Isiraeelete Mereero Noo Mooraancho

KUNI manchi dunkaanisi giddo maa maaxanni nooro lai! Biifado ikkitinota kaabbaho yinanni uddano, worqenna birra maaxanni no. Kuni uduunninna woxi Iyyaarkote kataminni adhinoreeti. Ikkollana Iyyaarkote katami uduunne ma assa hasiissanno? Ma asse yinoonniro qaagatto?

Hakkonne uduunne giirranni gedenna, worqenna birra kayinni Yihowahu xaadooshshu dunkaani giddo worranni gede kulloonni. Konni daafira kuni manni Maganoho dihajajamino. Maganu woxe moorino. Maaxanni noo manchi suꞌmi Akaaniiti; ledosi noori maatesi giddo noo mannaati. Hakkunni gedensaanni ikkinore hanni laꞌno.

Akaani konne uduunne moori gedensaanni, Iyyaasu gama manna Gayi yinanni katami manni ledo qasantanno gede soyi. Hakko katami mannooti martinore olunni qeeltunsa. Gama shitu; mito kayinni shorritu. Iyyaasuno lowo geeshsha dadilli. Albisinni uulla uwe, ‘Kuni ninkera iillara mayira fajjitto?’ yee Yihowa huucciꞌri.

Yihowa Iyyaasura togo yee qolisi: ‘Gotti yii! Isiraeele cubbo loossino. Giirama hasiissannosiha woyi dunkaaniꞌya giddo wora hasiissanno uduunne adhitino. Biifado kaabba moorte maaxxino. Hakkonne uduunne huna hoogginironna moorinoha shaa hoogginiro dimaassiꞌreemmoꞌne.’ Yihowa Iyyaasura moorinohu ayeetiro leellisheemmohe yiisi.

Konni daafira Iyyaasu manna woꞌmanka gamba assi; Yihowano busha mancho Akaani baxxe leellanno gede assi. Akaanino togo yii: ‘Soꞌroommo. Mitto biifado kaabba, worqenna birra laummo. Lowo geeshsha halchisheennae adhummo. Dunkaaniꞌya giddo waamoommowa afattona.’

Konne uduunne anfe Iyyaasuwa abbinita, Iyyaasu Akaani, ‘Qarra abbittonkehu mayiraati? Xa aterano Yihowa qarra abbannohena!’ yiisi. Hakkiinnino baalunku manni Akaaninna maatesi kinnatenni gane shii. Tini xagge ninkeha ikkinokkire horonta adha hasiissannonkekkita dileellishshanno?

Hakkunni gedensaanni Isiraeele Gayi manna qasate galagalte hadhu. Hatte yannara Yihowa mannasi kaaꞌli; insano olunni qeeltu.