto yaa mayyaatero hanni hedi. Yihowa lowo geya baxannohe daafira hedattore, giddokkita, coyiꞌrattorenna assattore baala laꞌꞌanno hattono qaaganno. Yihowa mitto mancho reyotenni kayisanno woyite surresi, hedosi, akatasinna ayimmasi qolanno. Moote Daawiti Yihowa ninke mitto mittonka seekke afinota huwatino. (Faarso 139:1-4 nabbawi.) Yihowa seekke afinoheta huwatittoro hiitto ikkatto?
Lallawo
Soqqanshonkenni Albinni Roore Hagiidha Dandiineemmo Gara
1 YIHOWA manna ikkinoommo daafira iimi Annankenna manna banxeemmo; hakko daafira mannu iso afanno gede kaaꞌlineemmo. Batinye halashshaano sabbakate looso lowo geeshsha baxxanno. Wolootaho kayinni soqqanshonsanni hagiidha qarra ikkitannonsa. Mayira? Mitootu manna ille qase laꞌꞌa waajjitannoreeti; hattono huxuxxi yitannoreeti. Wolootu koyinsinsakkinni manni minira haꞌra waajjitanno. Mitootu kulleemmore mannu macciishshalla giwi yite waajjitanno. Wolootu mannu ledo giwama qorophitannoreeti. Kuri roduuwi Yihowa lowo geeshsha baxxannoha ikkirono, egentinokki mannira dancha duduwo kula qarra ikkitannonsa. Ikkirono insa kuni loosi lowo geeshsha hasiisannoha ikkinota huwattino; hattono ganyite sabbakkanno. Yihowa insa assitannorinni lowo geeshsha hagiidhannoti dihuluullissannote!
4 Kiristaanu Maganu Qaali giddo noo sokkanni jawaante afiꞌranno. Soqqamaasinchu Phaawuloosi Qolasiyaasi heeꞌranno Kiristaanira borreessino sokkara, halaalu egenno afiꞌra ammanate roduuwisi Yihowara ‘maltino heeshsho heedhanno gedenna, baalunku coyinni dancha guma laaltanno gede kaaꞌlitannonsata coyiꞌrino.’ (Qolasiyaasi Sokka 1:9, 10 nabbawi.) Konni danchu loosi giddo mittu dancha duduwo sabbakate loosooti. Hakko daafira Maganu Qaale nabbambe hiincineemmo woyite, Yihowara noonke ammana kaajjitanno; hattono Maganu Gashshooti sokka mannaho kula lowo geeshsha hasiissannota buunxeemmo.
5 Maganu Qaalinni roore horo afiꞌrate, Qullaawa Maxaafa nabbambeemmo woyite, xiinxallineemmo woyitenna hiincineemmo woyite gawa gawa assa dihasiissannonke. Kuri coyibba assate yanna gaaꞌme. Huwatate qarrissanno hedo heedhuro agurtine saꞌinoonte. Hatteentenni tenne hedo daafira xawishsha afiꞌrate, Yihowa Farciꞌraasineta Xiinxallote Kaaꞌlitanno Borro horoonsidhe. Yanna gaaꞌmitine xiinxallitinanniha ikkiro, Maganu Qaali halaale ikkasi albinni roore addaxxitinanni. (1 Tes. 5:21) Maganu Qaali halaale ikkasi albinni roore buuxxiniro rossinoonnire mannaho kula roore baxissannoꞌne.
SOQQANSHOTE DANCHA GEDE QIXXAABBE
6 Soqqanshote dancha gede qixxaambeemmoha ikkiro, manna hasaawinseemmo woyite hakkeya diwaajjineemmo. Yesuusi rosaanosi soqqanshote soyansara albaanni, balaxxe qixxaabbanno gede kaaꞌlinonsa. (Luq. 10:1-11) Insa Yesuusi rosiisinonsare assitino daafira dancha gede soqqantino hattono lowo hagiirre afidhino.—Luq. 10:17.
7 Soqqanshote qixxaawa dandiineemmohu hiittoonniiti? Kulleemmo halaale uminke yaattonni dancha gede assine xawinse kula dandiineemmo gara heda hasiissannonke. Qoleno qoqqowinkera heeꞌranno manni macciishsha giwe coyiꞌrannoha lame woy sase coye hedanna dawaro mayine qolleemmoro rosiisiꞌra hasiissannonke. Hakkiinni manna wodanaaꞌminenna faasiinqe hasaawisate woꞌnaalleemmo.
8 Soqqamaasinchu Phaawuloosi ammanate roduuwisira, “Kuni miinji doru uduunnichi giddo no” yiino. (2 Qor. 4:7) Kuni miinji maati? Sabbankeemmote heeshsho gatissannote Maganu Gashshooti sokkaati. (2 Qor. 4:1) Doru uduunnichi maatiyya? Wolootaho dancha duduwo kultannore Maganu soqqamaanooti. Phaawuloosi yannara daddalaasine lowo waaga afiꞌrino uduunnicho yaano sagale, woyinete xajjenna woxe bayichunni bayicho adhite hadhannohu dorunni loonsoonni uduunnichira worteeti. Hatteente gede Yihowa lowo waaga afiꞌrinoha dancha duduwo duduwate looso eeggo uyinonke. Yihowa kaaꞌlonni tenne sokka ammanamme kulate hasiissannonke jawaante afiꞌra dandiineemmo.
