Maganu Mangiste Maati?

1. Aanchine hiittee huuccattore ronseemmo?

LOWO miliyoone ikkanno manni Yesuusi rosiisinota Mootichu Huuccatto yinanni huuccatto egennino. Isi tenne huuccatto kulinohu rosaanosira huuccidhanno gara rosiisateeti. Tenne huuccatto giddo isi maa maa kulino? Tini huuccatto ninkera hasiissannohu mayiraati?

2. Yesuusi huucciꞌnammora rosiisinohu sasu qaru coyi maati?

² Yesuusi togo yiino: “Kunnira kiꞌne, ‘Annanke Gordoho heeꞌrattohu, suꞌmikki qullaawa ikko. Gashshootikki [woy, Mangistekki] dayo, hedoottori [woy, fajjokki] gordoho ikkinonte gede, baattote aanano ikko’ . . . yitine huuccidhe.” (Maatewoosi 6:9-13 nabbawi.) Yesuusi konni sasu coyi daafira huucciꞌnammora rosiisinohu mayiraati?—Jeefote Hedo 20 lai.

3. Maganu Mangiste daafira maa afa hasiissannonke?

³ Maganu suꞌmi Yihowa ikkinota albaanni ronsoommo. Qoleno Maganu mannu oosoranna uullate hedinori maatirono ronsoommo. Ikkina Yesuusi, “Mangistekki daggo” yaasi mayyaate? Aantete Maganu Mangiste maatiro, tini Mangiste maa assitannoronna Maganu suꞌmi qullaawa ikkanno gede assitannohu hiittoonniitiro ronseemmo.

MAGANU MANGISTE MAATI?

4. Maganu Mangiste maati? Tenne Mangistera Moote ayeti?

⁴ Yihowa iima gashshoote xinte Yesuusa hakkunni gashshootira Moote asse shoomino. Qullaawu Maxaafi konne gashshoote Maganu Mangiste yaanno. Yesuusi ‘mootoollate Mooteeti, hattono mootoollete Mootichaati.’ (1 Ximootewoosi 6:15) Yesuusi geeshsha danchare assa dandaannohu uullate gashshaanchi mittuno dino; qoleno uullate gashshaano baalanta gamba assiniro nafa wolqa isi geeshsha diꞌꞌikkitanno.

5. Maganu Mangiste gashshitannohu hiikko heedheeti? Maa gashshitanno?

⁵ Yesuusi reyotenni kaihunni shoyilluu barri gedensaanni iimira haꞌrino. Gedensoonni Yihowa iso Mangistesira Moote asse shoomino. (Soqqamaasinete Looso 2:33) Maganu Mangiste iima heedhe uulla gashshitanno. (Yohaannisi Ajuuja 11:15) Qullaawu Maxaafi Maganu Mangiste ‘gordoho noo gashshoote’ yaannohu iseraati.—2 Ximootewoosi 4:18.

6, 7. Yesuusi uullate gashshaano baalantenni roorannohu hiittoonniiti?

⁶ Qullaawu Maxaafi, “reyannokkihu iso [Yesuusa] calla” ikkino daafira isi uullate gashshaano baalanta roorannota kulanno. (1 Ximootewoosi 6:16) Uullate gashshaano baalanti martuwa marte reyansa digattanno; Yesuusi kayinni horonta direyanno. Yesuusi assannonkehu danchu coyi baalunku hegerera geedannoho.

⁷ Qullaawu Maxaafi masaalo, Yesuusi taashshannohanna shaqqado moote ikkannota kultanno: “Kaaliiqi ayyaani isi aana fooliishshiꞌranno; hayyotenna wodanchate ayyaani, amaaletenna wolqate ayyaani, egennotenna Kaaliiqa waajjate ayyaani isi aana heeꞌrano. Kaaliiqira hajajama hagiirsiissannosi. Illesinni lai garinni calla yoo diyaanno, maccasinni macciishshi garinni calla dicoyiꞌranno [woy, diamaalanno]. Buxanete taashshe coyiꞌranno; qarraataammaho halaale fushshanno.” (Isayaasi 11:2-4) Atera togoo moote heeꞌrahera dihasiꞌratto?

