Niyukileerete Oli Daafira Qullaawu Maxaafi Mayyaanno?

Alamete mangistubba niyukileerete bagado duuꞌnite noo daafiranna xaano ledde hallanshidhanni noo daafira, alamenke niyukileerete oli kaꞌꞌanno yite yaaddanni no. Mannu niyukileerete bagadi lexxi kiiro, niyukileerete oli kaꞌꞌanno tunceenyino hattonni lexxanno yee waajjino. Qoleno mitte gobba mitto niyukileerete bomba nafa tugase, alame woꞌma buko buluulo assannohu jawu niyukileerete oli kaꞌꞌanno gede assitara dandiitanno yine waajjinoonni. Mitte borro kultanno garinni, “niyukileerete oli aye saaterano kaꞌꞌara dandaanno yannara” heeꞌnoommo.—Bulletin of the Atomic Scientists.

Ikkina yininte gede niyukileerete oli kaꞌꞌakka? Kaꞌꞌanno ikkiro, pilaaneetenke gatte saꞌakka? Niyukileerete oli kaꞌꞌara dandaanno yine yaandeemmo yaaddo gargadha dandiineemmohu ma garinniiti? Qullaawu Maxaafi tenne hajo daafira mayyaanno?

Konni birxichira

• Qullaawu Maxaafi giddo niyukileerete oli daafira himannoonnini?

• Niyukileerete oli kaꞌꞌara Maganu fajjakka?

• Pilaaneetenke Baatto gatte saꞌakka?

• “Niyukileerete yaaddo” gargadha dandaattohu hiittoonniiti?

• Qullaawu Maxaafi niyukileerete Armagedooni kaꞌꞌannota kulanno?

• Qullaawu Maxaafi olaho malu maati yaanno?

• Qullaawu Maxaafihu Ajuujate maxaafi niyukileerete oli daafira kulanno?

Qullaawu Maxaafi giddo niyukileerete oli daafira himannoonnini?

Qullaawu Maxaafi niyukileerete oli daafira bade dikulanno. Ikkollana, niyukileerete oli kaꞌꞌanno yine yaandanni gede assinohu mannu akatinna alamete ikkito balanxe himannoonnite.

Hanni aante noota Qullaawu Maxaafi qummeeshshuwa yannankera alamete aana ikkanni noori ledo heewisiisi:

Qummeeshshuwa: Yesuusi rosaano togo yite xaꞌmitu: “Galagalte higge ledonke heeꞌrakkiranna alamete gumulora malaatu maati?” Yesuusi togo yee qoli: “Daga dagate aana, gashshootuno gashshootu aana ola kayisanno.”—Maatewoosi 24:3, 7.

Alamete ikkito: Addi addi gobbuwa niyukileerete wolqa noonsarino gattukkinni, jajjabba olu bagado qodhite xaa xaa olantanni no.

“Muli dirra kawa, alame xaa xaa gaancu giddora eꞌanni no; olu roore lexxanni haꞌranni no.”—Ze Armid Konfilikt Lookeeshiin End Ivent Daata Projekt.

Qummeeshsha: “Aliyye mootera goofimarchu iillanno woyite Wodiidi moote iso qasanno.”—Daanieeli 11:40.

Alamete ikkito: Qullaawu Maxaafi giddo balanxe himannoonni garinni, hettisantanno gobbuwanna miillansa lowimma woy bayirreenya adhate heewisantanni woy mimmito xiibbanni no. Xaa yannara niyukileerete bagadi noonsa gobbuwa xaaddote qasantinokkiha ikkirono, niyukileerete wolqansanna bagadonsa roore halashshidhanni no.

“Saihu tonnu diro giddo, gobbuwate mereero kaꞌꞌanno oli roore lexxino; konni oli yannara jajjabba mangistubba addi addi garo kaaꞌlitino.”—Ze Upsala Konfilikt Daata Prograam.

Qummeeshshuwa: “Goofimarchu barruwara dandee heeꞌrate qarrisannohu baxxino diri daanno. Korkaatuno, mannu . . . sumuu yaa giwannoha, suꞌma hunannoha, umosi qeeꞌlinokkiha, kaajjado [ikkanno].”—2 Ximootewoosi 3:1-3.

Alamete ikkito: Wolu batinyu manninte gede, alamete gashshaanono mimmitu ledo afoo dixaaddanno. Kawa kaꞌaanni higinonsa coye awu afiinni hasaabbe tidha agurte, gaaro kayisa woy waajjishiisha doodhitara dandiitanno. Niyukileerete oli kaꞌꞌara dandaanno yine roore yaandanni gede assannohu togoo coyeeti.

“Mimmitu ledo sumuu yine loonsanni doogo hasa hoongiro, manna raafo gananno oli lexxannilla haꞌranno.”—Semiir Saaraninna Jeen Hermaan, World Ikonoomik Foorem.

Niyukileerete oli kaꞌꞌara Maganu fajjakka?

Qullaawu Maxaafi tenne daafira yaannori dino. Kay yannankera ‘waajjishannori’ ikkannota kulanno. (Luqaasi 21:11) Togoo coyi giddo mittu Layinkihu Alamete Oli yannara tungoonniho atoomikete bombaati. Qullaawu Maxaafi Maganu olu heeꞌrara fajjinohu mayiraatiro kulanno. Tenne ledde afate, Maganu Qarru Heeꞌrara Fajjinohu Mayiraati? yitanno viidiyo lai.

