FOOLIISHSHO 35

Maganu Jaala Ikka Dandeemmohu Hiittoonniiti?

Jeremii dadillisanno coy tuncu yiisi yannara, Maganu jaala ikka mageeshshi geeshsha hasiissannota ikkitinoro huwatino. Togo yiino: “Ani 12 dirihu heeꞌreenna, anniꞌya maatenke agure haꞌri.” Ledeno, “Mitto hashsha maꞌna heeꞌre, annaꞌya qaera higanno gede assara Yihowa eeggifate huucciꞌrummo” yiino.

Jeremii lowo geeshsha dadillaawinohu mitu, Qullaawa Maxaafa haaꞌre nabbawa hanafi. Nabbawanni heeꞌre, Faarso 10:14 yitannore afiti, lowo geeshsha hagiidhi. Kuni qummeeshshi Yihowa daafira togo yaanno: “Hawaaxaamu irkisattosira atewa shiqanno; annanna ama hoogginoreno ati kaaꞌlatto.” Jeremii togo yiino: “Yihowa umisi hasaawisanni nooehanna isi kaaꞌlaanchoꞌyanna Annaꞌya ikkinota kulanni nooeha lawinoe. Iso saino anna mama afiꞌreemmo hige?”

ATERANO Jeremiira iillinohu gedee qarri iillinoheha ikkirono ikkano hoogiro, Yihowa jaalasi ikkattora hasiꞌrannota Qullaawu Maxaafi xawise kulanno. Isinni Qullaawu Maxaafi “Maganunniwa shiqqi yiiyye; isino kiꞌnewa shiqqi yaanno” yaanno. (Yaaqoobi 4:8) Hatto yaa mayyaatero hanni hedi: Magano Yihowa laꞌꞌa dandaattokkiha ikkirono, hattono isi aye doogonnino darawokki ikka hoogirono, jaalasi ikkattora koysanni noohe!

Ikkollana, Maganu jaala ikkate sharro assa hasiissanno. Lawishsha: Mine awawu nooheha ikkiro, towaanyo nookkiha umisinni lophannokkiti egennantinote. Kuni awawi latara hasiꞌrittoro, ganyite waa hayikkisanna qooxeessa lophote injaanno gede assa hasiissannohe. Maganu ledo noonke jaaloomino hattooti. Kuni jaaloomi lophanno gede ati maa assa dandaatto?

Xiinxallo Kaaꞌlitanno Gara

Lamu manni jaalla ikkate mimmito hasaawisa, yaano mittu coyiꞌranna mittu macciishsha hasiissannonsa. Maganu ledo jaalooma kalaqiꞌneemmohuno hakko garinniiti. Qullaawa Maxaafa nabbawanna xiinxalla, Maganu coyiꞌranna macciishshineemmo doogooti.—Faarso 1:2, 3.

Hige xiinxallo, kalaqamunni baxatto coye ikka hooggara dandiitanno. Batinyu wedellooti nabbawantenni televizhiine laꞌꞌa, geeme godoꞌla, woy jaallansa ledo boohaara doodhitanno. Kay Maganu jaala ikkate wole woyyitino doogo dino. Qaalesi xiinxallite isi kulannohere macciishsha hasiissannohe.

Kay hakkeya yaaddooti. Qullaawu Maxaafi xiinxallo ceeꞌmishanno looso ikka dihasiissannose. Kalaqamunni xiinxallote gade hoogguhero nafa, xiinxalla baxatto gara rosa dandaatto. Umo assa hasiissannohe coy, Qullaawu Maxaafi xiinxallora yanna bade wodhate. Laysi yinanni wedellitte togo yitino: “Qullaawu Maxaafi niwaawera pirogiraame fushshiꞌroomma. Soodo soodonte goxoommawiinni baqqi yaanni heeꞌrenni mitte Qullaawu Maxaafi fooliishsho nabbaweemma.” Tonaa onte diro ikkannosetera Maariyara qole wolu gari pirogiraame noose. Ise “Hashsha hashsha ayewoteno goxammara albaanni Qullaawu Maxaafinni shiima gafa nabbaweemma” yitino.

Umikkita xiinxallote pirogiraame hanafate, “Qullaawa Maxaafa unte xiinxalli” yitanno saaxine lai. Hakkiinni, mitu 30 daqiiqi geeshsha Maganu Qaale xiinxallitanni saysatto pirogiraame fushshiꞌri.

․․․․․

Xiinxallatto saate badde wodha hanafotella. Xiinxallo biddiitto hanafatto woyte, Qullaawa Maxaafa nabbawa shota ikkitannokki yanna noota huwatattora dandaatto. Jezriil yinannihu 11 diri qaaqqi yiinotera sumuu yaattoha ikkara dandaanno; isi maaxikkinni togo yiino: “Mitu Qullaawu Maxaafi gafi huwatate qarrisannoho; nabbawateno hakkeya dibaxisanno.” Aterano hatto macciishshamannoheha ikkiro, hexxo murtooti. Woꞌmanka woyte, Qullaawa Maxaafa xiinxallatto saate jaalikki Maganu Yihowa ledo hasaawate wodhootto yanna gede assite hedi. Sharro assitto deerrinni, Qullaawu Maxaafi xiinxallo galte hosse baxissannotanna kiissannota ikkitannohe!

