Heeshsho Maganu Laꞌꞌanno Garinni Laꞌꞌatto?

1, 2. Xaa yannara lowo geeshsha xaqqantannonketi Maganu uyinonke elto hiitteeti? Tini elto xaqqantannonkehuna mayiraati?

IIMI Anninke lowo geeshsha muxxe ikkitino elto uyinonke; hattino assaawanna isi akatta leellisha dandiineemmo manna asse kalaqe uyinonke heeshshooti. (Kalaqo 1:27) Tini muxxete elto noonke daafira Qullaawu Maxaafihu xintu seeri xaqqamannonkehu hiittoonniitiro wodancha dandiineemmo. Konne xintu seera loosu aana hosiinseemmoha ikkiro, Yihowa banxeemmorenna “danchanna busha badate rosi” noonkere ayyaanaamittetenni gikki yinoommo manna ikkineemmo.—Ibiraawuyaani 5:14.

² Qullaawu Maxaafiha xintu seera wodancha roorenkanni xaa yannara lowo geeshsha hasiissanno; korkaatuno alame lowo geeshsha raqaxantanni hadhino daafira heeshshonke giddo tuncu yitannonketera mitte mittente ikkitora loossanno higge fushsha didandiinanni. Hikkiminnu sayinse widoonni leeltino lophpho, roorenkanni mundeetenni loonsoonni xagganna mundee xaginaateho horoonsiꞌrate ogimma tennera dancha lawishsha ikkitanno. Tini hajo Yihowara hajajama hasidhannori baalu illachchishshara hasiissannote. Hakkoyeno ikkiro, tenne hajo ledo xaado afiꞌrinoha Qullaawu Maxaafiha xintu seera huwante, tiiꞌꞌinke yaannonkeri ledo sumuu yitannotanna Maganu baxillinni fullummokki heeꞌneemmo gede kaaꞌlitannonke wussaane wossaꞌna hasiissannonke. (Lawishsha 2:6-11) Hanni mito mito xintu seera laꞌno.

HEESHSHONNA MUNDEE QULLAAWATE

3, 4. Mundee qullaawa ikkitinota Qullaawa Borro giddo umo kulloonnihu mamarooti? Tini assaawe xintantinohu lamu xinta ikkino halaali hiikkonneeti?

³ Qayeeli Abeeli shiihunni shiima yanna gedensaanni, Yihowa heeshshonna mundee lowo geeshsha quraanynyaminore ikkinota xawisino. Isi Qayeeli togo yiino: “Macciishshi! Rodiikki mundee uullate aaninni anewa higge raartanni no.” (Kalaqo 4:10) Yihowa lao garinni, Abeeli mundee jaddotenni baꞌino heeshshosi riqibbanno. Konni daafira Abeeli mundee Maganu rabbase qolanno gede raartino yaa dandiinanni.—Ibiraawuyaani 12:24.

⁴ Nohi yanna lolahi gedensaanni Maganu, mannu saadate maala itanno gede faqqadino; mundee kayinni difaqqadino. Isi hakkawaro togo yiino: “Lubbo yaano mundee giddo noo maala kayinni ittinoonte. Hakkiinni saeno lubboꞌne mundee kiꞌnewiinni xaꞌmiꞌreemmo.” (Kalaqo 9:4, 5) Tini hajajo Nohi yannanni kayise yannanke geeshsha noo mannira baalaho loossannote. Tini hajajo Maganu balaxe Qayeelira coyiꞌrino qaalira nooha xinta ikkino halaale ledde buuxissanno; kuni xinta ikkino halaali kalaqamu baalu mundee lubbonsa woyi heeshshonsa riqibbannota xawisanno. Hakkiinni saeno tini hajajo heeshshote Buichcho ikkinohu Yihowa heeshshonna mundee qullaawa asse laꞌꞌannokki manna baala xaꞌmannota leellishshanno.—Faarso 36:9.

5, 6. Muse Higge mundee qullaawanna muxxe ikkitinota leellishshinohu hiittoonniiti? (Qoola 90 noo saaxineno lai.)

