ROSO 9
Gambooshsheho Seekkine Qixxaawa Dandiineemmohu Hiittoonniiti?
Kamboodiya
Yukireene
Yihowa Farciꞌraasine ledo Qullaawa Maxaafa xiinxallitanni noottoha ikkiro, xiinxallatto borro balaxxe qixxaawakki nooreeti. Songote gambooshshe haꞌratto woyiteno roore horo afiˈratto gede balaxxe qixxaawittoro danchaho. Konni garinni qixxaawa roso assiꞌra lowore kaaꞌlitanno.
Qixxaawatto yannanna base balaxxe doodhi. Hedokki bebbeehantukki heda dandaattohu hiikka woteeti? Soodo guto loosoho haꞌrattora albaanniitinso, hashsha qaaqquullu goxi gedensaanniiti? Xiinxallitanni lowo saate keeshsha hoogittoro nafa, mageeshshi yanna xiinxalla dandaattoro balaxxe hedi; qolteno hatte yannara wolu coyi ataawe ikkahera sammi yitooti. Qaxaꞌa yitino base hasiꞌri; hattono raadoone, woy mobayile lawinori hedokki bebbeehannokki gede cufi. Xiinxallattora albaanni huuccatto assiꞌrakki, heeshshokki giddo yaadatto gede assannohere agurte Maganu Qaali aana illachishatto gede kaaꞌlitannohe.—Filiphisiyusi 4:6, 7.
Xiinxallatto borro aana dawaro malaatisiꞌri, hattono dawaro qolate qixxaawi. Umo, xiinxallinanni rosita xaphoomu hedo huwatate woꞌnaali. Rosu birxichi woy fooliishsho amaddino sokka maatiro hedi, qolteno mittu mittunku cinaanchu birxichi xaphoomu hedo ledo mayi xaadooshshe afiˈrinoro wodanchi; hakkiinnino, qara qara hedo roore huwatate kaaꞌlitanno misillanna killasu xaꞌmuwa lai. Hakkiinnino mitte mittenta gufo nabbawi, qolteno xaꞌmuwate dawaro qolate woꞌnaali. Fooliishshonna kiiro calla worroonni qummeeshshuwa fante nabbawi; hattono tini qummeeshshuwa qara hedo irkissannohu hiittoonniitiro hedi. (Soqqamaanote Looso 17:11) Xaꞌmote dawaro afitto gedensaanni, gambooshshu yannara dawaro qaagate kaaꞌlitannoheta boode qara qaalla calla malaatisi. Hakkiinnino gambooshshu yannara anga kayisse umikki yaattonni dawaro haransite qola dandaatto.
Lamalate kiiro gambooshshunniwa shiqannoha addi addi roso seekkite qixxaawattoha ikkiro, ayyaanaamo ‘miinja duuꞌnatto basera’ yaano Qullaawu Maxaafi egennokki aana wole haaro egenno lexxatto.—Maatewoosi 13:51, 52.
Gambooshsheho qixxaawate balaxxe maa assa dandaatto?
Gambooshshu yannara dawaro qolate balaxxe qixxaawa dandaattohu hiittoonniiti?