ROSO 28
Webisayitenke Aana Maa Maa Afiꞌra Dandaatto?
Faransaye
Poolaande
Ruusiya
Yesuusi Kiristoosi harunsaanosi togo yiino: “Mannu dancha loosoꞌne lae iima noo Annaꞌne ayirrisanno gede, xawaabbiꞌne mannu albaanni xawo.” (Maatewoosi 5:16) Tenne wonshate yannanke tekinooloje, interneeteno gattukki seekkine horoonsiꞌnanni heeꞌnoommo. Webisayitenke suꞌma jw.org yinanni; tini webisayite Yihowa Farciꞌraasine ammaꞌnorenna loosinsare mashalaqqe afiˈrate kaaꞌlitannote interneetete masimaraati. Qoleno webisayitenke higge affinote. Webisayitenke aana mayi mayi no?
Duuchu manni xaꞌmanno xaꞌmuwara Qullaawu Maxaafinni qolloonni dawaro no. Webisayitenke aana mannu duucha woyite xaꞌmannotera lowonta hasiissanno xaꞌmuwara dawaro afiˈratto. Lawishshaho, Qarrunna Shetto Heedhannokki Yanna Dagga Ikka? nna Reyino Manni Addinta Kaꞌꞌanno? yitanno tiraaktuwa 600 saꞌꞌanno afiinni interneetete aana afiꞌra dandiinanni. Qoleno Qullaawa Borrota Haaro Alame Tiro 130 saꞌꞌanno afiinni, hattono Qullaawa Maxaafa xiinxallate kaaꞌlitanno borro, lawishshaho Qullaawu Maxaafi Addinta Mayyee Rosiisanno? yaanno maxaafanna muli yannara fultinota Agarooshshu Shae, hattono Baqqi Yiiyye! yinanni metseetta addi addi afiinni afiˈra dandaatto. Tenne borro giddo batinye interneetete aana nabbawa woy qaddaꞌnoonni qoonqonni macciishsha woy qoonqotenni, Emmi-pii-siiriinni (MP3), pii-dii-effetenni (PDF) woy ii-pebetenni (EPUB) dirrisiꞌne adha dandiinanni. Wole agurina tenne borro interneetete aaninni attante hasiꞌranno manchira umisi afiinni aa dandaatto! Qoleno batinyu afiinni danqootaho viidiyotenni qixxeessinoonni borro no. Diraamu garinni qixxeessinoonnita Qullaawu Maxaafi niwaawe, hattono fooliishshote yannara macciishshattoha addi addi muuziiqa afiˈra dandaatto.
Yihowa Farciꞌraasinere kultannoti adda ikkitino mashalaqqe no. Qoleno alamete doyichora loonsanni heeꞌnoommo loosire, addi addi gobbara Yihowa Farciꞌraasinera mayi tuncu yiinonsaro, hattono dano iillitanno yannara uyineemmo irdaatire kultannoti muli yanna mashalaqqenna viidiyo webisayitenke aana no. Albillitte heeꞌrannohu qoqqowu gambooshshi qaagiishshanna addi addite sinu biiro teessono afiˈra dandaatto.
Tenne doogganni halaalu xawaabbi uullate qacce geeshsha nafa xawanno gede assinanni heeꞌnoommo. Baalante ahigurera, wole agurina lowonta xeertote nootera Antarkitiku ahigurera noo manni nafa halaale macciishshanni no. Maganinke ayirranno gede “Yihowa qaali [uulla woꞌmate aana] rahe halaꞌlanni haꞌrara” huuccinanni heeꞌnoommo.—2 Teselonqe 3:1.
Lowo manni Qullaawu Maxaafi halaale afanno gede, jw.org kaaꞌlitanni noohu hiittoonniiti?
Webisayitenke aana maa laꞌꞌa hasiꞌratto?