⁵ Konne xinta ikkinoha lame halaale Muse Higge aanano xawinsoonni. Zelewaawuyaani 17:10, 11 togo yitanno: “Ayee manchi ayee gari mundee itiro, albaꞌya mundee ittannote hattee lubbo widira qoleemmo; qoleno hakkonne mancho mannisi mereerinni mure huneemmo. Korkaatuno kalaqote lubbo mundeete giddo no; lubbote cubbi diwamanno gede assitannoti mundee ikkitino daafira, lubboꞌnera cubbise diwamanno gede ani umiꞌya kakkalote bayichcho mundee woroommoꞌne.”a—“Qoola 88 noota “Mundeennita Cubbo Diwate Wolqa” yitanno saaxine lai.

⁶ Isiraeelete waro gorrinoonni saada mundee kakkalote bayichcho wixa hoongiro, uulla dunnanni. Hatto assiniro hatte saada heeshsho lawishshu yaattonni Annisewa higgino yaate. (Marro 12:16; Hiziqeeli 18:4) Ikkeennano Isiraeele mundee uulla duntanno wote maalu giddo xuꞌe mundee gattannokki gede huuncitanni shettanno yaa diꞌꞌikkino. Saada garunni gorrine mundee duꞌnantanno gede assini geeshsha, mittu Isiraeelaawichchi hakko maala huluullamikki ita dandaanno; korkaatuno mundee hatto asse duna Heeshshote Kalaqaanchira gabbaꞌꞌanno ayirrinynye aate.

7. Daawiti mundee qullaawa asse laꞌꞌannota leellishinohu hiittoonniiti?

⁷ Maganu ‘wodaniꞌya gede ikkinoho’ yiinohu Daawiti, mundee lainohunni Maganu higgera nooha xintu seera huwatino. (Soqqamaanote Looso 13:22, NW) Mitte yannara Daawiti waa lowo geeshsha gooꞌriisseennasi mannisi giddo sasu diinu qachcha marte buetenni waa hinkiilte abbitusi. Tennera isi mayyii? “Lubbonsa qarraho tugge hadhino mannooti mundee aga hasiissannoe?” yee xaꞌmino. Daawiti hakko waa aga hakko manni mundee agate gede asse kiirino. Konni daafira gooꞌre heeꞌrenni, hakko waa “Yihowa albaanni dunino.”—2 Saamueeli 23:15-17.

8, 9. Maganoho mundeete noosi lao Kiristaanu songo kalaqantu kawa soorrantinoni? Xawisi.

⁸ Mundee lainohunni Nohira hajajo uyinihunni 2,400 diri gedensaanni, hattono Maganu Higgete gondooro Isiraeelete ledo eihunni 1,500 diri gedensaanni, Yihowa hundihu Kiristaanu songohu Aliidi Bisi togo yee borreessanno gede ayyaanisinni marraino: “Ninkenna Qullaawu Ayyaani dancha coyeeti yine hendoommohu kaꞌa wole qarrisanno coye bayisiinsammoꞌnera dihasiꞌneemmo. Kakkalote kakkalloonni sagale ittinoonte, gorrineenna mundee fultinokki saada . . . ittinoonte, mundeeno agginoonte [mundeetewiinni xeertidhe, NW], foortinoonte!”—Soqqamaanote Looso 15:28, 29.

⁹ Konninni buuxa dandiineemmonte gede, hundihu aliidi bisi mundee qullaawa ikkitinota, hattono mundee doogimale horoonsiꞌra kaphphu maganna magansiꞌratenna foorate geeshshi cubbo ikkinota huwatino. Addu Kiristaani xaa yannarano hatte uurrinsha daggafanno. Hakkiinni saeno Kiristaanu Qullaawu Maxaafihu xintu seerinni marraꞌꞌamanno daafira, mundee lainohunni wussaane wossaꞌnanno wote Yihowa hagiirsiisannore wossaꞌnanno.

MUNDEE XAGINAATEHO HOROONSIꞌRA

10, 11. (a) Yihowa Farciꞌraasine woꞌma mundeenna qara qara mundeete kifilla nigu widoonni adha lainohunni mayi lao noonsa? (b) Kiristaanaho mundee lainohunni addi addi lao heedhansara dandiitannohu hiikka woteeti?

¹⁰ Yihowa Farciꞌraasine ‘mundeetewiinni xeertiꞌrate’ yaa, mundee nigu widoonni adha hooga, mundee woleho aa hooga woyi ganaanni horoonsiꞌrate yine meessi mundee wodha hooga ikkitinota huwattino. Qoleno Maganu higge ayirrissanno daafira, insa shoole qara mundeete kifilla yaano duume mundeete seele, waajjo mundeete seele, pileetiletenna pilaazima diadhitanno.

