Umiha Sase Qoomama

Israeelete manni borojje ikke daafursanno looso loosanno gede assinoonni. Yihowa Musenna Aarooni hadhine Ferioonira togo yiiyye yiinsa: ‘Manniꞌya halalli gobbara haꞌre magansiꞌroena aguri.’ Feriooni kayinni togo yee naaxxe coyiꞌri: ‘Yihowa yiinota dimacciishsheemmo; Israeeleno diagureemmo.’ Hakkiinni Feriooni Israeele bashsho loossanno loosinni roore loossanno gede assi. Yihowa Ferioonira rosiisara hasiꞌrino coyi no. Hiitto asse rosiisinoro afootto? Yihowa Gibitsete gobbara Tonne Qoomama dirrisi. Yihowa Muse togo yii: ‘Feriooni coyiꞌroommore macciishsha giwino. Soodo guto isi Abbayi Laga dirranno. Isiwa marte togo yii: “Mannaꞌya haꞌrisa giwootto daafira Abbayi Lagi mundeete soorramanno.”’ Muse Yihowara hajajame Feriooniwa mari. Feriooni Aarooni siqqosinni Abbayi Laga gananna lai; hakkiinni lagu mundeete soorrami. Lagu giddo noo qulxuꞌme reyitu, laguno olooqe bowi; konni daaafira Abbayi Lagi angannikki gede ikki. Feriooni kayinni xaano Israeelete manna diagurino.

Lamalu barri gedensaanni Yihowa Muse galagale mare Ferioonira togo yaanno gede soyi: ‘Mannaꞌya agura giwittoro Gibitsete gobbara becheꞌnaama woꞌmitanno.’ Aarooni siqqosi gotti assita becheꞌnaama fulte baatto baala woꞌmitu. Becheꞌnaama mannu minira eꞌu, daallassansa gidditu, hattono sagalete uduunni giddora nafa eꞌino. Becheꞌnaama baalankawa woꞌmitu! Feriooni Musera, ‘Israeelete manna agureemmona Yihowa becheꞌnaama hoolanno gede huuccie’ yii. Konni daafira Yihowa qoomamu uurranno gede assi. Gibitsete manni reyitino becheꞌnaama gamba asse base basete duuni. Hakkiinni bowanye gobba woꞌmitu. Ikkollana Feriooni xaano Israeelete manna diagurino.

Hakkunni gedensaanni Yihowa Muse togo yii: ‘Aarooni siqqosinni baattote aana noo buko ganona; hakkiinni buko biinnete soorrantanno.’ Bayichonko biinne gobba baala woꞌmitu. Konnira mitu Gibitsete manni Ferioonira, ‘Konne qoomama dirrisinohu Maganoho’ yii. Feriooni kayinni Israeelete manna xaano diagurino.