‘Ammana Noonsarira Baalaho Annaho’

1, 2. Nohi warinni kayisse alame hiittoota ikkitino? Tenne daafira Abiraamira mayi macciishshaminosi?

ABIRAAMI Uuri yinanni katamira noo qaesira heeꞌre katamu giddo luphi yee leellannoha kaphu maganna galma laꞌꞌanni no.a Hakkiicho mannu koocanninna wiliile tunni yitanni no. Agana magansiꞌranno manni kakkalaasinete ledo bashshonsante gede kakkalo shiqishiꞌranni no. Abiraami alba xiphi yee dadillunni umo milli assanni shawwu yii. Isi mannu shaaꞌmalanno doogo amade minisira haꞌranni, Uuri katamira kaphu maganna batidhino gara hedikki digatino. Maaeela ikkitinoti tini kaphu magansiꞌra Nohi warinni kayisse halaꞌlitanni keeshshitino.

² Nohi reyinohu Abiraami ilamara lamu dirira albaanniiti. Nohinna maatesi Baote Wayi gedensaanni markaawetenni fultuta, ammanamino manchi Nohi Yihowara kakkalo shiqishino; Yihowano magani-seemo fushshino. (Kal. 8:20; 9:12-14) Hatte yannara alamete aana halaalu magansiꞌralla no. Nohi gedensaanni dagginoti tonnikki ilama babbaxxino qooxeessa billaallitu yannara kayinni, Magano halaalunni magansiꞌranno manni gariha diꞌꞌikkino. Marriwa baalawa mannu kaphu maganna magansiꞌranno. Abiraami anni Taarano kaphu maganna magansiꞌrino; isi kaphu maganna misilla nafa seekkiꞌrinoha ikkara dandaanno.—Iya. 24:2.

3. Abiraami qooxeessisira heeꞌranno manninni baxxinoha assinosi akati hiikkonneeti? Ninke isi lawishshinni maa ronseemmo?

³ Abiraami kayinni baxxino manchooti. Isi Magano ammananno daafira, qooxeessisira heeꞌranno manni gedeeha ikkinokkiti galte hossanni roore xabbe leeltino. Yannate gedensaanni soqqamaasinchu Phaawuloosi qullaawu ayyaaninni Abiraami, ‘Ammana noonsarira baalaho annaho’ yiino. (Roomu Sokka 4:11 nabbawi.) Hanni Abiraami ammanatenni worba mancho ikkanno gede kaaꞌlinosiri maatiro laꞌno. Ninkeno isi lawishshinni ammananke kaajjishiꞌra dandiineemmo gara ronseemmo.

Baote Wayi Gedensaanni Yihowara Soqqama

4, 5. Abiraamira Yihoware rosiisinosihu aye ikkara dandaanno? Hatto yineemmohu mayiraati?

⁴ Abiraamira Maganu Yihoware rosiisinosihu ayeti? Hakkawaro uullate aana Yihowara ammanantino soqqamaasine noosita anfoommo. Insa giddo mittu Seemiiti. Nohite labballi ooso mereero bayiriidihu Seemi ikka hoogirono, roore woyite balanxe kullannihu isooti. Tini Seemi ammanatenni worba mancho ikkinota leellishshannota ikkitukki digattino.b Baote Wayi dayihunni shiima yanna gedensaanni Nohi Yihowa, ‘Seemi Magano’ yiino. (Kal. 9:26) Seemi Yihowanna halaalu magansiꞌra ayirrisannota leellishino.