8. Yesuusi callisi moohannokkita mayinni anfeemmo?

⁸ Maganu mannu ooso giddonni gamu gordu gashshootira Yesuusi ledo gashshitanno gede doorino. Lawishshaho Soqqamaasinchu Phaawuloosi Ximootewoosira togo yiino: “Cincine heeꞌnummoro, isi ledo moonkeemmo.” (2 Ximootewoosi 2:12) Yesuusi ledo mookkannori meꞌꞌeho?

9. Yesuusi ledo mookkannori meꞌꞌeho? Maganu insa doora hanafinohu mamarooti?

⁹ Fooliishsho 7te ronsummonte gede, Soqqamaasinchu Yohaannisi Yesuusi gordoho 144,000 manni ledo moohe nooha ajuujatenni laino. Kuri 144,000 ayeooti? Yohaannisi insa daafira kulanni, “Isihanna [Yesuusiha] Annisi suꞌma albinsara borreessinoonni” yiino. Isi lede togo yiino: “Insa Geꞌrechu [Yesuusi] haꞌrannowa baala hoodesi hadhanno. . . . [Insa] mannu giddonni wonde gatinsoonnireeti.” (Yohaannisi Ajuuja 14:1, 4 nabbawi.) Kuni 144,000 manni, Yesuusi ledo ‘gobba woy uulla gashshara’ Maganu doorinoho ammanamino Kiristaanaati. Kuni manni reyanno wote, iimi heeshsho ragiꞌrate reyotenni kaꞌꞌanno. (Yohaannisi Ajuuja 5:10) Yihowa, soqqamaasinete (woy, hawaariyaatete) yannanni kayise, 144,000 mootoolle widira kiiramannoha ammanamino Kiristaana dooranni keeshshino.

10. Yihowa Yesuusanna 144,000 mootoolle manna gashshitara doorasi baxannonketa leellishshanno yineemmohu mayiraati?

¹⁰ Yihowa ninkera lowo geeshsha hedanno daafira Yesuusi ledo mookkannore mannu ooso giddonni doorino. Yesuusira ninke qarri leellannosi; konni daafira isi dancha gashshaanchonke ikkanno. Isi mancho ikkanna qarrama yaa mayyaatero afino. Phaawuloosi, Yesuusi ‘wolqanke anjera woy laanfenkera kaaꞌle afannoha’ ikkinotanna “ninke gede baalu coyinni [fonqolaminoha]” ikkinota coyiꞌrino. (Ibiraawoota 4:15; 5:8) Isi ledo mookkannori 144,000 mannino manna ikka yaa mayyaatero affinoreeti. Qoleno insa guuntete xeꞌnenna xiwanu ledo sharrante saꞌino. Konni daafira Yesuusinna 144,000 mootoolle hedonke calla ikkikkinni qarrankeno huwattannota addaxxa dandiineemmo.

MAGANU MANGISTE MAA ASSITANNO?

11. Iima heedhinori baalunku woꞌmanka wote Maganu fajjo assitinoni?

¹¹ Yesuusi rosaanosi Maganu fajjo iima Ikkitinonte gede uullate aanano ikkitara huuccidhanno gede rosiisino. Ikkollana, iima heedhannori giddo gamu Maganu fajjo assitinokki yanna no. Fooliishsho 3te, Sheexaanu Daawuloosi Yihowara finqilinota ronsoommo. Yihowa, Sheexaanu finqili gedensaanni isinna ammanantinokki sokkaasine woy agaaninte iima boode yanna heedhara fajjino. Hakko daafira, hatte yannara iima Maganu fajjo assannohu woꞌmanka diꞌꞌikkino. Fooliishsho 10te, Sheexaanunna agaanintennire lende ronseemmo.

12. Yohaannisi Ajuuja 12:10 aana kulloonniti lame qara ikkito hiitteeti?

¹² Qullaawu Maxaafi, Yesuusi Maganu Mangistera Moote ikkanni heeꞌrenni Sheexaanu ledo olamannota kulanno. (Yohaannisi Ajuuja 12:7-10 nabbawi.) Kiiro 10 lame qara ikkito kultanno. Yesuusi Moote ikkinoti Maganu Mangiste gashsha hanaffanno; qoleno Sheexaanu iiminni uullara tugamanno. Albillitte ronseemmonte gede, tini lamenti ikkito woꞌmite kaꞌino.

