‘Ayyaanu Mittimma Agarre’

Afiꞌnoommo mittimma ‘ayyaanunnite.’ Togo yaa mittimma loosu aana noote Maganu wolqa gumaati yaate. Ikkirono Phaawuloosi yiinonte gede mittimma agara hasiissanno. Agarannohu ayeti? “Ayyaanu mittimma agarate” mittu mittunku Kiristaanchi isi widiidire assa hasiissannosi.

Lawishshaho mittu manchi haaro makeena uyinohe yine hendo. Konne makeena danchu garinni amada hasiissannosihu ayeti? Ate ikkoottoti dihuluullissannote. Garunni amada hooggeenna makeenu hiiqqamiro uyinohe mancho bushiisha didandaatto.

Hatteente gede Kiristaanu mittimma elto asse uyinonkehu Magano ikkirono, mittu mittunku Kiristaanchira tenne mittimma agarate qeechi noosi. Mittu rodii woy mitte rodoo ledo dancha aante noonkekkiha ikkiro ninkeneeto togo yine xaꞌma hasiissannonke: ‘Kalaqamino qarra tire ayyaanu mittimma agarate ane widiidire assanni noommo?’

“MITTIMMA AGARATE LOWO GEESHSHA JAWAATTE”

Phaawuloosi kulinonte gede ayyaanu mittimma agarate diinaggaawa hasiissannonke woyiti heeꞌrara dandaanno. Roorenkanni mittu rodii woy mitte rodoo koffi assitannonke woyite tenne assa hasiissannonke. Mittimma agarate woꞌmanka woyite koffi assinonke manchiwa marre kalaqamino qarra kayinse hasaawa hasiissannonke? Dihasiissannonke. Ateneeto togo yite xaꞌmi: ‘Tenne hajo kayise hasaawummoro coyi woyyaawannonso roore bushanno?’ Mito woyite kalaqamino qarra lashshi assine saꞌꞌa woy gatona yine agura hayyote.—Law. 19:11; Maq. 11:25.

Soqqamaasinchu Phaawuloosi borreessinonte gede ‘mimmito baxillunni duqqino.’ (Efe. 4:2) Mitte borro tenne yaatto “ayimmansa ammanne adha” yineno tira dandiinannita kultino. Togo yaa ammanate roduuwinke ninkente gede guuntete xeꞌne noonsare ikkitinota ammanne adhate yaate. Hige “haaro mannimma” uddiꞌrate woꞌnaalanni heeꞌnoommo. (Efe. 4:23, 24) Ikkirono ninke giddo tenne guutu garinni assa dandaannohu dino. (Rom. 3:23) Konne halaale ammanneemmoha ikkiro mimmito baxillunni duqqa, gatona yaanna “ayyaanu mittimma agara” qarra diꞌꞌikkitannonke.

Koffi assinonke mancho gatona yineemmoha ikkiro, “keeru usuraasinchinni ayyaanu mittimma agara” dandiineemmo. Efessooni 4:3 ‘usuraancho’ yine tirroonniha Giriikete qaale Qolaasiyaasi 2:19 ‘diimmicho’ yine tirroonni. Diimmichu miqqa ise iseneewa xaadise amadannoho kaajjado nigaati. Hatteente gede keerunna ammanate roduuwinkera noonke baxilli mereeronke badooshshu heeꞌrirono mimmitunniwa gamba yine heeꞌneemmo gede kaaꞌlannonke.

Hakko daafira mittu ammanate rodiikki koffi assannohe woyite, hanqisannohe woy caacceessannohe woyite iso mishantenni shaqqillunni amadate woꞌnaali. (Qol. 3:12) Baalunku manni guuntete xeꞌne noonsare ikkino daafira atino mitto mancho koffi assootto woyiti nooha ikkara dandaanno. Tenne qaagakki ‘ayyaanu mittimma agarate’ ate widiidire assatto gede kaaꞌlitannohe.