⁵ Abiraami Seemi egennino? Egennino yine heda dandiineemmo. Hanni Abiraami shiimu noo yanna hedi. Isi 400 saꞌꞌanno diro heeꞌrinohunna heeshshosi giddo lowore lainohu fiixisi Seemi lubbote noota afiti lowo geeshsha maalaꞌlikkinni digatino! Seemi Baote Wayira albaanni noo alamera batidhino bunshe, uulla keereensinoha Baote Waa, mannu ooso uullate aana halaꞌliteenna kalaqantinota umi gosa, hattono Baabeeli Gimbera heeꞌrannohu Naamiruudi finqili warita qarru yanna laino. Ammanamino manchi Seemi kayinni hakko manni gede difinqilino; konnira Yihowa Baabeeli Gimbe minanno manni coyiꞌranno afoo burduuqita, Seeminna maatesi mannu ooso umo coyiꞌra hanaffinoha Nohi coyiꞌranno qaale coyiꞌra diagurtino. Abiraamino tenne maate widooti. Hakko daafira, isi anjesinni kayise Seemi lubbora ayirrisannoti egennantinote. Hakkiinni saeno, Seemi reyinohu Abiraami jawa mancho ikkihu gedensaanniiti. Konni daafira, Abiraamira Yihoware rosiisinosihu Seemi ikkara dandaanno.

6. (a) Abiraami Baote Wayinni lowore rosinota leellishinohu hiittoonniiti? (b) Abiraaminna Saarayi hiittoo heeshsho heeꞌrino?

⁶ Abiraami Baote Wayinni lowore rosino. Nohi Maganu ledo qaafinte gede isino Maganu ledo qaafate sharramino. Abiraami kaphu magannawiinni xeertiꞌrinohunna Uuri katamira heeꞌranno manniwiinni, wole agurina muli fiixisiwiinni nafa baxxinoha ikkinohu iseraati. Ikkirono, Abiraami kaajja aggaare afiꞌrino. Isi Yihowara kaajjado ammana nooseta xuma mancho Saarayi (Soora) adhino.c Insa ilaweeloota ikkirono, mitteenni Yihowara soqqamansanni tashshi yiinonsati egennantinote. Annano amano shiiꞌrinoha Abiraami rodii ilinoha Looxi lossitannorino insaati.

7. Yesuusi harunsaano Abiraami faale haꞌra dandiitannohu hiittoonniiti?

⁷ Abiraami Uuri katamira noota kaphu maganna magansiꞌrara yee Yihowa diagurino. Isinna minaamasi Saarayi, kaphu maganna magansiꞌrannohu qooxeessinsara heeꞌranno manniwiinni baxxitinoreeti. Ninkeno kaajjado ammana heedhannonke gede, baxxinoommore ikka hasiissannonke. Yesuusi harunsaanosi “tenne gobba” woy alame wido ikkitinokkitanna konnira alame gibbannonsata coyiꞌrino. (Yohaannisi 15:19 nabbawi.) Yihowa magansiꞌrattoha ikkakkinni maatekki woy olliichikki seedhe giwinohe daafira dadilloottoha ikkiro, togoo coyi iillinohehu ate calla ikkoottokkita qaagi. Atino Abiraaminna Saarayi gede Maganu ledo qaaffanni nootto.

“Gobbakkinni Fulte . . . Haꞌri”

8, 9. (a) Abiraamira hiikku hawannokki coyi tuncu yiinosi? (b) Yihowa Abiraami mayyee hajajino?

⁸ Mitto barra Abiraamira horo hawannokkiri tuncu yiisi. Maganu Yihowa mitte baxxitino hajajo hajajisi! Qullaawu Maxaafi Maganu Abiraamira tenne hajajo uyino gara tittire xawisannokkiha ikkirono, “ayirrinyu Magani” leellinosita kulanno. (Soqqamaasinete Looso 7:2, 3 nabbawi.) Abiraami Maganu sokkaasinchi widoonni kalqete alame Mootichiha maalaꞌlisanno ayirrinye mito geya lainoha ikkara dandaanno. Isi heeshshote Magani Yihowanna qooxeessisira heeꞌranno manni magansiꞌrannote heeshsho afidhinokki maganna mereero noo badooshshe laiti lowo geeshsha hagiidhinoti dihuluullissannote!

⁹ Yihowa Abiraami mayyee hajajino? “Gobbakkinni fulte, fiixikkiwiinni baxxite, ani leellisheemmohe gobba haꞌri!” yiinosi. Yihowa Abiraami ‘Haꞌratto gobba leellisheemmohe’ yiino ikkinnina, mamira haꞌrannoro dikulinosi. Ikkirono, Abiraami balaxe qaesinna fiixa firasi agure fula hasiissannosi. Hakkawaro insa qooxeessira yaano Mereerimu Soojjaatira mannu fiixaho ikkannoti wole garaati. Mittu manchi fiixisiwiinni baxxe wolewa haꞌranno gede assannori tuncu yiisiro kaayyosi bushate yinanni; mitootu isinni togoo hedeweelcho reyotenni nafa roore bushaati yitanno!