13. Sheexaanu iiminni tugamita mayi ikkino?

¹³ Qullaawu Maxaafi, Sheexaanunna agaaninte iiminni tugantuta ammanantino sokkaasine baasa hagiidhitinota kulanno. Togo yaanno: “Gorduwanna giddonsa heedhinanniri baalu hagiidhe!” (Yohaannisi Ajuuja 12:12) Xa gordoho noori baalunku Maganu fajjo assitannore ikkitino daafira hakko keerunna mittimma woꞌmitino.

14. Sheexaanu iiminni uullara tugamino daafira uullate aana mayi ikkanni no?

¹⁴ Uullate aana kayinni heeshsho hattoota diꞌꞌikkitino. “Sheexaanu shiima yanna calla gattinosita afe,” ‘lowo hanqinni dirrino daafira,’ mannu oosora lowo qarri iillanni no. (Yohaannisi Ajuuja 12:12) Sheexaanu baasa aaraawino. Isi iiminni uullara tugamino; qoleno muli yanna giddo baꞌꞌannota afino. Hakko daafira uullate aana noo manni baalunkura qarra naqate, waadatenna gawajjate dandaamisire baala assanno.

15. Maganu uullate hedinori maati?

¹⁵ Ikkollana Maganu uullate hedinore diagurino. Xaano ikkiro Yihowa guutu manni gannate ikkitino uullara hegerera heeꞌrara hasiꞌranno. (Faarso 37:29) Ikkina Maganu Mangiste kuni ikkanno gede assitannohu hiittoonniiti?

16, 17. Daanieeli 2:44 Maganu Mangiste daafira maa rosiissannonke?

¹⁶ Daanieeli 2:44 te noo masaalo togo yitanno: “Hatte mootoolla yannara gordu Magani horonta diigamannokkihanna wole daga uggitannokki gashshoote uurrisanno. Kuni wole gashshoote baala coꞌo asse hunanno. Isi kayinni [hegerera] kaajje heeꞌranno.” Tini masaalo Maganu Mangiste daafira maa rosiissannonke?

¹⁷ Umihunni, Maganu Mangiste gashsha hanaffannohu “hatte mootoolla yannara” ikkinota kultannonke. Hatto yaa, Maganu Mangiste gashsha hanaffannohu mannu gashshooti uullate aana heeꞌreennaati yaate. Layinkihunni, Maganu Mangiste hegerera heedhannotanna wolu gashshooti riqiwannokkita kultannonke. Sayikkihunni, Maganu Mangistenna tenne alame gashshooti mereero olu heeꞌranno. Maganu Mangiste konne ola qeelte uulla woꞌma ise calla gashshitanno. Hakkunni gedensaanni mannu ooso taalle nookki gashshooti giddo heedhanno.

18. Maganu Mangistenna tenne alame gashshooti mereero kaꞌꞌannoha jeefote ola mayinanni?

¹⁸ Maganu Mangistenna uullate gashshooti mereero olu kaꞌꞌara albaanni mayi ikkanno? Armagedooni yinannihu jeefote oli kaꞌꞌara albaanni, agaaninte “gosa baalate mootoolla” soꞌrisiisse ‘Woꞌmanka Dandaanno Maganihura bayiru barri olira gamba assitanno.’ Ee, mannu gashshooti Maganu Mangiste qasate kaꞌꞌanno.—Yohaannisi Ajuuja 16:14, 16; Jeefote Hedo 10 lai.

19, 20. Maganu Mangiste hasiissannonkehu mayiraati?

¹⁹ Maganu Mangiste hasiissannonkehu mayiraati? Ajayi ajeenna sasu coyiraati. Umihunni, cubbaataamma ikkinoommo daafira xiwammeemmonna reyineemmoreeti. Qullaawu Maxaafi kayinni, Maganu Mangiste gashshitanno wote hegerera heeꞌneemmota kulannonke. Yohaannisi 3:16 togo yitanno: “Maganu baattote aana noo manna baala baxino daafira, iso ammaꞌninohu baalu hegere heeshsho afiꞌranno gede ikkinnina baꞌꞌannokki gede, Maganu mitto Beettosi uyino.”