Pilaaneetenke Baatto gatte saꞌakka?

Ee, gattanno. Manchi beetti niyukileerete bagado wirro horoonsiꞌriro nafa, coyi suta fuleenna alame fiidhe baꞌanno deerra iillitara Maganu wore dilaꞌꞌanno. Qullaawu Maxaafi baatto baotenni gattannota calla ikkikkinni manchi beetti ise aana hegerera heeꞌrannotano kulanno.

Mitootu, baatto martuwa marte boodu manni callu heeꞌrannota ikkitanno; hakku mannino niyukileerete olinni gawajjantino mole baattora suttote heeshsho heeꞌranno yite heddanno. Ikkollana, Qullaawu Maxaafi olu baattote aana abbino gawajjo baala Maganu badhera qolannota kulanno.

Kalaqaanchinke baatto aye geeshshano daanfisero umise umose haaroonsa dandiitanno gede asse kalaqinose. Qoleno Maganu umisi wolqasinni baattonke haaroonsanno; konnira baatto hegerera manchi beettira kaajja qae ikkite heedhanno.—Faarso 37:11, 29; Yohaannisi Ajuuja 21:5.

“Niyukileerete yaaddo” gargadha dandaattohu hiittoonniiti?

Mito manna “niyukileerete yaaddo” amaddara dandiitanno; hattino “niyukileerete olanna kuni oli abbara dandaanno bao waajjate” yaaddooti. Qullaawu Maxaafi aanno hexxonna amaale togoo yaaddo noonsa manni beedho afiꞌranno gede kaaꞌlitanno. Hiittoonni?

Qullaawu Maxaafi baattotenna ise aana heeꞌranno mannira kaajja hexxo noota kulanno. Tini hexxo “heeshshonkera milli miqqi yaannokkihu addaxxinanni mokkollichi” gede ikkitannonke; konni garinni, quwa saꞌne yaandeemmokki gede agartannonke. (Ibiraawoota 6:19) Albillitte ikkara dandaannoha busha coye hendanni yaadantenni, techo ikkanni noo coye illachishano yaaddonke quwa saꞌannokki gede kaaꞌlitannonke. Yesuusi yiinonte gede, “mittu mittunku barrira ikkanno geeshshi qarri noosi.”—Maatewoosi 6:34.

Ninke baalunku wodanaaꞌmine heeꞌra dandiineemmo gede surrenke fayyimma towaaxxa hasiissannonke. Tenne assate, yaaddo kalaqannore lawishshaho haarote niyukileerete bagado qixxeessidhanni noo gobbuwa daafira kultanno odoo, hasaawa, woy wole togoo duduwo macciishsha ajisha hasiissannonke. Hatto yaa hige ikkay noore anfay heeꞌney kaandeemmo yaa diꞌꞌikkitino. Hatteentenni, assa dandiineemmori nookki coyira woy horonta ikka hoogara dandaanno coyira yaandeemmokki gede qorophineemmo yaate.

Heeshshokki giddo ikkay nooha dancha dancha coye illachishatenni busha odoo macciishshatto yanna ajishi.

Maganu uyino hexxo daafira ledde rosakki addu hexxo, hagiirrenna giddiidi keere uyitannohe.

Qullaawu Maxaafi niyukileerete Armagedooni kaꞌꞌannota kulanno?

Mitu mannira Armagedooni alame woꞌmate kaꞌꞌannoha niyukileerete ola lawannonsa. Hakko daafira insara Armagedooni yaa manna baala raafo gananno olaati.

Ikkollana Qullaawu Maxaafi “Armagedooni” yaannohu, “gosa baalate mootoolla” yaano uullate gashshootinna Maganu mereero kaꞌꞌanno ola kulateeti.a (Yohaannisi Ajuuja 16:14, 16) Armagedooni niyukileerete oli gede baattonna manna baala coꞌo asse gudanno ola diꞌꞌikkino. Hatteentenni, Armagedooni oli yannara Maganu bushuulle calla xinqe shaanno; tini qolte addu keerinna hobbaate heedhanno gede assitanno.—Faarso 37:9, 10; Isayaasi 32:17, 18; Maatewoosi 6:10.

Qullaawu Maxaafi olaho malu maati yaanno?

Maganu Yihowab olantanni noo daga mereero noo gaance uurrise hattono olu bagadonsa buluulo asse wolqasi jawimma leellishanno. Isi tenne assannohu Gashshootisi widoonniiti; Maganu Gashshooti muli yannara uulla woꞌma gashshannoho gordu gashshooteeti.—Daanieeli 2:44.

Maganu Gashshooti mannu keerunni sumuu yee heeꞌranno gara rosiisanno. Uulla woꞌma gashshannohu mitto gashshoote ikkanno daafira, addi addi gobba mereero kaꞌꞌanno gaanci diheeꞌranno; isinni mannu ola olammanni gara rosa nafa dirosanno! (Mikiyaasi 4:1-3) Gumu maa ikkannoyya? “Mannu annu annunkunni kaasiꞌrino balasenna woyinete caali hunda, harshammi yite fooliishshidhanno; masisannonsari diheeꞌranno.”—Mikiyaasi 4:4.