10. Abiraaminna Saarayi Uuri katamira noo qaensanni fule haꞌrate lowore facci asse agura hasiissinonsa yineemmohu mayiraati?

¹⁰ Abiraami qaesinni fulinohu lowo coye facci asse agureeti. Taje leellishshanno garinni Uuri lophino katamaati. (“Abiraaminna Saarayi Agure Fulino Katama” yitanno saaxine lai.) Baatto umme fushshinoonni taje, hundihu Uuri katamira hoola yinoonni minna noota leellishshanno; mite minna isinni maatenna soqqamaasine galtannota 12 woy hakkiinni saꞌino kifillanna kinna karroonni hoowe afidhino. Qoleno mannu guto dirrirannohu wayi baambi, shumate minnanna ishine tunganni bayichi no. Hatte yannara Abiraaminna Saarayi aja manna ikkinokkita qaango; Abiraamira 70, Saarayira kayinni 60 diri balla ikkisekki digatino. Shaqqadu minaanni minaamasira halchannonte gede, Abiraamino minaamasi teessenna qawaaxxidhe heedhara hasiꞌrannoti egennantinote. Hanni kuri minaanninna minaama Yihowa asse yiinonsa coyi daafiranna huluullinonsare mimmitoho hasaabbanno gara hedi. Abiraami, Saarayi ikkirino ikkiro badhera higgannokkita afasinni lowo geeshsha hagiidhikki digatino! Saarayi minaannisente gede iibbitino qaese agurte haꞌrate maahoyye yitino!

11, 12. (a) Abiraaminna Saarayi Uuri kataminni fultara albaanni maa assa hasiissinonsa? (b) Insa hadhu barra mayi ikkinoha lawannohe?

¹¹ Abiraaminna Saarayi haꞌrate sumuu yiihu gedensaanni, lowo loosi agare noonsa. Adhite hadhanno uduunne gamba assanna usura shota looso diꞌꞌikkino. Mamira hadhanni nooro affinokki daafira, maa adhite maa agurtanno ikka? Roorenkanni, insa ledonke heeꞌranno manna hiissineemmo ikka yite yaaddukki digattino. Lophinyu amadinoha Taara hiissitanno ikka? Insa Taara ledonsa haadhe hadhe lubbote noo geeshsha towaatate heddino. Qullaawu Maxaafi Taara maatesi adhe Uuri kataminni fulinota kulanno daafira isino haꞌrate maahoyye yiikkinni digatino. Hatte yannara Taara kaphu maganna magansiꞌra agure nooti dihuluullissannote. Abiraami rodii beetti Looxino ledonsa haꞌraraati.—Kal. 11:31.

¹² Hanni hadhanno barri iillita ikkinore hendo. Haꞌrara feeffatino manninna uduunne hogomboonni saada Uuri katami huxxi gobbaanni gamba yite no. Gaalahonna harrete uduunne hogombe heeꞌnoonni; geꞌreewunna meu hoshsha hubbi yite uurrite no; Abiraami maatenna soqqamaanonsa haꞌrate quqquxante no.d Baalunku, Abiraami ‘Kaꞌe haꞌnona’ yaa geeshsha agarte no. Hakkiinni, quqquxante agadhite noo yanna iillituta, layinkita higgaakkita Uuri kataminni fultu.

13. Xaa yannara batinye Yihowa soqqamaasine Abiraaminna Saarayi lawishsha harunsitanni noohu hiittoonniiti?

¹³ Xaa yannarano lowoti Yihowa soqqamaano Maganu Mangiste sawaakooti roore hasiissannowa hadhe soqqantanno. Mitootu kayinni albinni roore soqqamate yite wole qaale rossanno. Konni albaanni sabbakke egentinokki hayyo horoonsidhe sabbakate sharrantannorino no. Insa hatto assitanno woyite, mite injonna qiniite facci assite agurtannoti egennantinote. Kuri roduuwi, Abiraaminna Saarayi faale hadhe hatto assitanno daafira galanteemmonsa! Konni garinni ammana noonketa leellinsheemmoha ikkiro, Yihowa isira assinoommorinni roorse aannonketa dihuluullammeemmo. Yihowa addaxxitannosire maassiꞌrikkinni diaguranno. (Ibi. 6:10; 11:6) Isi Abiraami maassiꞌrinoyya?

