Gambooshshu Addaraashe Miꞌnineemmohu Mayiraati? Hiittoonni?

Gambooshshu Addaraashenkera ronseemmohu qaru Qullaawu Maxaafi rosi Maganu Mangistere kulannoho; Yesuusino sabbakinoti qara sokka tenne Mangistere kultannote.—Luqaasi 8:1.

Qooxeessaho halaalu magansiꞌrara qara baseeti. Yihowa Farciꞌraasine Maganu Mangisteha sabbakate looso qineessitannohu Gambooshshu Addaraasheraati. (Maatewoosi 24:14) Gambooshshu Addaraashe jilbinna minantino gari bayichu bayichu garinni babbaxxinoho; ikkollana, baalanti quwa saꞌinokkite. Batinye addaraashe mittete aleenni ikkitanno songuwa horoonsidhanno. Songuwate kiiro lowonta lexxitanni hadhino daafira, muli diri kawa lowo kume ikkitannota haaro Gambooshshu Addaraashe minnoommo (yaano mereerimunni, mittu barrinni onte yaate). Konne assa dandiinoommohu hiittoonniiti?—Maatewoosi 19:26.

Mannu umisi fajjonni tenne hede fushshino woxinni minnanni. Konne woxe sinu biirora sonkeenna, biiro Gambooshshu Addaraashensa gatamadha woy haaro miꞌna hasidhanno songuwara uyitanno.

Mintannori addi addi basenni dagge uminsa fajjonni damooza baantinsakki loossannoreeti. Batinye gobbara Gambooshshu Addaraashe Mintanno Gaamo noonke. Mintanno gaamo giddo loossannori, mitte gobba giddo songotenni songo, hattono xeertote noo gaxare nafa gattukki hadhe, songuwa Gambooshshu Addaraashe miꞌnitanno woyite kaaꞌlitanno. Wole gobbuwara kayinni, uyinoonninsa qooxeessira loosamannoha Addaraashe minate woy gatamarate looso qineessitannore ikkadda roduuwa shoommoonni. Gambooshshu Addaraashenke minnanniwa baalankawa, ogimma noonsari batinyu qooxeessu roduuwi uminsa fajjonni kaaꞌlitannoha ikkirono, rooriidiha wolqate looso loossannori hakko noo songo roduuwaati. Konne baala assa dandiinoommohu Yihowa ayyaaninniitinna mannisi woꞌma lubbonsanni loosanno daafiraati.—Faarso 127:1; Qolasiyaasi 3:23.

• Gambooshshu Addaraashe alame woꞌmate mina dandiinoommohu hiittoonniiti?