Nohi Markaawe Seekki

NOHIRA minaamanna sase ooso noosi. Oososi suꞌma Seemi, Kaaminna Yaafeeti yinanni. Sasunkura galte noonsa. Konni daafira Nohi maate giddo settu manni no.

Maganu Nohi loose egenninokkire loosi yiisi. Lowo markaawe qixxeessi yiisi. Tini markaawe lowo geeshsha jawanna seeda saaxine gedeete. Maganu Nohi, ‘Sase fooqe nooseta assi; qolteno giddoseenni kifilla qixxeessi’ yiisi. Tini kifilla Nohinna maatesira, qoleno saadatenna insa baalaho ikkitanno sagale worrannite.

Qoleno Maganu, markaawete giddora wayi eannota hoolate xulluwa baala beeshshanno gede Nohira kuli. Maganu togo yii: ‘Woꞌma alame hunate baote waa abbammoraati. Markaawete giddora eannokkihu baalunku reyaanno.’

Nohinna oososi Yihowa yiinota macciishshite markaawe seekka hanaffu. Wolootu mannooti kayinni osoꞌlitu. Bunshe assano diagurtino. Nohi, Maganu abbannore kulinsata mittuno diammanino.

Markaawe lowo geeshsha jige ikkitino daafira seekkinanna lowo yanna saꞌu. Seedu diri gedensaanni qixxaabbe gooffu. Hakkunni gedensaanni Maganu, saada markaawete giddora eessanno gede Nohira kuli. Mite saada lame lame asse meyaatanna labbaaha eessanno gede kulisi. Woloota kayinni lamala lamala eessanno gede kulisi. Qoleno Maganu Nohira duuchchu dani cea eessanno gede kuli. Nohino Maganu yiinosi gede assi.

Hakkunni gedensaanni, Nohinna maatesino markaawete giddora eꞌu. Hakkiinnino Maganu markaawete saanqa cufi. Nohinna maatesi giddo heedhe daannore agartanni no. Hanni hakkawote insa ledo markaawete giddo agartanni noottohu gede assite hedi. Maganu yiinte gede addinta baote waa abbakka?