Efiraaxisi Laga Fultu

14, 15. Abiraaminna maatesi Uuri kataminni Kaaraani hadhinohu ma garinniiti? Insa boode yanna Kaaraani heedhinohu mayira ikkara dandaanno?

¹⁴ Gale hosanni mannu haꞌrinsho biso assiꞌre aguri. Abiraaminna Saarayi saadate goowira worroonni bilbili qili qili yaanna mimmitu ledo hasaawa tuntanni mito woyite saada guluffe, mito woyite kayinni lekkatenni hadhanni no. Seeda doogo hadhe egentinokkiri nafa, galte hossanni dukkana qasanna diige adhe haꞌra, hattono akkalle amaddinosihu Taara gaalaho woy harrichoho deseꞌe yee ofolle haꞌranno gede kaaꞌla rossu. Insa Efiraaxisi Laga amadde Galchimira hadhu. Gooro gooddidhanna, hattono xawo tayissanna barru lexxanni haꞌri.

¹⁵ Jeefote mite 960km meddi yitanno doogo hadhuhu gedensaanni Kaaraani yinanni katama iillitu; Kaaraani, Soojjaatinni Galchimira hadhanno daddalaasine tayisse saꞌannoho lophino katamaati. Abiraaminna maatesi boode yanna hakko heedhino. Insa hakko heedhinohu, Taara haꞌrate wolqa hoogeenna ikkara dandaanno.

16, 17. (a) Abiraami jawaante afiꞌranno gede kaaꞌlinosihu hiikkonne gondoorooti? (b) Abiraami Kaaraani heeꞌri yannara Yihowa maassiꞌrinosihu hiittoonniiti?

¹⁶ Gedensoonni Taara 205 dirisinni mannu aalo ikki. (Kal. 11:32) Hatte yannara Yihowa Abiraami hasaawisinosi daafira shesho afiꞌrino. Yihowa Abiraami Uuri katamira heeꞌreenna uyinosi biddishsha wirro kulinosi; hattono alba einosi qaale roore xawisinosi. Abiraami “wolqaataame gosa” ikkanno; hattono uullate aana heeꞌranno manni baalu isi widoonni atoote afiꞌranno. (Kalaqama 12:2, 3 nabbawi.) Maganu Abiraami ledo einohu kuni gondoori, Abiraami wolqa assiꞌre Kaaraani kataminni kae haꞌranno gede kaaꞌlinosi.

¹⁷ Abiraami Kaaraani heeꞌri yannara Yihowa maassiꞌrinosi daafira, hakkiinni haꞌrara kai woyite adhe haꞌrannori lexxino. Qullaawu Maxaafi, “Kaaraani heedhe afidhino jajjanna soqqamaasinensa baala adhite . . . hadhu” yaanno. (Kal. 12:5) Abiraami wolqaataame gosa ikkannohu, jironna soqqamaasine afidhinoti halaꞌlado maate heedhusirooti. Yihowa soqqamaasinesi woꞌmanka woyite dureeyye assannonsa yaa ikka hoogirono, fajjosi wonshitanno gede hasiisannonsare baala aannonsa. Xa Abiraami jawaatino daafira, noosire adhe afinokki gobba haꞌrara kai.

18. (a) Maganoho mannisi ledo noosi aantera lowo geeshsha hasiisanno coyi ikkinohu mamooteeti? (b) Yannate gedensaanni Niisaani 14 mayi ikkino? (“Qullaawu Maxaafi Xagge Giddo Baxxino Barra” yitanno saaxine lai.)