WORBUULLE IKKATE YIHOWA HUUCCIDHE
9 Mito woyite manna waajjineemmoha ikkara dandaanno. Manna waajja qeeꞌla dandiineemmohu hiittoonniiti? Hanni sabbakkannokki gede hajanjinsata soqqamaasine mayite huuccidhinoro laꞌno. Insa waajjite agurantenni, “Soqqamaanokki qaalekki waajjitukkinni jawaatte kultanno gede assi” yite Yihowa kaaꞌlannonsa gede huuccidhino. Yihowano huuccattonsara bayichonkonni dawaro qolino. (Soq. 4:18, 29, 31) Ninkeno mito woyite manna waajjineemmoha ikkiro, kaaꞌlannonke gede Yihowa huucciꞌra hasiissannonke. Manna waajjitinikkinni dancha duduwo kulate, mannaho nooꞌne baxilli lexxanno gede kaaꞌlaꞌnera Yihowa huuccidhe.
10 Yihowa Farciꞌraasinesi asse shoominonke; hattono worbuulle ikkineemmo gede kaaꞌlannonketa kule qaale eino. (Isayaasi 43:10-12 nabbawi.) Hanni isi ninke kaaꞌlannota shoole doogga laꞌno. Umihunni, dancha duduwo dudumbeemmo woyite woꞌmanka woyite Yesuusi ledonke heeꞌranno. (Mat. 28:18-20) Layinkihunni, Yihowa kaaꞌlitannonke gede sokkaasine shoomino. (Aju. 14:6) Sayikkihunni, Yihowa ronsoommore qaangeemmo gede kaaꞌlannonkeha qullaawa ayyaanasi aannonke. (Yoh. 14:25, 26) Shoolkihunni, Yihowa ledonke soqqantannore ammanate roduuwanke uyinonke. Yihowanna ammanate roduuwinke kaaꞌlitannonke daafira worbimmatenni soqqanshonke umo fushsha dandiineemmo.
ARFAASA 27–AMMAJJE 2
MAGANU QAALI GIDDO NOOTA MUXXE JIRO | FAARSO 140-143
Huuccattoꞌne Ledo Sumuu Yaannore Asse
“Egennaamu Coyiꞌrannore Macciishshi”
13 Amaale Maganu baxannoꞌneta leellishanno doogo gede assitine laꞌe. Yihowa ninkera woyyannore malanno. (Law. 4:20-22) Isi Qaalisi, Qullaawu Maxaafi aana xintantino borro widoonni woy ayyaanaamittetenni gikki yiino rodii widoonni amaalannonke woyite baxannonketa leellishanni noonke. Ibiraawoota 12:9, 10 isi tenne assannohu “ninkera seyara yee” ikkinota kultanno.
14 Amaallanniꞌne gara ikkikkinni amaale illachishshe. Mito woyite, amaalloonninke gari didanchaho yine hendeemmoha ikkara dandaanno. Hige amaalanno manchino amaale macciishshe adha qarra ikkitannokki garinni amaalate woꞌnaala hasiissannosi. (Gal. 6:1) Mittu manchi amaalinonke gari baxisa hooginkero nafa amaale illachisha hasiissannonke. Ninkeneeto togo yine xaꞌma dandiineemmo: ‘Amaalloonnie gari baxisa hoogiero nafa amaaletenni afiꞌreemmo rosi no? Amaalie manchi soꞌro agure amaale illachisha dandeemmo?’ Amaallanninke amaale baalantenni horo afiꞌrate woꞌnaala hayyote.—Law. 15:31.
w10 3/15 32 guf. 4
Tenne Goofimarchu Yannara “Keeraanchu Wodani” Heeꞌroꞌne
Mite Maganu soqqamaano, mannu giwinonsahura, angate anjenna dhibbu waadinonsahura hexxo mudhitino. Togoo fonqoli wodaninsa daafuranno gede assinonsa woyiti no. Moote Daawitirano togoo coyi tuncu yiinosi daafira, “Kunninni kainohunni hexxo mudhate gamba yee, lowo geeshsha shetoommo” yiino. (Far. 143:4) Daawiti togoo qarra dandee saꞌꞌanno gede kaaꞌlinosiri maati? Daawiti, Maganu mannasi towaatino garanna iso umosino gatisinosi gara hedino. Isi Yihowa Bayiru suꞌmisira yee assinore hiincino. Daawiti Maganu loosi daafira ganye hiincanno. (Far. 143:5) Ninkeno Kalaqaanchinke daafira, isi konni albaanni assinonkerenna xaano assanni noonkere hiincanke, qarru yannara nafa wodananke agadhineemmo gede kaaꞌlitannonke.
w15 3/15 32 guf. 2
‘Mooticha Ammaninohu’ Ledo Calla Adhama—Yannankera Ikkannoreeti?
Mito woyite faarsaasinchu Daawiti gede togo yitine heddinanniha ikkara dandaanno: “Kaaliiqaꞌya ballo, hexxoꞌya baala baꞌinona, keeshshittokkinni macciishshie; alba [goꞌlitootie].” (Far. 143:5-7, 10) Togoo yannara iimi Anniꞌne kiꞌnera hedinore leellishaꞌne geeshsha cincitine agadhe. Yanna gaaꞌmitine Qaalesi nabbabbinenna nabbabbinoonnire hiincitine hatto assa dandiitinanni. Hatto assitiniro hajajosi huwattinanni hattono isi hunda mannisira yee assinore wodanchitinanni. Yihowa macciishshitiniro isira hajajama hayyo ikkitinota albinni roore huwattinanni.