Huuccatto Loworeeti

Huuccatto Yihowa hasaawinseemmo doogooti. Huuccatto mageeshshi eltootiro hanni hedi! Barra woy hashsha baxootto saatera Magano Yihowa hasaawisa dandaatto. Isi kuꞌlattore macciishshate aye woyteno qixxaawinoho. Hatteeno agurranna, ati coyiꞌrattore macciishsha hasiꞌranno. Qullaawu Maxaafi togo yee jawaachishannohehu iseraati: “Baalunku coyira huuccattotenninna eeggifatatenni galatu ledo huuccattoꞌne Maganoho shiqishidhe.”—Filiphisiyusi 4:6.

Kuni qummeeshshi kulanno garinni, Yihowa ledo hasaawa dandaattohu duuchu coy no. Konni giddo mittu iillannohe qarraatinna yaaddokkiiti. Galatakkino isira shiqishiꞌra dandaatto. Hige jaallakki assitinohe coyra galata dinooreentilla? Hatteente gede, wolu aye jaalinni roore lowore assinoheha Yihowano galaxxa hasiissannohe.—Faarso 106:1.

Konni woroonni, ati Yihowa galaxxatto gede assannoheha mito mito coye borreessi.

․․․․․

Duucha woyte, wodaninke waajjannonna yaadanno gede assanno coy iillannonketi egennantinote. Faarso 55:22 togo yitanno: “Isi irkisannohena, yaaddokki Maganu aana tugi; isi keeraancho qeelamara wore dilaꞌꞌanno.”

Konni woroonni, huuccattotenni Yihowara hasaapha hasiꞌrattoha yaachishannohe coye borreessi.

․․․․․

Heeshshokkinni Laoottore

Maganu ledo noohe jaaloomira dea hasiissannohekkihu wolu coyno no. Faarsaanchu Daawiti “Kaaliiqi shaqqado ikkinota shiqqine [qamassine] laꞌe” yee borreessino. (Faarso 34:8) Daawiti 34^ki Faarso borreessinohu, waajjishanno coy giddonni gate fulihu gedensaanniiti. Isi hakkawoyte, shaasira mixiꞌre shorranni noosihu Moote Saaooliwiinni xooqanni no; kuni umisi baasa waajjishannoreeti. Hakkiinni isi higannowa hooge, diinu gobba Filisxeemete dagawa xooqino. Daawiti hakkawoyte afanni heeꞌrenni surre fayyinokkihu gede ikke, reyotenni hilire gate fulino.—1 Saamueeli 21:10-15.

Daawiti reyotenni gatinota umiꞌya busullenni gatoommo yee dihedino. Hatteentenni, ayirrinye Yihowara uyno. Isi aleenni kulli faarsora umo asse togo yee borreessino: “Kaaliiqa huucciꞌrummo, isino dawarie; waajjishannori baalunkunnino gatisie.” (Faarso 34:4) Konni daafira, Daawiti wole manna ‘Yihowa shaqqado ikkinota qamassine laꞌe’a yee jawaachishinohu, umisi heeshshonni lainori noohuraati.

Yihowa towaatanni nooheta leellishannohu heeshshokkinni laootto coy no? Hatto ikkiro, konni woroonni borreessi. Biciqqeessa: Laootto coy hoola yinanniha ikka hasiissannosi yaa diꞌꞌikkino. Barru baala afiꞌrattoha shiimaadda atoote hiincate woꞌnaali; kuri giddo mitu hakkeya loworeeti yine hendeemmokkire ikkara dandaanno.

․․․․․

Miteekke annikkinna amakki Qullaawa Maxaafa rosiisinoheha ikkara dandaanno. Hatto ikkiro, hakkuno mitto atooteeti. Ikkirono, ati umikki Maganu ledo jaalooma kalaqiꞌra hasiissannohe. Xaa geeshsha tenne assoottokkiha ikkiro, tenne fooliishshora kulloonnire assite hanafa dandaatto. Yihowa sharrokki maassiꞌranno. Qullaawu Maxaafi “Agurtinikkinni huuccidhe, uyinanniꞌnena; agurtinikkinni hasidhe, afidhinannina” yaanno.—Maatewoosi 7:7.

[Lekkaalliidi qaagiishsha]

GUULCHO QUMMEESHSHA

“Ayyaanaamittete coye goodhinori hagiirraammaho.”—Maatewoosi 5:3.

DANCHA AMAALE

Qullaawa Maxaafa barru barrunku shoole qoola nabbawittoro, mittu dirinni nabbabbe gudatto.