¹⁸ Doogaanchu Kaaraaninni kae, duucha woyite Efiraaxisi Laga fullanniwa Karkemiishi yinanni qooxeessa iillannohu lowo barra haꞌreeti. Maganoho mannisi ledo noosi aantera lowo geeshsha hasiisanno coyi ikkinohu, Abiraami hakko qooxeessa iilli yannara ikkikki digatino. Abiraaminna maatesi Efiraaxisi Laga fultinohu K.A. Niisaani 14, 1943 ikkikki digatino; konne agana Niisaani yinoonnihu yannate gedensaanniiti. (Ful. 12:40-43) Yihowa Abiraamira eemmohe yee qaale eino gobba wodiidoonni leeltanni no. Yihowa Abiraami ledo eino gondoori woꞌma hanafinohu hakko barraati.

19. Yihowa Abiraamira qaale ei woyite maa kulinosi? Maganu eino qaali Abiraami maa qaaganno gede assinosiha ikkara dandaanno?

¹⁹ Abiraaminna maatesi wodiidira higge hadhanni keeshshituhu gedensaanni, Sekeemi qooxeessira More yinanniwa noote jajjabba haqqe mule fooliishshidhu. Hakkono Yihowa Abiraami hasaawisinosi. Maganu hatte yannara einosi qaali, Abiraami sirchi hatte gobba ragiꞌrannota xawisannoho. Abiraami hakka woyite, Yihowa albillitte mannu ooso gatisanno “sirchi” daafira Edeni Gannatete coyiꞌrino masaalo qaagino ikka? (Kal. 3:15; 12:7) Qaaginoha ikkara dandaanno. Ikkollana Maganu hedinore wonshate iso horoonsiꞌrannohu hiittoonniitiro hakkeeshshi geeshsha diafino.

20. Abiraami Maganu uyinosi hexxo naadannota leellishinohu hiittoonniiti?

²⁰ Abiraami, Yihowa uyinosi qoosso lowo geeshsha naadino. Isi haꞌranni heeꞌre umo More yinanniwa jajjabba haqqe mule, gedensoonni kayinni Beeteli qooxeessira Yihowara kakkalote darga seekkino; Kanaani manni hatte gobbanni fulinokki daafira isi gura qiniite layiꞌranni haꞌrinoti egennantinote. Qullaawu Maxaafi Abiraami Maganu suꞌma ganinota kulanno; tini, albillitte daanno sirchisi daafira hiincanni Magano galaxxinota leellishshara dandiitanno. Qoleno, miteekke Abiraami Kanaani heeꞌranno olliichisira sabbakinoha ikkara dandaanno. (Kalaqama 12:7, 8 nabbawi.) Hakkuyi gedensaanni Abiraamira ammanasi buuto fonqolannori tuncu yiinosi. Isi Uuri katamira agure fulino qaesinna qiniitesi qaage digaabbino. Hatteentenni Maganu uyinosi hexxo illachishino. Ibiraawoota 11:10 Abiraami daafira kultanni, “Maganu akeekinohanna minino katama agadhe no” yitanno.

21. Maganu Mangiste daafira Abiraaminni roore maa anfoommo? Maa assate murciꞌrootto?

²¹ Ninke Abiraami agadhinohu lawishshu katami yaano Maganu Mangiste daafira isinni roore anfoommo. Xa tini Mangiste iima gashshite nootanna tenne busha alame muli yannara huntannota, hattono qaale eꞌnoonnihu Abiraami Sirchi yaano Yesuusi Kiristoosi tenne Mangiste Moote ikkinota anfoommo. Albillitte Abiraami reyotenni kaꞌꞌanno; hattono Maganu hedinori woꞌmino gara woꞌmunni woꞌma huwatanno; hakkawote tenne laꞌꞌanke ninkera lowo ayirrinyeeti! Yihowa eino qaali baalunku woꞌmanna laꞌꞌa hasiꞌratto? Hasiꞌrattoha ikkiro, Abiraami faale haꞌrate dandaamihere baala assi. Umikki horo facci assite aguri, hajajamattoha ikki, hattono Yihowa uyinohe qoossora huuccattotenni galatisi. ‘Ammana noonsari baalu anni’ Abiraami faale haꞌrittoro, isi aterano anna ikkannohe!