Maganu Qaalinni Ronseemmore
Halaalu Magansiꞌra Hagiirriꞌne Lexxanno Gede Assitanno
7 Yihowa huucciꞌneemmo woyite iso magansiꞌnanni heeꞌnoommo. Qullaawu Maxaafi, huuccattonke umo xaadooshshu dunkaani giddo gedensoonni kayinni qullaawu mini giddo shiqinshannihu dancha gede qixxeessinoonni hixaani gede ikkitinota kulanno. (Far. 141:2) Konni hixaani suꞌniilli Magano lowo geeshsha hagiirsiisanno. Hatteente gede giddonkenni kaꞌne huucciꞌneemmoti harancho huuccatto nafa “tashshi assitannosi.” (Law. 15:8; Mar. 33:10) Yihowa banxeemmositanna galatu noonketa kulleemmosi woyite macciishsha hagiirsiissannosi; togo yineemmo gede assannonkehu ikkadu korkaati noonke. Isi huluullinonkere, hexxineemmo coyenna halchonke kullammosira hasiꞌranno. Huuccatto assiꞌnammora albaanni mayine huucciꞌneemmoro seekkine heda hasiissannonke. Hatto assanke iimi Anninkera dancha ‘hixaana’ shiqishiꞌneemmo gede kaaꞌlitannonke.
Ammanakki Xawisse Kuli
ijwfq birxicho 21
Mundee Adhitinannikkihu Mayiraati?
Duuchu manni hedannota soꞌrote hedo
◼ Soꞌrote hedo: Yihowa Farciꞌraasine dhiwanturo dixagisidhanno.
Halaale: Uminkerano mininke mannirano roore woyyitino xagga afiꞌra hasiꞌneemmo. Dhiwammummoro dancha gede xagisanna mundee adhinummokki darte gowa dandiitanno akimootiwa haꞌneemmo. Xaginsanni ogimma albinni roore woyyitanni hadhino gari hagiirsiisannonke. Isinni akimootu Yihowa Farciꞌraasine kaaꞌlate yite hanaffinoti mundee uyinikki xagisate ogimma, xaa yannara dagooma woꞌmanka kaaꞌlitanni no. Yannankera, duucha gobbara mannu mundee adhikkinni xagisiꞌra doodha dandaanno; konni garinni mundeetenni saꞌꞌanno dhibbinni, wolu manchi mundee bisinke ledo sumuu yaa hooggeenna kalaqamanno qarrinninna akimootu sodheenna kalaqamanno qarrinni gata dandaanno.
◼ Soꞌrote hedo: Yihowa Farciꞌraasine, mittu manchi ammanatenni calla hura dandaanno yitanno.
Halaale: Maalaletenni hurreemmo yine diagadhineemmo.
◼ Soꞌrote hedo: Mundee nookkiha uyinanni xagga waaga lowote.
Halaale: Mundee nookkiha uyinanni xagga lowo woxi fulannota gatissanno.
◼ Soꞌrote hedo: Diru dirunku lowoti Yihowa Farciꞌraasine, qaaqquullu nafa gatikki mundee adha gibbe reyitanno.
Halaale: Tini taje nookki yaattooti. Darte gobbanno akimooti duucha higge mundee nookkiha darte gobbino; lawishshaho, wodananna miqicho nafa darte gowa dandiitino; qoleno gawajjamino biso murte hoolte wole wora dandiitino. Roore woyite, mundee adhikkinni xaginsoonni manni, qaaqquulluno gatikki, mundee adhitinori ledo taalo woy insanni roore dhaabbatanno. Ikkihano ikkiro, mittu manchi mundee adha hoogino daafira reyannota woy mundee adhino daafira calla gatannota afinohu dino.
Yihowa Farciꞌraasine mundee adhitannokkihu mayiraati?
Tini xagisiꞌrate hajo ikkitukkinni ammaꞌnonke ledo xaadooshshe afidhinote. Akkalu Gondoorino ikko Haaru Gondoori giddo, mundeetewiinni xeertiꞌra hasiissannonketa xawinse kulloonni. (Kalaqama 9:4; Leewaawoota 17:10; Marro 12:23; Soqqamaasinete Looso 15:28, 29) Qoleno Maganu albaanni mundee heeshshote yaate. (Leewaawoota 17:14) Konni daafira, mundee adhineemmokkihu Maganoho hajajammeemmo daafira calla ikkikkinni heeshshote Buicho ikkinoha Iso ayirrinseemmo daafiraati.
Hedonsa soorrantino
Bashsho ikkiro akimootu mundee adha giwa woy mundee nookkiha xagisiꞌra meessi lubbo anfanni heeꞌnenni shaate gedeeti yite heddanno; xa kayinni hatto yite heda agurtino. Lawishshaho 2004nni, mitte akimootu borro “Yihowa Farciꞌraasine xagisate horoonsiꞌnanniti batinye ogimma muli dirrara rosantino ogimma ikkitanno” yitino. Qoleno Wodana, Shombonna Mundeete Doyicho Amanyoote (Ingilizete Afoo) yinanni borro 2010nni togo yitino: “‘Mundee nookkiha dare gowate ogimma’ akimootu Yihowa Farciꞌraasinera calla ikkikkinni woꞌmanka woyite horoonsiꞌrate woꞌnaala hasiissannonsa.”
Xaa yannara alamete deerrinni lowo kume ikkitanno dokterooti, biso dare gowate lowo mundee duꞌnantannota hooltanno ogimma horoonsidhanno. Mundee nookkiha xaginsannita tenne ogimma akimootu angate anje noo gobbuwara nafa horoonsidhanni no; qoleno Yihowa Farciꞌraasine ikkinokkihu batinyu manni konni garinni xaginsansara maahoyye yiino.