¹¹ Xaa yannara tenne shoole kifilla qolle wole addi addi kifilera beenkeenna fulanno beehachche babbaxxino garinni horoonsiꞌnanni gede assinoonni. Mittu Kiristaanchi kore shiimaadda beehachche adha dandaanno? Konne beehachche “mundeete” gede asse laꞌꞌanno? Tenne hajo lainohunni mittu mittunku manchi umisinni wossaꞌna hasiissannosi. Hakkiinni saeno hemodayalisisinna hemodayilushini yinannita hikkiminnu ogimma, hattono meessi mundee horoonsiꞌne xaginsannita seeli salveeji yinanni ogimma lainohunni, mundee balanxe wodhinoonnita ikka hoogguro mittu mittunku wossaꞌna hasiissannosi.—Qoola 246-249 noo Guwuursha lai.

12. Uminke tiiꞌꞌinni wossaꞌnineemmo hajo lainohunni hiittoo lao heedhankera hasiisanno?

¹² Gilletenni wossaꞌninanni hajo lainohunni banxummore wossaꞌninummorono Yihowara dixiwanno coyeeti yaateni? Deeꞌni; korkaatuno isi hedonkenna mitto coye assate xixxiiwinonkeri maatiro hixamanynye laꞌꞌanno. (Lawishsha 17:3; 21:2; 24:12) Konni daafira Yihowa marraꞌꞌannonke gede huucciꞌnummohu gedensaanni, hattono mitto xagichcho woyi hikkiminnu ogimma lainohunni seekkine xiinxallinummohu gedensaanni, Qullaawu Maxaafinni qajeelino tiiꞌꞌinke yaannonkere harunsa hasiissannonke. (Roomu Sokka 14:2, 22, 23) Wolu manni wossanankera, woyi insa hedo garinni wossaꞌnineemmo gede xixxiiwankera dihasiisanno; qoleno, “Ati ane ikkoottoro ma assatto?” yine xaꞌma dihasiissannonke. Togoo hajora mittu mittunku Kiristaanchi “umisi duhano duqqa” hasiissannosi.b—Galatiya 6:5; Roomu Sokka 14:12; qoola 93 noota “Mundee Qullaawa Asse Laeemmo?” yitanno saaxine lai.

YIHOWA HIGGE ISI BAXILLAANCHO ANNA IKKINOTA LEELLISHSHANNO

13. Yihowa higgenna xintu seeri isi hiittooha ikkinota buuxissanno? Tennera lawishsha kuli.

¹³ Qullaawu Maxaafi giddo noo higgenna xintu seeri Yihowa higge fushshate hayyichcha ikkinota, hattono oososi keerira lowo geeshsha assaawannoha baxillaancho Anna ikkinota buuxisanno. (Faarso 19:7-11) “Mundeetewiinni xeertidhe” yitanno hajajo fayyimma agadhate biddishsha assine uyinoonnita ikka hooggurono, tenne hajajo agadhanke mundee nigu widoonni adhatenni daanno raqaxinni agartannonke. (Soqqamaanote Looso 15:20) Isinni batinynye akime mundee uyinikki assinanni oppirshiine, xaa yannara uyinanni hikkiminni baalunkunni roore “kaajja malaati” yitino. Togooti hikkiminnu lophpho Yihowa gawalo nookki hayyo noosiha ikkinota, hattono baxillaancho anna ikkinota addu Kiristaanira ledde buuxissanno.—Isayyaasi 55:9; Yohaannisi 14:21, 23.

14, 15. (a) Maganu mannasi baxannota leellishshanno higguwa hiikkuriiti? (b) Tenne dano gargadhate kaaꞌlitanno higguwara nooha xintu seera loosu aana hosiisa dandaattohu hiittoonniiti?

¹⁴ Maganu biꞌre Isiraeelete waro mannisi keerira lowo geeshsha assaawannoha ikkinota uyinonsati batinynye higge leellishshanno. Lawishshaho Isiraeelete gosa dano iillitannokki gede mininsara sagannatete roqqo wortara hajajinonsa; korkaatuno hakkawaro sagannate duuchcha looso loosiꞌnanni baseeti. (Marro 22:8; 1 Saamueeli 9:25, 26; Nehimiya 8:16; Soqqamaanote Looso 10:9) Hakkiinni saeno Maganu qassanno bootta heedhuro seekkine agarranni gede hajajino. (Wolaphpho 21:28, 29) Hakkawaro togoo hajajo ayirrisa hooga wolootu keerira mittoreno assaawa hoogate, qolteno tini mundeete eda abbitannote.

