Mimmito Labbannokki Lakkuwa

KURI misilete aana noori lamunku beetti mimmito dilabbanno; dihattooti? Suꞌmansa afootto? Ugaaxaanchu Eesawuuti; gereewo allaalanni noohu kayinni Yaaqoobiiti.

Eesawunna Yaaqoobi, Yisaaqinna Ribiqa iltino lakkuwa oosooti. Eesawu ugaaxe ayiddisira sagale abbannohura, annisi Yisaaqi lowo geeshsha baxannosi. Ribiqa kayinni Yaaqoobi roorsite baxxanno; korkaatuno Yaaqoobi joogahonna wodanaamo beettooti.

Yaaqoobiuu ahaahi Abirahaami xaa geeshsha lubbote no; Yaaqoobi ahaahisi Yihoware kulannasi macciishsha mageeshsha hagiirsiissannosiro heda dandiineemmo. Lakkuwaho 15 diro ikkinsata, Abirahaami 175 dirisinni reyi.

Eesawu 40 diro ikkisita, Kanaꞌꞌaani gobbanni lame seenne adhi. Togo assasinni Yisaaqinna Ribiqa lowo geeshsha dadilli; korkaatuno kuni seenni Yihowa magaꞌnannoha diꞌꞌikkino.

Mitto barra, Eesawu rodiisi Yaaqoobira lowo geeshsha hanqanno gede assannori kalaqami. Yisaaqi bayiriidi beettosi maassiꞌranno yanna iillitu. Eesawu bayira ikkino daafira maasso adhate agadhe no. Ikkollana Eesawu maasso adhate qoosso Yaaqoobira balaxe hire kaino. Qoleno Maganu, lamunku ilantu yannara maasso adhannohu Yaaqoobi ikkinota coyiꞌrino. Yannate gedensaanni Maganu yiinte gede ikki. Yisaaqi beettosi Yaaqoobi maassiꞌri.

Yannate gedensaanni Eesawu tenne afiti, Yaaqoobira hanqi. Lowo geeshsha hanqino daafira Yaaqoobi shaara hasiꞌrinota coyiꞌri. Ribiqa tenne macciishshite lowo geeshsha yaaddu. Konni daafira ayiddaannase Yisaaqi, ‘Yaaqoobino Kanaꞌꞌaani seenne adhannoha ikkiro lowo geeshsha shetto ikkanno’ yitu.

Yisaaqi tenne macciishshe Yaaqoobi woshshe, ‘Kanaꞌꞌaani gobbanni seenne adhitooti. Hatteentenni Kaaraani gobbara heeꞌrannohuwa ahaahikki Baatueeli qae haꞌri. Beettisi Laaba seenni giddo mitte adhi’ yiisi.

Yaaqoobi annisi yiinota macciishshe, hakkawotenni Kaaraani heeꞌranno fiixisiwa seeda doogo haꞌri.