AMMAJJE 3-9
MAGANU QAALI GIDDO NOOTA MUXXE JIRO | FAARSO 144-146
“Kaaliiqi Maganonsa Ikkino Manni Baꞌraaꞌrinoho”
Nabbawaano Xaꞌmitanno Xaꞌmo
1. Tenne faarsora qooxeessaho no hedo. Kiiro 12 kayise 14 kulloonni atoote afidhannori kiiro 11 kulloonni ‘allaggi anganni gatisannonsa gede’ huuccidhu keeraanooti. Kiiro 15 noo hedono tenne leellishshanno; konni qummeeshshira “baꞌraaꞌrinoho” yinihu ‘Yihowa Maganonsa ikkino mannaati.’
2. Hatto yee heda, Maganu ammanantinosire maassiꞌrannota kultannote wole qummeeshshuwa ledo sumuu yitanno. Tini faarso, Faarsaasinchu Maganu Israeele baarigaarransa anganni gatise fushshi gedensaanni hagiirrenna atoote afidhanno gede asse maassirannonsata addaxxannota leellishshanno. (Lew. 26:9, 10; Mar. 7:13; Far. 128:1-6) Lawishshaho, Marro 28:4 togo yitanno: “Godowiꞌne gumi, baattoꞌne laalchi, jajjabbunna hooffille saadaꞌneno maassantanno.” Daawiti beetti Selemooni gashshooti yannara Israeelete daga hakkuyira albaanni afidhe egentinokki salaamenna atoote afidhino. Qoleno Selemooni gashshooti giddo ikkinori giddo mitu Mesihichu gashshooti yannara ikkannore leellishanno.—1 Mot. 4:20, 21; Far. 72:1-20.
Hexxoꞌne Kaajjishidhe
16 Hegere heeshsho hexxonke Maganu uyinonkete muxxe eltooti. Tini dhagge ikkitanno hexxo woꞌmitannota dihuluullammeemmo. Hexxonke mokkollichu gede ikkite, qarrunna dartu iillannonke woyite wodanaaꞌmineemmo gedenna reyo nafa waajjineemmokki gede kaaꞌlitannonke. Qoleno hexxonke gulleete gede ikkite hedonke agartannonke; tini busha coye gimbe dancha coye assineemmo gede kaaꞌlitannonke. Qullaawu Maxaafi aana xintantino hexxonke Maganunniwa shinqeemmo gedenna isi mageeshshi geeshsha baxannonkero huwanteemmo gede kaaꞌlitannonke. Woꞌmanka woyite hexxonke xabbe leeltanno gedenna kaajjado ikkitanno gede assiꞌranke lowo geeshsha kaaꞌlitannonke.
17 Soqqamaasinchu Phaawuloosi Roomaho heeꞌranno Kiristaanira borreessino sokkara “Hexxotenni hagiidhe” yee jawaachishinonsa. (Rom. 12:12) Phaawuloosi ammaname heeꞌriro iima hegere heeshsho afiꞌrannota afino daafira hagiidha dandaanno. Ninkeno Yihowa eino qaale wonshannota addaxxineemmo daafira hexxonkenni hagiidha dandiineemmo. Faarsaanchu togo yee borreessino: “Maganosi Kaaliiqa hexxino manchira tashshi yoosi. Isi woꞌmanka woyite gondoorosi agaranno.”—Far. 146:5, 6.
Addu Hagiirre Afiꞌnanni Gede Assannohu Hiittoo Baxilleeti?
19 Mannu ooso Sheexaanu alame giddo 6,000 meddi yaanno diro qarrantanni keeshshitino; Sheexaanu alame baꞌꞌa yanna rakkino. Uullate aana quwa sae umonsanna woxe baxannohu, hattono maalaamittete hagiirre calla hasiꞌranno manni woꞌmino. Kuni manni afiꞌranno coyi daafira calla hedanno, hattono uminsa hasatto calla wonshiꞌra hasiꞌranno. Togoo manni horonta hagiirraamma ikka didandaanno. Faarsaasinchu yiino garinni, hagiirraamo ikkannohu ‘Yaiqoobi Magani kaaꞌlaanchosi ikkinohonna Maganosi Yihowa’ hexxanno manchooti.—Far. 146:5.
20 Yihowa dagara Isira noonsa baxilli yannate kiiro lexxanni no; qoleno Yihowa magansiꞌranno manni kiiro lexxitanni no. Tini qolte Maganu Mangiste gashshite nootanna muli yanna giddo mannu oosora dhagge ikkanno atoote abbitannota leellishshanno. Yihowa fajjo assanna iso hagiirsiisa geedannohanna addu hagiirre afiꞌneemmo gede assitannonke. Yihowa baxxannori hegere geeshsha hagiirraamma ikkitanno! Aane noo birxichira quwa sae umonsa baxanno mannira noonsata mite busha akatta laꞌneemmo, hattono Yihowa soqqamaanora noonsata dancha akatta ronseemmo.
Maganu Qaalinni Ronseemmore
6 Yihowa maalaamittete hasiisannonkere aannonkehu baxannonke daafiraati. Hanni Yesuusi Maatewoosi 6:25, 26 yiinore laꞌno. (Qummeeshsha nabbawi.) Isi kalaqamu daafira kulanno lawishsha horoonsiꞌrino. Yesuusi ceate daafira kulanni togo yiino: “Insa wixa diwixidhanno, dimixxitanno, woy gootaaraho diduuꞌnitanno.” Ikkirono isi hakkiinni aane, “Iimi Anniꞌne itisannonsa” yiinota wodanche. Hakkiinni Yesuusi “Ikkina kiꞌne cea diroortinanni?” yee xaꞌmino. Ninke tennenni maa ronseemmo? Yihowa iso magansidhannore saadatewiinni lowo geeshsha roorse laꞌꞌanno. Yihowa saadate hasiisannonsare ee towaatannonsaha ikkiro, ninkeno towaatannonketa addaxxa dandiineemmo! Mittu baxillaanchu anni gede Yihowa maatesi baxillunni towaatanno.—Far. 145:16; Mat. 6:32.