¹⁵ Tenne higguwara nooha xintu seera loosu aana hosiisa dandaattohu ma garinniiti? Makeenikki, biskilliitekki woyi motorisayikilekki noo gari, woyi kuriuu kadatto gari, saadakki gari, minikki gari, loosatto bayichchinna doodhatto boohaarshi hiittoohoro seekkite assaawittoro dancha diꞌꞌikkanno? Mite gobbara wedellootu gidde noonsakkire ikkitanno daafira roore anga reyitannohu danotenniiti. Ikkollana Maganu baxillinni fultukki heeꞌra hasidhanno wedellooti heeshsho kaffi assite laꞌanno; hattono hagiirreho yite dano abbannore diassitanno. Togoo wedellooti, ‘wedellootaho dano diꞌꞌiillitanno’ yite digowwitanno. Hatteentenni wedellimmansanni hagiidhitanno wote hasiisannokki qarri iillannonsakki gede qorophphitanno.—Mekibibi 11:9, 10.

16. Godowi gato huna lainohunni loosu aana hosiinsannihu Qullaawu Maxaafihu xintu seeri hiikkonneeti? (Lekkaalliidi qaagiishshano lai.)

¹⁶ Wole agurina godowa noo qaaqqi heeshsho nafa Maganu albaanni ayirradote. Biꞌre Isiraeelete waro, mittu manchi godowii noo mancho gawajjeenna ama woyi qaaqqu reyiro, Maganu hakkonne mancho lubbo shiinohu gede asse laꞌꞌanno; qoleno hakku manchi “lubbote bayichcho lubbo” kaffala hasiissannosi.c (Wolaphpho 21:22, 23) Konnira Yihowa diru dirunku kiirre gundannikkire godowa noo ooso anfanni heeꞌnenni shinanna laꞌꞌanno wote mayi macciishshamannosiro hanni hedi; batinynye godowa noo ooso gooffannohu amanna annu uminsa xiqime afiꞌranna amanynyootunni maaeela heeshsho heeꞌra hasiꞌrannohuraati.

17. Maganu seera affara albaanni godowi gato huntino mancho sheshifachchisha dandaattohu hiittoonniiti?

¹⁷ Ikkina Qullaawu Maxaafi halaale rossara albaanni godowu gato huntino mancho heedhuronaa? Tenne mancho Yihowa dimaarannose yaateni? Hatto yaa diꞌꞌikkino! Mittu manchi giddosinni maaro eiro, duꞌnantinote Yesuusi mundee widoonni Yihowa gatona yaannosita addaxxa dandaanno. (Faarso 103:8-14; Efesooni 1:7) Kiristoosi umisi togo yiino: “Ani keeraano woshshammora ikkikkinni cubbaataamo eeggo [“maaro,” NW] eara woshshammora dayoommo.”—Luqaasi 5:32.

MANNA GIWATE HEDO HEEDHOONKEHE!

18. Qullaawu Maxaafi lowo mundee duꞌnantanno gede kaima ikkinore mayyee xawisanno?

¹⁸ Yihowa woloota goddaanseemmokki gede calla ikkikkinni, lowo mundee duꞌnantanno gede kaima ikkitannota manna giwate hedo wodaninke giddonni fushshine hunnammora hasiꞌranno. Hawaariya Yohaannisi, “Rodoosi giwannohu duuchchu lubbo [shiinoho]” yee borreessino. (1 Yohaannisi 3:15) Togoo manchi rodoosi giwa calla ikkikkinni reyara halchanno. Rodoosi giwannota suꞌma hunatenni leellishara dandaanno; woyi adda ikkitoommero Maganu firde abbitannota kaphphu kisse rodoosi kassasara dandaanno. (Zelewaawuyaani 19:16; Marro 19:18-21; Maatewoosi 5:22) Konnira wodaninke giddo manna goddaassanno hedo rumuxxitannokki gede gargadhate qodhine kaꞌꞌa hasiissannonke!—Yaaqoobi 1:14, 15; 4:1-3.

19. Qullaawu Maxaafihu xintu seerinni heeshshosi marrairanno manchi Faarso 11:5 nna Filiphphisiyusi 4:8, 9 gedee xiqissa ma garinni laꞌꞌanno?

