11 Chaachaara Ikka

HATTO YAA MAYYAATE?

Chaachaaru manni looso loosa diceeꞌmanno. Hatteentenni, loosanno loosi mannu halchannoha ikka hoogiro nafa hasiisannonsare afiꞌratenna woloota kaaꞌlate diinaggaawe loosanno.

HASIISSANNOHU MAYIRAATI?

Banxono gimbono baalunkura wonsha hasiissannonke qeechi noonke. Tenne looso giwanno manni batiꞌrino alame giddo diinaggaabbe loosattoha ikkakki kaaꞌlitannohe.—Rosiisaancho 3:13.

“Diinaggaawe loosa hagiirrenna harshammo afiꞌnanni gede assitannota huwatoommo. Tini looso roore baxeemmo gede assitinoe. Danchu loosu rosichi suꞌnaado suꞌma afiꞌnanni gedeno assanno.”—Riyeni.

QULLAAWU MAXAAFI BIDDISHSHA: “Diinaggaambe loosiꞌra qiniite uyitanno.”—Lawishsha 14:23.

MAA ASSA DANDIITINANNI?

Aante noo amaale harunsitine loosoho gara ikkitino lao heedhannoꞌne gede assidhe.

Loosokki albinni roore seekkite loosate sharrami. Qaete loosatto looso, rosu mine uyinoonniheha mini looso woy qaxarante loosatto looso diinaggaabbe loosi. Mitto looso dancha gede assite loosa rositto gedensaannino, loosu isilanchimmanna rankekki albinni roore woyyeessiꞌratto doogo hedi. Loosoho dandookki lexxitu kiiro, loosatto looso roore baxatto.

QULLAAWU MAXAAFI BIDDISHSHA: “Jawaata loosaasincho egennootto? Isi shollaataammu manni albaanni ikkikkinni, mootoollate albaanni uurranno.”—Lawishsha 22:29.

Loosatto loosi wolootano kaaꞌlannota hedi. Woꞌmanka woyite loosokki danchu garinni loosattoha ikkiro, woloota kaaꞌlatto. Lawishshaho, qaete uyinoonnihe looso diinaggaabbe loosattoha ikkiro, maatekkira duha shaashshatto.

QULLAAWU MAXAAFI BIDDISHSHA: “Adhannonkunni aannohu baꞌraaꞌrinoho.”—Soqqamaasinete Looso 20:35.

Uyinoonnihe looso calla loosse agurtooti. Uyinoonnihe looso calla loosse agurantenni, ledde loosate woꞌnaali. Uyinoonnihe loosinni saꞌe loosattoha ikkiro, mannu hajajeennahe ikkikkinni umikkinni baxxe loosatto daafira, ateneeto hajaja dandaattota leellishshanni nootto.—Maatewoosi 5:41.

QULLAAWU MAXAAFI BIDDISHSHA: “Atehu danchu loosi wolqatenni ikkikkinni baxillunni ikkara [hasiꞌreemmo].”—Filimoona 14.

Quwa saꞌooti. Chaachaaru manni looso diceeꞌmanno; hatto yaa kayinni loosu araado ikkinonsareeti yaa diꞌꞌikkitino. Togoo manni loosohono fooliishshoteno quwa disaꞌꞌanno; konni garinni lamunku coyinni hagiirre afiꞌrate woꞌnaalanno.

QULLAAWU MAXAAFI BIDDISHSHA: “Lamente anganni loonsanni haafamantenni wodanu fooliishsho ledo, mitte anganni loonsoonnihu shiimu rooranno. Kunino diilallo cuꞌmate gedeeti.”—Rosiisaancho 4:6.