Lallawo
lmd guwuursha A naxiwe 7
Galte minaannase godowinta ayirrisa hasiissannose.—Efe. 5:33; Qol. 3:18.
AMMAJJE 10-16
MAGANU QAALI GIDDO NOOTA MUXXE JIRO | FAARSO 147-150
Yihowa Guwisiꞌneemmo Gede Assannonkehu Batinyu Coyi No
Yahi Guwisiꞌra Hasiissannohu Mayiraati?
5 Yihowa Israeelete gaꞌre xaphoomunni sheshifachishinoha calla ikkikkinni, Israeelenniha mitto mittonka mancho sheshifachishino. Yannankerano isi hatto assanno. Faarsaasinchu Maganu daafira togo yee borreessino: “Wodana hiiqqantinore dhaawannonsa; madansarano gaga gananno.” (Far. 147:3) Ee, Yihowa dhiwammeemmo woy yaandeemmo wote towaatannonke. Yihowa sheshifachishannonke, hattono yaandeemmo wote jawaachishannonke. (Far. 34:18; Isa. 57:15) Isi iillannonke qarra baala dandiine saꞌneemmo gede hayyonna jawaante aannonke.—Yai. 1:5.
6 Faarsaasinchu hakkiinni aanche iima noo kalaqamire kulino; Isi Yihowa ‘beeddahete kiiro egenninotanna’ ‘mitte mittenta suꞌmisenni woshshannota’ coyiꞌrino. (Far. 147:4) Isi iimi kalaqamire kulasi coyiꞌranni noori ledo xaadannokkiha lawara dandaanno; ikkina faarsaasinchu togo assinohu mayiraati? Hanni tenne hedi: Faarsaasinchu beeddahe illesinni laꞌꞌa dandaannoha ikkirono mageeshshi geeshsha lowotero gude afa didandaanno. Ikkollana, yannankera sayinse lowo beeddahe noota buuxxino. Mitootu Milki Weyi yinanni gaalaakse woy beeddahete kuuso giddo calla lowo biliyoone ikkitanno beeddahe no yite heddanno. Hattono kalqete alamera lowo tiriliyoone ikkitanno gaalaaksuwa no yine hendanni! Ee, ninke mageeshshi beeddahe nooro kiirre gunde dianfeemmo. Kalaqaanchu kayinni mitte mittente beeddakkora suꞌma fushshino. Togo yaa Yihowa mitte mittenta beeddakko bade afino yaate. (1 Qor. 15:41) Uullate aana heedhannota mannu oosona? Mitte mittenta beeddakko noo bayicho bade afino Magani, ati mama noottoro, wodanikkira noori maatironna mayi hasiissannohero seekke afino!
Yahi Guwisiꞌra Hasiissannohu Mayiraati?
7 Yihowa heeshshonke giddo iillinonke qarra afannoha calla ikkikkinni, qarru giddonni fushsha dandaanno wolqa noosi; hattono mararannonke. (Faarso 147:5 nabbawi.) Iillinohe qarri wolqakkira aleenni ikkinohunna duhikki duqqa dandaattokkiha ikkinohu gede assite hedattora dandaatto. Ikkollana, Maganu dhukikki mageeshshihoro afino; isi ‘bushsha ikkakki dihawanno.’ (Far. 103:14) Guuntete xeꞌne noonke manna ikkinoommo daafira, mitte soꞌro marro marro hinge loonseemmo. Hendummokki koffi assannore coyiꞌne, maalu yortonni amadamme woy mannire hinaanse gedensaanni gaabbinoommo woti heeꞌrara dandaanno. Yihowa togoo soꞌro loosannokkiha ikkirono, wolqasi bayira ikkitinohura ninke gari leellannosi!—Isa. 40:28.
Yahi Guwisiꞌra Hasiissannohu Mayiraati?
18 Faarsaasinchu, Yihowa hundi dagasi mageeshshi geeshsha baxannoro afino. Maganu “qaalesi” hattono ‘wogasinna seerasi’ aannohu insara callaati. (Faarso 147:19, 20 nabbawi.) Yannankera Maganu suꞌminni woshshammeemmori ninke calla ikkinoommo daafira maassammoommoreeti. Yihowa afa, Qaalisi garinni heeꞌra, hattono isi ledo dancha jaalooma kalaqira kaajja qoossooti. Faarso 147 borreessi faarsaasinchinte gede ninkeno ‘Yahi Guwisiꞌneemmohu’, hattono wolootu iso guwisidhara jawaachinsheemmo gede assannonkehu batinyu korkaati noonke.
Maganu Qaalinni Ronseemmore
Kiristaanu Songo Qinaabbinohu Hiittoonniiti?
3. Mittu mittunku Yihowa Farciꞌraasinchi qeechi maati?
Songote giddo noori baalunku addi addi doogonni ‘Kaaliiqi suꞌma galattanno’; lawishshaho songote gambooshshi yannara dawaro qoltanno, kifilla shiqishshanno, hattono faarso faarsitanno; qoleno wolqansa assitu deerrinni mannaho halaale kultanno.—Faarso 148:12, 13 nabbawi.