²⁰ Layinkihunni, Maganu Mangiste hasiissannonkehu bushu manni woꞌmino alamera heeꞌneemmo daafiraati. Batinyu manni kaphannoho, haqaqqaalannoho, hattono amanyoote bainore assannoho. Togoo manni assanno bunshe ninke hoolle dianfeemmo; Maganu kayinni hoola dandaanno. Bushare assa agurannokki manni Armagedooni oli yannara goofanno. (Faarso 37:10 nabbawi.) Sayikkihunni Maganu Mangiste hasiissannonkehu mannu gashshooti laafa, mararro nookkiha hattono maaeela ikkino daafiraati. Mannu gashshooti mannu Maganoho hajajamanno gede dirosiisanno. Qullaawu Maxaafi “mittu woloota kade gashshanno” yaanno.—Rosiisaancho 8:9.

21. Maganu Mangiste Maganu fajjo uullate aana woꞌmitanno gede assitannohu hiittoonniiti?

²¹ Armagedooni oli gedensaanni, Maganu Mangiste Maganu fajjo uullate aana woꞌmitanno gede assitanno. Lawishshaho, Sheexaanenna agaanintesi kume diro usurtanno. (Yohaannisi Ajuuja 20:1-3) Goofimarchoho, xiwanunna reyo baꞌanno. Wodote kakkalonni, ammanamino manni baalunku Gannatete hegerera heeꞌranno. (Yohaannisi Ajuuja 22:1-3) Maganu Mangiste Maganu suꞌmi qullaawanno gede assitanno. Hatto yaa mayyaate? Maganu gashshooti uulla gashshanno wote, mannu baalunku Yihowa suꞌma ayirrisanno yaate.—Jeefote Hedo 21 lai.

YESUUSI MOOHINOHU MAMAROOTI?

22. Yesuusi uullate aana noo yannara woy reyotenni kaꞌꞌanni heeꞌrenni moohinokkita mayinni anfeemmo?

²² Yesuusi rosaanosira “Mangistekki daggo” yite huuccidhanno gede rosiisino. Hakko daafira, hakkawote Maganu gashshooti albillitte daannoti egennantinote. Yihowa balaxe gashshootesi xintanno, hakkiinni Yesuusa Moote asse shoomanno. Yesuusi moohinohu iimira haꞌranni heeꞌreeti? Deeꞌni; korkaatuno iima mare agadha hasiissinosi. Yesuusi reyotenni kaihunni shiima yanna gedensaanni, Pheexiroosinna Phaawuloosi tenne xawisse coyidhino; insa Faarso 110:1 te noo masaalo Yesuusi aana woꞌmitannota xawissino. Yihowa tenne masaalo aana togo yiino: “Baarigaarrakki lekkakkira woroonni qolammo geeshsha, qiniiteꞌyaanni ofolli.” (Soqqamaasinete Looso 2:32-35; Ibiraawoota 10:12, 13) Yesuusi, Yihowa Moote asse shoomasira albaanni mageeshshi yanna agadha hasiissinosi?

23. (a) Yesuusi Maganu gashshootira Moote ikke gashsha hanafinohu mamooteeti? (b) Aante noo fooliishshora maa ronseemmo?

²³ Mitte suwashsho wodana afiꞌrino Kiristaani gaamo, 1914 Qullaawu Maxaafi masaalo giddo baxxino diro ikkinota lowo diri albaanni huwattino. Alamete aana 1914 kawa ikkanni noori kuni Kiristaani yiinori gara ikkinota buuxisino. Yesuusi Moote ikke gashsha hanafinohu hakko dirooti. (Faarso 110:2) Hakkiinni boode yanna gedensaanni, Sheexaanu uullara tugamino; xa isira “shiima yanna calla gattinosi.” (Yohaannisi Ajuuja 12:12) Aante noo fooliishshora, tini heeꞌnoommoti hattee shiima yanna ikkitinota leellishshannota ledote taje laꞌneemmo. Qoleno, Maganu Mangiste muli yanna giddo Maganu fajjo uullate aana woꞌmitanno gede assitannota ronseemmo.—Jeefote Hedo 22 lai.