¹⁹ Hakkiinni saeno, heeshsho Yihowa laꞌꞌanno garinni laꞌannorinna isi baxillinni fultukki heeꞌra hasidhannori baalunku baalanta finqille gibbanno. Faarso 11:5 togo yitanno: “Finqille baxxannore baala [Yihowa] lubbo effidhe gibbanno.” Tini xiqise Maganu akata kultannota calla ikkitukkinni, heeshshonke hiittoonni marraira hasiissannonkero biddishsha ikkitannonkete. Tini xiqise Magano baxxannori finqillete ledo xaado afiꞌrinohu ayee gari boohaarshiwiinni xeertidhanno gede assitannonsa. Hakkii saeno Yihowa “keeru Magano” ikkinota kultanno assaawe, soqqamaanosi surrensaranna wodaninsara baxisanno coye, danchumma noo coye, hattono galantanni coye wonshidhanno gede xixxiibbannonsa.—Filiphphisiyusi 4:8, 9, NW.

MUNDEETE EDI NOONSA DIRIJJITTA LEDO XAADU HEEꞌROONKEHE

20-22. Kiristaanaho tenne alame lainohunni mayi uurrinsha noonsa? Mayira?

²⁰ Woꞌma Sheexaanu alame Maganu albaanni mundeete edi noote. Qullaawa Borro giddo bushu moyichchinni lawinse kulloonnihu poletiku gashshootise, miliyoonetenni kiirranni manna shaanni keeshshino; shiinori giddo batinynye Yihowa soqqamaanooti. (Daanieeli 8:3, 4, 20-22; Ajuuja 13:1, 2, 7, 8) Sayinsenna daddalu dirijjitta tenne moyichchu gedee mangistubba ledo kaaꞌlante manna gudanno massaara seekkite lowo tirfe gudhitino. Qullaawu Maxaafi, “Alame duuchcha Sheexaanu gashshooti woroonni ikkitino” yaannoti addaho!—1 Yohaannisi 5:19.

²¹ Yesuusi harunsaano ‘tenne alamere ikkitinokki’ daafira, hattono alamete poletikiranna olaho anga wodhitannokkihura, gilletennino ikko gaamotenni mundeete edi heeꞌrannonsakki gede qorophphitanno.d (Yohaannisi 15:19; 17:16) Qoleno insa Kiristoosi lawishsha harunsitanno daafira, wolootu darantanno gede assitannonsa yannara rabbisiꞌrate dikaꞌanno. Hatteentenni diinnansara baxille leellishshanno; hakkiinni nafa saꞌe insara huuccatto assitanno.—Maatewoosi 5:44; Roomu Sokka 12:17-21.

²² Hakkiinni saeno, addu Kiristaani alamete kaphphu ammaꞌna dirijjite ikkitinote “Bayira Baabilooni” ledo mittu coyinnino dikarsamanno; tini ammaꞌnate dirijjite baalunkunni roore mundeete edi noosete. Maganu Qaali togo yaanno: “[Ise] giddo himanaanotenna qullaawootu manni mundee, uullate aana shinoonni manni duuchchu mundee afantino.” Konni daafira, “Dagaꞌya ballo . . . isewiinni fulle” yine qorowisiinsoonninke.—Ajuuja 17:6; 18:2, 4, 24.

23. Bayira Baabiloonewiinni fulate yaa mayyaate?

²³ Bayira Baabiloonewiinni fula, bashsho heeꞌnoommo ammaꞌnawiinni fulloommota leellishate suꞌmanke hoolsiisiꞌra calla diꞌꞌikkitino. Isewiinni fulate yaa, kaphphu ammaꞌna sammi yite adhitannore woyi ise umise halashshitannore amanynyootu maaeelle, poletikaho karsamanna jirote hafuura lawinore effire giwano mitteenni amaddanno. (Faarso 97:10; Ajuuja 18:7, 9, 11-17) Togoo assooti roore wote mundee dunate widira qole massanno!

24, 25. Mundeete edi noosihu mittu manchi maaro eiro, Maganu gatona yaannosihu mayi widoonniiti? Qullaawu Maxaafi giddo tennera caale ikkannohu maati?