Lallawo
Yihowa Huuro Macciishshe
7 Maatewoosi 17:1-5 nabbawi. Yihowa iima heeꞌre layinkimeeshsho coyiꞌrinohu, Yesuusira “danisi wole ikki” yannaraati. Yesuusi, Pheexiroosi, Yaiqoobinna Yohaannisi ledo mitto jawa ilaala haꞌrino. Hakkiicho, insa mitte dhagge ikkitanno ajuuja laꞌino. Yesuusi albi arrishshote gede ikke xawino, hattono uddanosi waajjo qoffe ikkite caabbichimma xabbino. Musenna Eeliyaasi riqiwannohu lamu manni, Yesuusi reyannotanna reyotenni kaꞌꞌannota coyiꞌra hanaffino. Hakka woyite, sasenti soqqamaasine goxxe nooha ikkirono, goxichunni baqqi yitu yannara tenne dhagge ikkitanno ajuuja laꞌino. (Luq. 9:29-32) Hakkiinni waraꞌa yee xawanno gomichi golinonsa, hattono gomichu giddonni Maganu huuro macciishshitino! Yihowa Yesuusi cuuami yannara assinonte gede, xaano Beettosi baxannotanna isi hagiirsiisinosita xawisino; Yihowa “Hagiirsiisannoehu baxeemmo Beettiꞌya konneeti” yiino. Tenne yannara kayinni Yihowa “Isi [Yesuusi] yaannota macciishshe” yiino.
8 Tini ajuuja Yesuusi Maganu Mangiste Moote ikkanno woyite afiꞌranno ayirrinyenna wolqa leellishshannote. Tini, Yesuusi qarranna shetto adhanno woyitira jawaantenna wolqa ikkitinositi dihuluullissannote. Qoleno tini ajuuja, Yesuusi rosaanora ammanansa kaajjishshino; hattono ammanamansa fonqolannoriranna albillitte loossannohu lowo loosira jawaante ikkitinonsa. Mitu 30 diri gedensaanni, soqqamaasinchu Pheexiroosi Yesuusi dani soorramino yannare coyiꞌrino; tini isi hatte ajuuja hawinokkita leellishshanno.—2 Phe. 1:16-18.
9 “Isi yaannota macciishshe.” Yihowa Beettisi rosiisinore macciishshinammoranna isira hajajammammora hasiꞌrannota xawisino. Yesuusi uullate aana noo yannara maa rosiisino? Yesuusi ninke harunsa hasiissannonkeha lowo roso rosiisino! Lawishshaho, isi rosaanosira dancha duduwo dudubbanno gara rosiisinonsa; hattono baqqi yite agadhitanno gede duucha hige qaagiissinonsa. (Mat. 24:42; 28:19, 20) Qoleno hegere heeshsho afiꞌrate sharrantannonna hexxo mudhitannokki gede jawaachishinonsa. (Luq. 13:24) Yesuusi, harunsaanosi insa insanaawa baxantanno gede, mittimmansa agadhite heedhanno gedenna hajajosi harunsitanno gede luphi asse kulinonsa. (Yoh. 15:10, 12, 13) Addanko, Yesuusi uyino amaale kaajjate! Tini amaale hunda heeꞌrino mannano ikko xaa yannara noo manna kaaꞌlitannote.
10 Yesuusi togo yiino: “Halaalu widoonni uurrinohu qaaleꞌya macciishshanno.” (Yoh. 18:37) “Kiꞌne kiꞌneneewa koffi yitinoonni coye baala cincatenni agurre” yitanno amaale harunsineemmoha ikkiro, Yesuusi huuro macciishshinanni heeꞌnoommo. (Qol. 3:13; Luq. 17:3, 4) Qoleno ‘injiinkerono injaa hooginkerono’ dancha duduwo diinaggaambe dudumbeemmoha ikkiro, Yesuusi yaannore macciishshinanni heeꞌnoommo.—2 Xim. 4:2.
11 Yesuusi, “Geꞌreewiꞌya huuroꞌya macciishshanno” yiino. (Yoh. 10:27) Yesuusi harunsaano isi huuro macciishshitannohu isi rosiisinore wodanaho wodhite calla ikkikkinni isi rosiisinore harunsiteeti. Isi harunsaano ‘tenne alame heeshshora yaaddanni’ hedonsa billaallitanno gede diassidhanno. (Luq. 21:34) Hatteentenni, insa qarru iillannonsa yannara nafa, heeshshonsa giddo Yesuusi hajajo balaxisiissanno. Batinyu roduuwinkera buutote qarri iillanni noonsa; insa giddo mitoota gibbannonkeri xiibbannonsa, angate anje amaddinonsa, hattono kalaqamu dano iillitannonsa. Iillannonsa fonqoli ikki geeshshiha ikkirono, insa Yihowara ammanantino. Yesuusi insa togo yee sheshifachishino: “Hajajoꞌya adhannohunna wonshannohu baxannoeho; ane baxannoha Anniꞌyano baxannosi.”—Yoh. 14:21.
AMMAJJE 17-23
MAGANU QAALI GIDDO NOOTA MUXXE JIRO | LAWISHSHA 1
Wedella—Aye Yaannore Macciishshitinanni?
Mittu Coyino Baꞌraarsha Adhitinannikki Gede Guficho Ikkoonkeꞌne
16 Ati wedellichahoro, annikkinna amakki hedokki huwatannokihanna eo fulo hoꞌlinoheha lawahera dandaanno. Isinni, insanni kainohunni lowo geeshsha giiramootto daafira, Yihowara soqqama agurittoro woyyannoha lawahera dandaanno. Ikkollana, konninni kainohunni Yihowara soqqama agurittoro, galte hosse annikkinna amakki, hattono songote giddo noo roduuwi geeshsha atera wodaninni kae hedannohu nookkita huwatakki digatanno.
