Geedhino Minaanninna Minaama Qaaqqo Ili!

Abirihaaminna Saara adhame lowo diro heeꞌrino. Insa Uuri katamira noonsata dancha qae agure haꞌre dunkaanaho heeꞌrino. Saara Yihowa baxxanno daafira digunguntino.

Saara ooso ila lowo geeshsha hasidhino; konni daafira Abirihaami togo yitu: ‘Borojjichoꞌya Aggaara qaaqqo ilturo, hakku qaaqqi aneha ikkanno.’ Gedensoonni, Aggaara labbaa qaaqqo iltu. Hakkunni qaaqqi suꞌmi Ismaeeliiti.

Lowo diri gedensaanni, Abirihaamira 99 diro, Saarara kayinni 89 diro ikke heeꞌreenna, sasu wosini insata dayi. Abirihaami insa haqqichote hunda ofoltanno gede asse sagale uyinsa. Hakku wosini ayeootiro afootto? Sokkaasinete! Insa Abirihaami togo yitu: ‘Daanno diro togoo woyite labbaa qaaqqo iltinanni.’ Saara dunkaanu giddo heedhe tenne macciishshitanni no. Ise wodanisenni togo yite osoꞌlitu: ‘Ani geedhumma gedensaanni ooso ila dandeemma?’

Yihowa sokkaasinchi yiinonte gede layinki diro Saara labbaa qaaqqo iltu. Abirihaami qaaqqoho suꞌma Yisihaaqi yee fushshi; Yisihaaqi yaa “Osolo” yaate.

Yisihaaqi ontu dirihu heeꞌreenna, Saara iso Ismaeeli mishanna laꞌu. Ise qaaqqose Ismaeeli gawajjannokki gede Abirihaamiwa marte ‘Aggaaranna Ismaeeli fushshite haꞌrisi’ yitu. Abirihaami insa haꞌrisa dibaxino. Yihowa kayinni Abirihaami togo yiisi: ‘Saara yitannohere assi. Ismaeeli daafira qarrantooti. Coyiꞌroommore wonsheemmohu beettikki Yisihaaqi widoonniiti.’