²⁴ Halaalu ammaꞌnawa daankera albaanni, mitti mittinke mitto widoonni woyi wole widoonni Sheexaanu alame dagganfoommo daafira, wossanaminohu mundeete edi noonke. Ikkollana heeshshonke soorriꞌne biddi assiꞌnoommo daafira, Kiristoosita wodote kakkalo ammannoommo daafira, hattono ninkeneeto Maganoho sayinse uyinoommo daafira, Maganu maaronna ayyaanaamittete agarooshshe afiꞌnoommo. (Soqqamaanote Looso 3:19) Qullaawu Maxaafi giddo kulloonniri eeggote katamma, xa afiꞌnoommo agarooshshira caaleho.—Zehulqu 35:11-15; Marro 21:1-9.

²⁵ Tini eeggote katamma xiqime uyitannohu ma garinniiti? Mittu Isiraeelaawichchi danotenni mitto mancho shiiro, eeggote katamma giddo mitto katama xooqa hasiissannosi. Guunte noonsa daanynyooti tenne hajora wussaane uyitu gedensaanni, danotenni manna shiino manchi kakkalaanote biili reya geeshsha eeggote kataminni fulikki heeꞌra hasiissannosi. Hakkunni gedensaanni hakkiinni fule ayeewano heeꞌra dandaanno. Kuni, Maganu maaronna isi mannu heeshsho mageeshshi geeshsha kaffi asse laꞌꞌannoro leellishannoho dancha lawishshaati! Hundiri eeggote katamma, ninke yannara Maganu Kiristoosite wodote kakkalo widoonni qixxeessino qixxaawo gedeeti. Tini qixxaawo heeshshonna mundee lainohunni Maganu uyino hajajo anfummokki diingummoro reyineemmokki gede agartannonke. Ati tenne qixxaawo kaffi assite laꞌꞌatto? Kaffi assite laꞌꞌattota mayinni leellisha dandaatto? Mitte doogo, “bayiru qarri” lowo geeshsha rahe daanni noote tenne yannara wolu mannino konne addunniha eeggote katama daanno gede koyisate.—Maatewoosi 24:21, NW; 2 Qorontoosi 6:1, 2.

MAGANU MANGISTE SABBAKATENNI HEESHSHO KAFFI ASSITE LAꞌꞌATTOTA LEELLISHI

26-28. Xa ninke heeꞌnoommo gari masaalaanchu Hiziqeeli noo gari gedeeha ikkinohu hiittoonniiti? Maganu baxillinni fullummokki heeꞌra dandiineemmohu ma garinniiti?

²⁶ Xaa yannara Maganu manni noo gari, Hiziqeeli yinanniha hundi masaalaancho qaangeemmo gede assannonke; Yihowa Hiziqeeli Isiraeelete gosara Maganu qorowishsha kulanno agaraancho asse soyinosi. Maganu iso, “[Qaaleꞌya] macciishshite anewiinni qorowishsha kulinsa” yiinosi. Hiziqeeli konne uyinoonnisi looso facci asse aguriha ikkiro, Yerusaalamete firde dagganno wote duꞌnantanno mundeera isi gilletenni xaꞌmamanno. (Hiziqeeli 33:7-9) Hiziqeeli kayinni hajajamino daafira, mundeete edi dinosi.

²⁷ Xa ninke heeꞌnoommohu Sheexaanu alame gudisidhe baꞌara kaꞌe noo yanna giddooti. Konni daafira Yihowa Farciꞌraasine Maganunniha “rabbate barranna” Maganu Mangiste sokka duduwa giddeetu gede, hattono ayirrinynyu gede assite laꞌanno. (Isayyaasi 61:2; Maatewoosi 24:14) Ati konne hasiisanno looso woꞌmunni woꞌma loossanni nootto? Hawaariya Phaawuloosi uyinoonnisiha sabbakate looso lowo geeshsha kaffi asse laino. Konni daafira togo yee coyiꞌra dandiino: “Ani mannu baalunku mundeenni keeraancho ikkoommota konni barrinni kiꞌne naqaashe asse woshsheemmo; korkaatuno Maganu amaale baala kulummoꞌnekki gate diegennoommo.” (Soqqamaanote Looso 20:26, 27, NW) Phaawuloosi harunsa hasiissannonkeho dancha lawishshaati!

²⁸ Yihowa annu gede ikke leellishinonke baxillinni fullummokki heeꞌrate, heeshshonna mundee isi laꞌꞌanno garinni laꞌꞌa calla baqe diꞌꞌikkitino. Yihowa albaanni xuru noonkekkire woyi qullaawoota ikkine heeꞌrano hasiissannonke; tenne aantanno fooliishshora laꞌneemmo.