17 Annikkinna amakki horo seejjannohekkiha ikkoommero, insa baxxannoheta dihuluullamatto? (Ibi. 12:8) Hanqisinohehu annikkinna amakki amaalinohe gari ikkara dandaanno. Insa amaalinohe gari aana illachisha agurte mayira amaalinohero hedate woꞌnaali. Wodanaaꞌmite hedi, hattono insa seejjitannohe wote quwa saꞌe hanqitooti. Maganu Qaali togo yaanno: “Egennaamu manchi batinyere dicoyiꞌranno; wodancha afiꞌrino manchi geinoho.” (Law. 17:27) Seejjinoonnihe gari ikkihano ikkiro, hattee seejjo macciishshi; hatto assittoro geoottoha woy egennaamo ikkoottota leellishatto. (Law. 1:8) Yihowa baxanno annanna ama afiꞌra atoote ikkitinota deꞌooti. Insa ati hegere heeshsho baꞌraarsha afiꞌratto gede kaaꞌla hasidhanno.
w05 2/15 19-20 guf. 11-12
Kiristaanu Ayimmanke Agadhino
11 Manna ikkikkinni Magano hagiirsiisate sharramme. Ayimmanke leellishate yine mitte gaamo wido ikka nooreentilla. Baalunku mannira jaalu hasiisanno; wolootu ledo jaalooꞌma qole hagiirsiissanno. Wedellimmate yannarano ikko hakkunni gedensaanni, darawonke qarrissankera dandiitanno; tini qolte woloota lambeemmo gede woy insa hagiirsiisate kaꞌneemmo gede assitankera dandiitanno. Kayi jaallanna darawo woꞌmanka woyite ninke daafira heddanno yaa didandiinanni. Mito woyite insa hasidhannohu bunshe assate kaaꞌlamannonsa mancho callaati. (Lawishsha 1:11-19) Mittu Kiristaanchi jaallasi gara ikkinokkire assanno gede xixxiibbeennasi tennera qeelamiro, duucha woyite ayimmasi maaxate woꞌnaalanno. (Faarso 26:4) Soqqamaasinchu Phaawuloosi, “tini alame huntaꞌnera wodhitinoonte” yee qorowisiisinonke. (Roomu Sokka 12:2) Yihowa tenne alame lambeemmo gede xixxiimbanninketa dandiine saꞌꞌate hasiissannonke jawaante aannonke.—Ibiraawoota 13:6.
12 Mannu gara ikkinokkire assineemmo gede xixxiiwinonkehura Kiristaanu ayimmanke baꞌaraati yine hendummoro, mannu hedonni woy batinyu manni yaannorinni roore Maganoho ammanama lowo geya hasiissannota ikkitinota qaaga hasiissannonke. Fulo 23:2te noohu “Bunshe loosannoha woy halaale dawisanno manni batinye laꞌe hoodensa hadhooti” yaannohu xintu seeri kaaꞌlannonke. Batinyu Israeelete manni Yihowa uyino hexxo wonsha dandaannota huluullami yannara, Kaaleebi insa wido ikka effire giwino. Isi Maganu uyino hexxo hawaqiꞌnannita ikkitinota woꞌmunni woꞌma ammanino; hatto assasinnino lowo atoote afiꞌrino. (Kiiro 13:30; Iyyaasu 14:6-11) Kiꞌneno Maganu ledo nooꞌne jaaloomi baꞌꞌannokki gede agadhate batinyu manni hedo huntannoꞌnekki gede gargadhitinanni?
Maganu Qaalinni Ronseemmore
Addu Hayyo Qoonqose Naggi Assite Woshshitanni No
7 ‘Egenno xeꞌinonsari’ baalanka coye ammantanno hattono dogantanno. (Law. 14:15) Soqqammeemmo woyite togoo manna duucha hinge xaandeemmo. Hanni ammaꞌnote massagaano woy poletiku massagaano dogginonsahu lowo miliyoone ikkanno manni daafira hedi. Mitootu togoo massagaano lowo diro dogginonsata affanno woyite lowo geeshsha giirantanno. Kayinni Lawishsha 1:22 kulloonni manni uminsanni baxe egenno noonsakkire ikka doodhino. (Erm. 5:31) Insa wodaninsa yiinore assa baxxanno; hattono Qullaawu Maxaafi rosiisannore rosa woy Qullaawu Maxaafi biddishshira hajajama dibaxxanno. Batinyu manni Kanaadaho Kiwubeeki yinanniwa heedhannoti ammaꞌnosera laalaattannoti mitte mancho coyidhino hedo ledo sumuu yaanno; ise mittu Yihowa Farciꞌraasinchi hasaawisise woyite, “Qeesichinke doginkero tini isi soꞌrooti ikkinnina ninketa diꞌꞌikkitino!” yitino. Afanni heeꞌrenni egenno xeꞌinonsare ikkino manni gedeere ikka hasiꞌneemmokkiti egennantinote!—Law. 1:32; 27:12.
AMMAJJE 24–BADHEESSA 2
MAGANU QAALI GIDDO NOOTA MUXXE JIRO | LAWISHSHA 2
Hojju Xiinxallo Assiꞌrate Diinaggaawa Hasiissannoꞌnehu Mayiraati?
‘Halaalunni Heedhe’
16 Nabbawanna xiinxalla banxeemmori ninke baalanko yaa diꞌꞌikkino. Ikkirono Yihowa halaale seekkine huwanteemmo gede egenno ‘jawaante hasiꞌnammora’ koyisinonke. (Lawishsha 2:4-6 nabbawi.) Togo assate sharramanke woꞌmanka woyite kaaꞌlitannonke. Koori yinanni rodii Qullaawa Maxaafa nabbawanno woyite mitto mittonka qummeeshsha seekke illachishannota coyiꞌrino. Isi togo yiino: “Mitto mittonka lekkaalliidi qaagiishshanna fiixxanno hedo kultanno qummeeshshuwano laeemmo hattono lede xiinxalleemmo. . . . Konni garinni nabbawaꞌya lowo geya kaaꞌlitinoe!” Ninke xiinxallineemmohu konni garinni woy wolu garinnino ikko, yanna gaaꞌmine xiinxallate sharrammeemmoha ikkiro halaale naandeemmota leellinsheemmo.—Far. 1:1-3.