ATI TENNE AFOOTTO . . . ?

Qullaawa Maxaafa xiinxallitanni noottoha ikkakkinna amaalesi haꞌrunsakki, Yihowa kaaꞌlahera hasiꞌre ille wore laꞌꞌanni nooheta leellishshanno.—Yohaannisi 6:44.

ASSATE HEDOOMMORE!

Qullaawa Maxaafa xiinxalleemmo woyte roore horo afiꞌrate, togo asseemmo:

Huuccattote jawaatoommoha ikkeemmo gede, konne asseemmo:

Tenne hajo daafira annaꞌyanna amaꞌya xaꞌma hasiꞌreemmore:

MAA LAWAAHE?

● Qullaawu Maxaafi xiinxallokki roore baxissannota assiꞌra dandaattohu hiittoonniiti?

● Yihowa guuta ikkinokki manni huuccatto macciishsha hasiꞌrannohu mayraati?

● Huuccattokki woyyeessiꞌra dandaattohu ma garinniiti?

[Qoola 291 noota murre haaꞌnoonni hedo]

“Shiinqa noomma waro, duucha woyte yoommata yaanni huucciꞌreemma. Xa kayinni iillinoehu danchuno bushu coyno daafira huucciꞌrate woꞌnaaleemma. Barru baalu mitto ikkinokki daafira, tini yoommata calla yaanni huucciꞌreemmakki gede kaaꞌlitannoe.”—Iivi

[Qoola 292 noo saaxine/misile]

Qullaawa Maxaafa unte xiinxalli

1. Nabbawate baxissannoheta Qullaawu Maxaafi xagge doodhi. Nabbawattore huwatate hayyo aannohe gede Yihowa huucciꞌri.

2. Xagge hixamanyite nabbawi. Muddantooti. Nabbawatto woyte, hakko dargaho noottohu gede ikkite hedate woꞌnaali. Huwatote bisi kifillakki horoonsiꞌri: Xaggete giddo ikkanni noore laꞌꞌate, xaggete giddo kulloonniri coydhannore macciishshate, diilallote foole suꞌniissate, sagale qamasatenna woleno kore lawannore assate woꞌnaali. Nabbabbanni nootto xagge surrekkira waraꞌa yite leeltannohe gede assiꞌri!

3. Nabbawoottore taxxi yite hedi. Aante noote gedee xaꞌmo ateneeto xaꞌmi:

● Yihowa tenne xagge Qaalisi giddo borreessinanni gede assinohu mayraati?

● Tenne xagge giddo dancha lawishsha ikkitannoeri ayeooti? Qorophishsha ikkitannoerina?

● Tenne xaggenni heeshshoꞌyara kaaꞌlannoere maa rosoommo?

● Tenne xaggenni Yihowanna doogosi daafira maa rosoommo?

4. Harancho huuccatto assiꞌri. Hakko barri xiinxallokkinni maa rosoottoronna rosoottore ma garinni loosu aana hosiisate hedoottoro Yihowara kuli. Elto ikkinoha Qaalesi Qullaawa Maxaafa uynohe daafira woꞌmanka woyte Yihowa galaxxi!

[Misile]

“Qaalikki lekkaꞌyara caabbichoho; doogoꞌyara xawaabbaho.”—Faarso 119:105.

[Qoola 294 noo saaxine/misile]

Balaxaare Balaxisiisi

Huuccattote woy Qullaawu Maxaafi xiinxallora yanna hoogootto? Duucha woyte tennera kora ikkannohu balaxisiisatto coyeeti.

Hanni togo assite lai: Baalde haadhe, haammata jajjabba kinna giddo wori. Hakkiinni, hattee baaldenkura shaafa kicci assite wonshi. Xa baaldete kinnano shaafuno woꞌme noohe.

Tenne baaldete giddonni kinnano shaafano fushshite hooli; lamenka kay huntooti. Xa baaldete lamenka wolu garinni wori: Umo baaldete shaafa worte, hakkiinni kinna aanaho ledi. Kinna woratto dargi dino? Ee, kuni ikkinohu baaldete balaxxe shaafa worootto daafiraati.

Tennenni maa ronseemmo? Qullaawu Maxaafi, “Roore hasiisanno coye baddine [affe]” yaanno. (Filiphisiyusi 1:10) Heeshshokki giddo shiimaadda coyibba lawishshaho boohaarshanna wallo balaxisiisattoha ikkiro, jajjabbu coyra yaano ayyaanaamittete coyra gari yanna diheedhannohe. Kay tenne Qullaawu Maxaafi amaale haꞌrunsattoha ikkiro, lamunkura yaano Maganu loosirano ikko boohaarshaho ikkitanno yanna afiꞌratto. Qaru coy baaldekki giddo balaxxe wodhatto coyeeti!

[Qoola 290 noo misile]

Awawu gede, Maganu ledo noonke jaaloomino latannohu towaaxxinirooti