Addu Hayyo Qoonqose Naggi Assite Woshshitanni No
3 Hayyote yaa anfoommo coye horoonsiꞌne dancha doorsha doodhate dandooti. Ikkirono addu hayyo hakkiinni saꞌinote. Qullaawu Maxaafi, “Kaaliiqa waajja egennote [“hayyote” NW] umoho. Qullaawa Magano egennittoro wodancha afiꞌratto” yaanno. (Law. 9:10) Hakko daafira mitto shota ikkinokki coye assate kaꞌneemmo woyite, assiꞌneemmo coyi Yihowa hedo ledo sumuu yaannoha yaano ‘Qullaawu Magani daafira noonke egenno’ aana xintaminoha ikka hasiissannosi. Qullaawa Maxaafanna Qullaawu Maxaafi aana xintantino borruwanke seekkine xiinxalline tenne assa dandiineemmo. Hatto assineemmoha ikkiro addu hayyo noonketa leellinshanni heeꞌnoommo.—Law. 2:5-7.
4 Addu hayyo aannohu Yihowa callaati. (Rom. 16:27) Hayyote Buicho Yihowaati yineemmohu mayiraati? Umihunni, isi Kalaqaancho ikkino daafira kalaqamisi daafira baalankare seekke afino. (Far. 104:24) Layinkihunni, Yihowa assannohu baalunku coyi hayyosi leellishanno. (Rom. 11:33) Sayikkihunni, Yihowata hayyo noo amaale harunsanke woꞌmanka woyite kaaꞌlitannonke. (Law. 2:10-12) Addu hayyo afiꞌra hasiꞌnummoro konne sasenka qara halaale ammane adhanna mitto coye assinammora albaanni konne halaale balanxe heda hasiissannonke.
Wedella, Ammanaꞌne Jawaachishidhe
2 Atino Yihowara soqqantanni noottoha woy isi daafira rossanni nootto wedellichaatiro, lowo manni ammanannore ammanatto gede lawishshaho, kalaqamu dayinohu Maganu kalaqeenna ikkikkinni suutu soorronniiti yite ammanatto gede xixxiimboonnihe? Hatto ikkiro, ammanakki kaajjite heedhanno gede assiꞌrate mayi kaaꞌlahera dandaanno? Tenne assa dandaatto doogga giddo mitte, Maganu uyinoheta buuxate woy hedate dandoo horoonsiꞌrate; tini dandoo “towaattannohe” woy agarooshshe ikkitannohe. Qoleno tini dandoo ammanakki shoshshoggitanno gede assitannote alamete hayyonni agartannohe.—Lawishsha 2:10-12 nabbawi.
3 Jawaata ammana heedhannonke gede Maganu daafira gara ikkinore afa hasiissannonke. (1 Xim. 2:4) Hakko daafira, Maganu Qaalenna Qullaawu Maxaafi aana xintantino borruwanke nabbawatto yannara iimi adda nabbabbooti. Nabbabbanni noottore ‘wodanchate’ hedate dandookki horoonsiꞌri. (Mat. 13:23) Hanni tenne assakki albinni noore Maganu Kalaqaancho ikkinotanna Qullaawu Maxaafi gara ikkinota huwatatto gede kaaꞌlitannohehu hiittoonniitiro laꞌno; qoleno tenne ‘buuxate’ kaaꞌlitannoti batinye taje no.—Ibi. 11:1.
Maganu Qaalinni Ronseemmore
‘Halaalunni Heedhe’
16 Nabbawanna xiinxalla banxeemmori ninke baalanko yaa diꞌꞌikkino. Ikkirono Yihowa halaale seekkine huwanteemmo gede egenno ‘jawaante hasiꞌnammora’ koyisinonke. (Lawishsha 2:4-6 nabbawi.) Togo assate sharramanke woꞌmanka woyite kaaꞌlitannonke. Koori yinanni rodii Qullaawa Maxaafa nabbawanno woyite mitto mittonka qummeeshsha seekke illachishannota coyiꞌrino. Isi togo yiino: “Mitto mittonka lekkaalliidi qaagiishshanna fiixxanno hedo kultanno qummeeshshuwano laeemmo hattono lede xiinxalleemmo. . . . Konni garinni nabbawaꞌya lowo geya kaaꞌlitinoe!” Ninke xiinxallineemmohu konni garinni woy wolu garinnino ikko, yanna gaaꞌmine xiinxallate sharrammeemmoha ikkiro halaale naandeemmota leellinsheemmo.—Far. 1:1-3.
Lallawo
lmd guwuursha A naxiwe 8
Minaanninna minaama mimmitoho ammanama hasiissannonsa.—Mil. 2:16; Mat. 19:4-6, 9; Ibi. 13:4.
Muxxe Jiro Untine Hasiꞌra Baxxinanni?
Qullaawu Maxaafi xagge unte xiinxalli. Lawishshaho xagge borreessinohu ayetiro hattono ayera woy mamoote borreessinoonniro afate woꞌnaali. Hakka woyite ikkino coyi maati? Hakkuyira albaanni woy hakkuyi gedensaanni mayi ikkino?
Aante noo xaꞌmuwa daafira xiinxallite maa rosattoro hedate woꞌnaali: ‘Xaggete giddo kulloonni mannira mayi macciishshaminonsa? Insara hiikkuri akatta noonsa? Ani kuri akatta lossiꞌra woy hooꞌla hasiissannoehu mayiraati?’